DA Hike: , કેન્દ્રીય કર્મચારીઓ માટે ગૂડ ન્યુઝ, મોંઘવારી ભથ્થામાં 2%નો વઘારો, સરકારે આપી મંજૂરી
DA Hike 2026: કેન્દ્ર સરકારે 18 એપ્રિલ 2026ના રોજ પોતાના કર્મચારીઓ માટે મોંઘવારી ભથ્થા (DA)માં 2 ટકાનો વધારો મંજૂર કર્યો છે. આ નિર્ણયથી સરકારી કર્મચારીઓને મોટી ખુશખબર મળી છે.
DA Hike Latest News: કેન્દ્ર સરકાર દ્વારા કેન્દ્રિય કર્મચારીઓ માટે આજે મોટી જાહેરાત કરવામાં આવી છે. સૂત્રોના જણાવ્યા મુજબ કેન્દ્રિય કેબિનેટે કેન્દ્રિય કર્મચારીઓ અને પેન્શનધારકો માટે મોંઘવારી ભથ્થામાં 2 ટકાનો વધારો મંજૂર કર્યો છે. આ નિર્ણય બાદ હવે કર્મચારીઓનું DA વધશે.
સરકારના આ નિર્ણય બાદ હવે કર્મચારીઓનું કુલ મોંઘવારી ભથ્થું 58 ટકાથી વધીને 60 ટકા થઈ ગયું છે. આ વધારાનો સીધો લાભ આશરે 50 લાખ સરકારી કર્મચારીઓ અને 65 લાખથી વધુ પેન્શનધારકોને મળશે, જેના કારણે તેમની માસિક સેલેરી અને પેન્શનમાં વધારો થશે.
હવે સેલેરીમાં કેટલો વધારો થશે?
માનીએ કે કોઈ કેન્દ્રિય કર્મચારીનું બેઝિક પગાર ₹36,500 છે, તો 60 ટકા મુજબ હવે તેનું DA ₹21,900 થશે. મહત્વની વાત એ છે કે, કર્મચારીઓને જાન્યુઆરીથી એરિયર પણ મળશે. નવો નિયમ 1 જાન્યુઆરી 2026થી લાગુ માનવામાં આવશે. એટલે કે કર્મચારીઓને માત્ર આવતા મહિનાની વધારેલી સેલેરી જ નહીં મળે, પરંતુ ગયા ત્રણ મહિનાના એટલે કે જાન્યુઆરી, ફેબ્રુઆરી અને માર્ચના બાકી એરિયર પણ આપવામાં આવશે.
કર્મચારીઓ લાંબા સમયથી રાહ જોઈ રહ્યા હતા
કેન્દ્ર સરકારના આ પગલાથી તે કર્મચારીઓને મોટી રાહત મળી છે, જે છેલ્લા કેટલાક સમયથી આ જાહેરાતની રાહ જોઈ રહ્યા હતા અને વધતી મોંઘવારી વચ્ચે પોતાની આવક વધારવાની માંગ કરી રહ્યા હતા. આ વધારો એવા સમયમાં કરવામાં આવ્યો છે જ્યારે કર્મચારી સંઘો 8મા પગાર પંચ હેઠળ પગાર માળખામાં મોટા ફેરફારોની માંગ કરી રહ્યા છે.
મોંઘવારી ભથ્થું કેમ વધારવામાં આવે છે?
સરકાર વધતી જતી ફુગાવાને કારણે સરકારી કર્મચારીઓના ખર્ચની ભરપાઈ કરવા માટે વર્ષમાં બે વાર, જાન્યુઆરી અને જુલાઈમાં મોંઘવારી ભથ્થું વધારે છે. શ્રમ મંત્રાલય દ્વારા બહાર પાડવામાં આવેલા ડેટા (CPI-IW) ના આધારે તેની ગણતરી કરવામાં આવે છે, જે આવશ્યક ચીજવસ્તુઓના ભાવમાં વધારો દર્શાવે છે. સરળ શબ્દોમાં કહીએ તો, જેમ જેમ બજાર ભાવ વધે છે, તેમ તેમ સરકાર તમારા પગારનું મૂલ્ય જાળવવા માટે આ ભથ્થું વધારે છે.
ટોપ સ્ટોરી
ટ્રેન્ડિંગ સમાચાર
