EPFO લોન્ચ કરવા જઈ રહ્યું છે નવી એપ, જાણો તેમાં કઈ-કઈ સુવિધા મળશે?
EPFO સાથે જોડાયેલા કરોડો કર્મચારીઓ માટે મોટા રાહતના સમાચાર આવ્યા છે.
EPFO સાથે જોડાયેલા કરોડો કર્મચારીઓ માટે મોટા રાહતના સમાચાર આવ્યા છે. હવે પોતાના પીએફના રૂપિયા ઉપાડવા માટે વધુ રાહ જોવાની કે લાંબા કાગળકામની જરૂર રહેશે નહીં. કર્મચારી ભવિષ્ય નિધિ સંગઠન (EPFO) માર્ચ-એપ્રિલ 2026માં એક નવી મોબાઇલ એપ્લિકેશન લોન્ચ કરવાની તૈયારી કરી રહ્યું છે, જે UPI મારફતે PF ભંડોળને બેન્ક ખાતામાં સીધા ટ્રાન્સફર કરવાની મંજૂરી આપશે. તો ચાલો EPFOની નવી એપ્લિકેશન અને તેના ફીચર પર એક નજર કરીએ.
ઉમંગથી અલગ હશે નવી EPFO એપ્લિકેશન
અધિકારીઓના મતે, આ નવી એપ્લિકેશન હાલની ઉમંગ એપ્લિકેશનથી અલગ હશે. તે સીધી ગ્રાહકના બેન્ક ખાતા સાથે લિંક હશે અને BHIM સહિત અન્ય UPI એપ્લિકેશનો સાથે કામ કરશે. તેનો ધ્યેય PF ઉપાડ માટે સંપૂર્ણપણે બેન્કિંગ લેવલની સુવિધા પૂરી પાડવાનો છે. નવી સિસ્ટમ હેઠળ ભંડોળ EPFO ખાતામાંથી સીધા ગ્રાહકના લિંક્ડ બેન્ક ખાતામાં ટ્રાન્સફર કરવામાં આવશે. ત્યારબાદ સભ્યો UPI પિન દાખલ કરીને તાત્કાલિક ભંડોળ ઉપાડી શકશે. હાલમાં આ સુવિધા ઉપલબ્ધ નથી અને પીએફ ઉપાડ માટે UAN પોર્ટલ અથવા ઉમંગ એપ્લિકેશનથી ક્લેમ કરવાની જરૂર પડે છે, જેમાં સમય લાગે છે.
સિસ્ટમ ટ્રાયલ મોડમાં છે.
EPFO એ આ નવી સુવિધાનું પરીક્ષણ શરૂ કરી દીધું છે. હાલમાં તકનીકી ખામીઓને સમયસર દૂર કરી શકાય તે માટે લગભગ 100 ડમી એકાઉન્ટ્સ પર પરીક્ષણ હાથ ધરવામાં આવી રહ્યું છે. અધિકારીઓ કહે છે કે એકવાર પરીક્ષણ પૂર્ણ થઈ ગયા પછી એપ્લિકેશન માર્ચના અંત સુધીમાં શરૂ થઈ શકે છે.
કેટલું પીએફ ઉપાડી શકાય છે?
નિયમો અનુસાર, સભ્યો તેમના EPF બેલેન્સમાંથી મહત્તમ 75 ટકા ઉપાડી શકે છે. નિવૃત્તિ ભંડોળ સુરક્ષિત રહે તે સુનિશ્ચિત કરવા માટે બાકીના 25 ટકા ખાતામાં રાખવા ફરજિયાત છે. નોકરી ગુમાવવાની સ્થિતિમાં પણ આ જ નિયમો લાગુ પડે છે. વધુમાં બાકીના 25 ટકા પીએફ ફક્ત ચોક્કસ સમય પછી જ ઉપાડી શકાય છે.
નવી એપ આ ખાસ સુવિધાઓ પ્રદાન કરશે
UPI મારફતે તાત્કાલિક PF ઉપાડી શકાશે.
એલિજિબલ બેલેન્સ અને લઘુત્તમ બેલેન્સ વિશે અલગ માહિતી
રીઅલ-ટાઇમ ક્લેમ સ્ટેટસ
5 લાખ રૂપિયા સુધીની ઓટો-સેટલમેન્ટ સુવિધા
ડિજિટલ KYC અને સેલ્ફ કરેક્શન ફીચર
પાસબુક અને બેલેન્સ ચેક જેવી સેવાઓ
AI-આધારિત બહુભાષી સપોર્ટ
EPFO 3.0 તરફ એક મોટું પગલું
આ નવી એપ EPFO 3.0 અપગ્રેડનો એક ભાગ છે, જે ડિજિટલ ક્લેમ, ઝડપી વેરિફિકેશન અને સરળ સેવાઓ પર ભાર મૂકે છે. EPFO પાસે આશરે 26 લાખ કરોડનું કુલ ભંડોળ છે અને તેના આશરે 300 મિલિયન સબ્સ્ક્રાઇબર્સ છે, જેમાંથી આશરે 7.5 કરોડ એક્ટિવ મેમ્બર્સ છે. વધુમાં, એવું માનવામાં આવે છે કે નવી UPI સુવિધા બીમારી, લગ્ન, શિક્ષણ અથવા કોઈપણ ઈમરજન્સીના કિસ્સામાં PF ભંડોળ ઉપાડવાનું ખૂબ સરળ અને ઝડપી બનાવશે.
Before You Go
Gujarat Government: રાજ્યના ખેડૂતો માટે સરકારનો મહત્વનો નિર્ણય
ટોપ સ્ટોરી
ટ્રેન્ડિંગ સમાચાર
