Gujarat: વીજળી પડવાના કારણે 2 લોકોએ જીવ ગુમાવ્યો

રાજ્યમાં વરસી રહેલા કમોસમી વરસાદ અને વીજળી પડવાના કારણે આજે 2 લોકોએ જીવ ગુમાવ્યો છે.  વડોદરા જિલ્લાના લતીપુરામાં વીજળી પડતા ખેડૂતનું મોત થયું હતું.

પ્રતિકાત્મક તસવીર

ગાંધીનગર: રાજ્યમાં વરસી રહેલા કમોસમી વરસાદ અને વીજળી પડવાના કારણે આજે 2 લોકોએ જીવ ગુમાવ્યો છે.  વડોદરા જિલ્લાના લતીપુરામાં વીજળી પડતા ખેડૂતનું મોત થયું હતું. ખેતરમાં મરચા વીણતા હતા આ સમયે અચાનક વિજળી પડતા તેમનું મોત થયું છે. ખેડૂતને  સારવાર માટે હોસ્પિટલમાં ખસેડાયા હતા પરંતુ તબીબોએ તેમને મૃતજાહેર કર્યા હતા.  દાહોદના ટુંકીવજુ ગામે બે લોકો પર વિજળી ત્રાટકી હતી. જેમાં એક મહિલાનું મોત થયું હતું જ્યારે એક વ્યક્તિ ઘાયલ થયો હતો.  દાહોદના જ ગલાલિયાવાડ ગામે વિજળી પડતા ચાર ભેંસના મોત થયા હતા. ગાજવીજ સાથે પડેલા વરસાદના કારણે એક વૃક્ષ ધરાશાયી થયું હતું. 

રાજ્યના અનેક વિસ્તારોમાં ભર ઉનાળે છવાયો વરસાદી માહોલ

હવામાન વિભાગની આગાહીને પગલે રાજ્યના અનેક વિસ્તારોમાં આજે કમોસમી વરસાદ પડ્યો છે. સૌ પ્રથમ વાત કરીએ વડોદરાની તો અહીં અચાનક વાતાવરણમાં પલટો આવ્યો હતો. આકાશ કાળા વાદળોથી ઢંકાઈ ગયું હતું અને ધીમી ધારે વરસાદ શરૂ થયો હતો. હરણી, નિઝમપુરા,સમાં, છાણી, કારેલીબાગમાં વરસાદ પડ્યો હતો.

કચ્છમાં કમોસમી વરસાદ યથાવત 

તો બીજી તરફ પશ્ચિમ કચ્છના વિસ્તારોમાં પણ ભારે પવન અને કરા સાથે વરસાદ પડ્યો છે. માંડવી, નખત્રાણા બાદ હવે મુંદ્રા સહિત ગ્રામ્ય વિસ્તારમાં પવન સાથે વરસાદ શરૂ થયો છે. પૂર્વ કચ્છના પણ વાતાવરણમાં પલટો આવ્યો છે. પૂર્વ કચ્છના અંજાર સહિત આસપાસ વિસ્તારોમાં વરસાદી માહોલ જોવા મળી રહ્યો છે.

મહીસાગરના વાતાવરણમાં પલટો

મહીસાગર જિલ્લાના કડાણા તેમજ આસપાસના ગ્રામ્ય વિસ્તારોમાં વરસાદ નોંધાયો છે. વાદળછાયા વાતાવરણ બાદ કડાણા અને દીવડા પંથકમાં વરસાદ પડ્યો હતો. વરસાદના કારણે વાતાવરણમાં ઠંડક પ્રસરી હતી. તો બીજી તરફ વરસાદના કારણે વાવેતર કરેલ પાકને નુકસાનની ભીતિને લઈ ખેડૂત ચિંતિત થયા છે.

અરવલ્લીમાં વરસાદી માહોલ

અરવલ્લી જિલ્લામાં કમોસમી વરસાદ પડ્યો છે. મોડાસાના ગ્રામીણ પંથક ઈસરોલ, જીવનપુર, ટીટોઈ સહિતના વિસ્તારમાં વરસાદ નોંધાયો છે. વરસાદ પડતા ખેડૂતો મુશ્કેલીમાં મુકાયા છે. વધુ વરસાદ પડશે તો ઘઉં, ચણા સહિતના પાકને નુકશાન થવાની ભિતિ છે.

હવામાન વિભાગના અનુસાર આગામી પાંચ દિવસ તાપમાનનો પારો સ્થિર રહેશે.  જો કે, કમોસમી વરસાદની સાથે 40 થી 60 કિમીની ઝડપે પવન ફૂંકાશે. આજે અમદાવાદ, ભૂજ , રાજકોટ અને કેશોદમાં  36 ડિગ્રી તાપમાન નોંધાયું હતું. સુરેન્દ્રનગર અને ગાંધીનગરમાં 35 ડિગ્રી તાપમાન નોંધાયું છે.