સૌરાષ્ટ્રના કયા વિસ્તારમાં આભ ફાટ્યું હોય તેવી સ્થિતિ સર્જાઈ? 2 કલાકમાં 4 ઈંચ વરસાદ ખાબકતાં નદીઓ બે કાંઠે વહેતી થઈ

ગુજરાતમાં ચોમાસાના વધુ એક રાઉન્ડનો પ્રારંભ થઇ ગયો છે અને 22 તાલુકાઓમાં 1 ઈંચથી વધુ વરસાદ ખાબક્યો છે. જેમાં દેવભૂમિ દ્વારકાના કલ્યાણપુર, જુનાગઢ જિલ્લાના માણાવદરમાં સૌથી વધુ 6 ઈંચ દેટલો વરસાદ નોંધાયો

ગુજરાતમાં ચોમાસાના વધુ એક રાઉન્ડનો પ્રારંભ થઇ ગયો છે અને 22 તાલુકાઓમાં 1 ઈંચથી વધુ વરસાદ ખાબક્યો છે. જેમાં દેવભૂમિ દ્વારકાના કલ્યાણપુર, જુનાગઢ જિલ્લાના માણાવદરમાં સૌથી વધુ 6 ઈંચ દેટલો વરસાદ નોંધાયો હતો. હવામાન વિભાગ પ્રમાણે, ગુજરાતના અનેક જિલ્લાઓમાં આગામી પાંચ દિવસ દરમિયાન ભારેથી અતિભારે વરસાદ પડી શકે છે. ચોમાસાની સિઝનમાં આ વખતે 123 ટકાથી વધુ વરસાદ સાથે અતિવૃષ્ટિની સ્થિતિ સર્જાઈ છે ત્યારે વરસાદના વધુ એક રાઉન્ડથી ખેડૂતોમાં ચિંતા વ્યાપી ગઇ છે. દેવભૂમિ દ્વારકાના જામકલ્યાણપુરમાં આભ ફાટ્યું હોય તેવી જેવી સ્થિતિ સર્જાઈ હતી. માત્ર 2 કલાકમાં 4 ઈંચ જેટલો વરસાદ ખાબકી ગયો હતો. વરસાદના પગલે રસ્તાઓ અને કોઝવે પર વરસાદી પાણી ફરી વળ્યાં હતા તો 2 કલાકમાં ખાબકેલા ભારે વરસાદને પગલે નદીઓ બે કાંઠે વહેતી થતાં હરિપર કલ્યાણપુરને જોડતા માર્ગો પર પાણી ફરું વળ્યું હતું. આ ઉપરાંત ભારે વરસાદના પગલે નીચાણવાળા વિસ્તારોના મકાનોમાં પાણી ઘૂસી ગયા હતા. દેવભૂમિ દ્વારકા જિલ્લાના ખંભાળિયા તાલુકામાં બપોરથી અચાનક વાતાવરણમાં પલટો આવ્યો હતો અને બપોરે 2 થી 4માં સૌથી વધુ 4 ઈંચ જેટલો વરસાદ ખાબક્યો હતો જ્યારે 4થી 6 દરમિયાન 1.16 ઈંચ વરસાદ ખાબક્યો હતો. દેવભૂમિ દ્વારકામાં ચોમાસાની વર્તમાન સિઝનમાં 81.77 ઈંચ સાથે મોસમનો 324.75% વરસાદ નોંધાઇ ચૂક્યો છે. સૌરાષ્ટ્રમાંથી દેવભૂમિ દ્વારકા ઉપરાંત માણાવદરમાં 2.32 ઈંચ, ખંભાળિયામાં 2.12 ઈંચ, ધ્રોલમાં 2 ઈંચ, કેશોદમાં 1.88 ઈંચ, ભાણવડમાં 1.57 ઈંચ, કાલાવડમાં 1.37 ઈંચ, પોરબંદરમાં 1.22 ઈંચ વરસાદ નોંધાયો હતો. કચ્છમાંથી ભૂજમાં બપોરે 12થી 2માં 2.48 ઈંચ અને બપોરે 2થી 4માં 1 ઈંચ વરસાદ ખાબક્યો હતો. કચ્છમાં ચોમાસાની મોસમમાં આ વખતે 41.65 ઈંચ સાથે મોસમનો 256.88 ટકા કરતાં વધુ વરસાદ નોંધાઇ ચૂક્યો છે. દક્ષિણ ગુજરાતમાંથી ચીખલીમાં બપોરે 2થી 4 દરમિયાન સૌથી વધુ 1.33 ઈંચ વરસાદ પડયો હતો.