અંબાજીમાં આજથી ભાદરવી પૂનમના મેળાનો પ્રારંભ, પદયાત્રીની સુવિધા માટે આ હાઇવે પર વાહન વ્યવહાર રહેશે બંધ

અંબાજીમાં યોજાનારા ભાદરવી પૂનમ મહામેળાને લઈને તૈયારીઓને આખરી ઓપ આપવામાં આવ્યો છે. 20થી 26 સપ્ટેમ્બર દરમિયાન યોજાનારા મહામેળામાં લાખો માઈભક્તો પહોંચવાની સંભાવનાને પગલે સુરક્ષા, ટ્રાફિક અને આરોગ્ય સહિતની વ્યવસ્થાઓ ગોઠવવામાં આવી છે.

અંબાજી મેળાનો પ્રારંભ

Source : abp asmita

Show Quick Read

Key points generated by AI, verified by newsroom

• અંબાજી ભાદરવી પૂનમ મહામેળો 20-26 સપ્ટેમ્બર દરમિયાન યોજાશે.
• પદયાત્રીઓ માટે મેડિકલ કેમ્પ, રેડિયમ પટ્ટી સુરક્ષા ગોઠવાઈ છે.
• 6000 થી વધુ પોલીસ, CCTV, ટ્રાફિક વ્યવસ્થા ગોઠવાઈ.

અંબાજીના ભાદરવી પૂનમ મહામેળાને લઈને  તંત્ર સજ્જ બન્યું છે. 20થી 26 સપ્ટેમ્બર દરમિયાન યોજાનારા મહામેળામાં અંબાજી તરફ લાખો માઈભક્તો પગપાળા અને વાહનો દ્વારા પહોંચશે. ભક્તોની સુરક્ષા અને સુવિધા માટે પોલીસ, આરોગ્ય વિભાગ તેમજ વિવિધ સંસ્થાઓ દ્વારા વ્યવસ્થાઓ કરવામાં આવી છે.

દાંતા-રતનપુર ખાતે શીત કેન્દ્રમાં બનાસ ડેરી દ્વારા મેડિકલ કેમ્પનું આયોજન કરવામાં આવ્યું છે. મેડિકલ કેમ્પના શુભ પ્રારંભ પ્રસંગે શંકર ચૌધરીએ માતાજીની આરતી ઉતારી હતી અને ત્યારબાદ રિબન કાપીને કેમ્પ ખુલ્લો મુક્યો હતો. આ પ્રસંગે મોટી સંખ્યામાં લોકો ઉપસ્થિત રહ્યા હતા. માઈભક્તોને આરામની સાથે આધુનિક આરોગ્ય સેવાઓ મળી રહે તે માટે કેમ્પમાં વ્યવસ્થા કરવામાં આવી છે.

પગપાળા અંબાજી જતા ભક્તો માટે ગાંધીનગરના બાલવા ખાતે પણ સેવા કેમ્પ શરૂ કરવામાં આવ્યો છે. આશ્રય ફાઉન્ડેશન દ્વારા ઉનાવા વાસણીયા મહાદેવથી બાલવા ચોકડી વચ્ચે આ કેમ્પનું આયોજન કરાયું છે. ફાઉન્ડેશનના સ્થાપક ભગીરથસિંહ ચૂડાસમા અને તેમની ટીમ દ્વારા દિવસ-રાત ભક્તોની સેવા કરવામાં આવી રહી છે.

આ પણ વાંચો: શું TMC ની હાલત પણ શિવસેના-NCP જેવું થશે? જાણો મમતા બેનર્જી પાસે હવે કયા વિકલ્પો છે

ભક્તોની સુરક્ષાને ધ્યાનમાં રાખીને ભાભર પોલીસે પણ અનોખી પહેલ કરી છે. રાત્રિના સમયે પદયાત્રીઓ અકસ્માતનો ભોગ ન બને તે માટે પોલીસ દ્વારા તેમના કપડાં અને સામાન પર રેડિયમ લગાવવામાં આવી રહ્યા છે. પોલીસ દ્વારા માત્ર સુરક્ષા નહીં પરંતુ ફેસિલિટેટર તરીકે ભક્તોને મદદ કરવાની કામગીરી પણ કરવામાં આવશે.

બીજી તરફ મેળાને લઈને ટ્રાફિક વ્યવસ્થામાં પણ ફેરફાર કરવામાં આવ્યો છે. હિંમતનગરના મહેતાપુરાથી ખેડબ્રહ્માના ખેરોજ પુલ સુધી વન-વે જાહેર કરવામાં આવ્યો છે. પદયાત્રીઓની સુરક્ષા માટે સ્ટેટ હાઇવેની ડાબી બાજુનો વાહનવ્યવહાર બંધ રાખવામાં આવશે, જ્યારે હિંમતનગરથી જતા માર્ગની જમણી બાજુથી વાહનોને અવરજવર કરવાની મંજૂરી રહેશે. આ જાહેરનામું 19 સપ્ટેમ્બરથી 26 સપ્ટેમ્બર બપોરે 12 વાગ્યા સુધી અમલમાં રહેશે. જોકે એમ્બ્યુલન્સ, ફાયર બ્રિગેડ સહિતની આકસ્મિક સેવાઓના વાહનોને મુક્તિ આપવામાં આવી છે.

અંબાજી ભાદરવી પૂનમ મહામેળા માટે બનાસકાંઠા પોલીસે પણ કડક સુરક્ષા વ્યવસ્થા ગોઠવી છે. પોલીસ કંટ્રોલરૂમનો પ્રારંભ કરી માતાજીની પૂજા અને શ્રીફળ વધેરી પોલીસ દ્વારા આશીર્વાદ લેવામાં આવ્યા હતા.

મેળા દરમિયાન 6 હજારથી વધુ પોલીસ, હોમગાર્ડ અને DRDના જવાનો ખડેપગે રહેશે. સમગ્ર મેળા વિસ્તારને આશરે 10 સેક્ટર અને ઝોનમાં વહેંચવામાં આવ્યો છે. 2 SP, 25 DYSP, 17 PI અને 120 PSI સહિતનો પોલીસ કાફલો તૈનાત રહેશે.

મેળા વિસ્તારમાં 600થી વધુ CCTV કેમેરાથી સતત નજર રાખવામાં આવશે. આ ઉપરાંત બોડી વોર્ન કેમેરા અને ડુંગરાળ વિસ્તારમાં હોર્સ પેટ્રોલિંગ દ્વારા પણ સુરક્ષા વ્યવસ્થા કરવામાં આવી છે. ભક્તોની મદદ માટે 63 પોલીસ સહાયતા કેન્દ્રો કાર્યરત કરવામાં આવ્યા છે. કોઈપણ ઈમરજન્સીમાં 112 નંબર પર સંપર્ક કરી શકાશે. પોલીસ દ્વારા શંકાસ્પદ વસ્તુ કે ગતિવિધિ જોવા મળે તો તાત્કાલિક જાણ કરવા અપીલ કરવામાં આવી છે.