Gujarat Rain: ગુજરાતમાં અતિભારે વરસાદને લઈ અંબાલાલ પટેલે કરી આ આગાહી, જાણી લો
હવામાન નિષ્ણાંત અંબાલાલ પટેલે પણ રાજ્યમાં વરસાદને લઈ આગાહી વ્યક્ત કરી છે. તેમના જણાવ્યા મુજબ ગુજરાતમાં વરસાદનો જોરદાર રાઉન્ડ આવશે.
અમદાવાદ: ગુજરાતમાં ચોમાસાની શરુઆત થઈ ગઈ છે. સમગ્ર રાજ્યમાં વરસાદી માહોલ યથાવત છે. હવામાન વિભાગ દ્વારા પણ રાજ્યમાં આગામી સાત દિવસ સુધી વરસાદની આગાહી કરવામાં આવી છે. આ સિવાય હવામાન નિષ્ણાંત અંબાલાલ પટેલે પણ રાજ્યમાં વરસાદને લઈ આગાહી વ્યક્ત કરી છે. તેમના જણાવ્યા મુજબ ગુજરાતમાં વરસાદનો જોરદાર રાઉન્ડ આવશે.
જૂલાઈના પ્રથમ સપ્તાહમાં પણ ભારે વરસાદનું અનુમાન
હવામાન નિષ્ણાત અંબાલાલ પટેલે વરસાદની આગાહી કરતા જણાવ્યું છે કે, 24 જૂન બાદ દક્ષિણ ગુજરાતમાં ભારેથી અતિભારે વરસાદનું અનુમાન છે. 24થી 30 જૂન વચ્ચે દક્ષિણ ગુજરાતમાં ભારેથી અતિભારે વરસાદની શક્યતા છે. અંબાલાલ પટેલના મત મુજબ મધ્ય-ઉત્તર ગુજરાતમાં ભારેથી અતિભારે વરસાદની શક્યતા છે. જૂલાઈના પ્રથમ સપ્તાહમાં પણ ભારે વરસાદનું અનુમાન વ્યક્ત કર્યું છે.
અંબાલાલ પટેલે નક્ષત્રો મુજબ આગાહી કરતા કહ્યું કે, 22 જૂને સૂર્ય સવારે આદ્રા નક્ષત્ર પ્રવેશ કરશે. આદ્રા નક્ષત્રનું પાણી કૃષિ માટે સારું ગણાય છે. 21, 22, 23 જૂને રાજ્યના અનેક ભાગોમાં વરસાદની શક્યતા છે. ત્રણ દિવસ ભારેથી અતિભારે વરસાદની શક્યતા છે. 30 જૂન સુધીમાં ભારે વરસાદની આગાહી તેમણે કરી છે.
છેલ્લા 24 કલાકમાં 81 તાલુકામાં વરસાદ
રાજ્યમાં છેલ્લા 24 કલાકમાં 81 તાલુકામાં વરસાદ વરસ્યો હતો. સૌથી વધુ પંચમહાલના જાંબુઘોડામાં 8 ઈંચ વરસાદથી જળબંબાકાર થયું હતું. છોટાઉદેપુરના પાવીજેતપુરમાં 5 ઈંચ વરસાદ ખાબક્યો હતો. સમગ્ર રાજ્યમાં વરસાદી માહોલ જામ્યો છે.
છેલ્લા 24 કલાકમાં જેતપુર પાવીમાં પાંચ ઈંચ, પેટલાદમાં પોણા ચાર ઈંચ, કપરાડામાં 3 ઈંચ, તારાપુરમાં પોણા 3 ઈંચ, હાલોલમાં પોણા 3 ઈંચ , બોરસદ, ઝઘડિયામાં અઢી-અઢી ઈંચ, આણંદમાં બે ઈંચ વરસાદ, ઉમરગામ, છોટાઉદેપુરમાં 2-2 ઈંચ, ચુડામાં પોણા બે ઈંચ, વડોદરામાં પોણા બે ઈંચ, આંકલાવ, બોડેલીમાં દોઢ-દોઢ ઈંચ, વાઘોડિયામાં સવા ઈંચ, કાલોલ, ઘોઘંબા, ખંબાતમાં એક-એક ઈંચ વરસાદ વરસ્યો હતો.
આગામી સાત દિવસ રાજ્યમાં હળવાથી મધ્યમ વરસાદની આગાહી
હવામાન વિભાગે આગામી સાત દિવસ રાજ્યમાં હળવાથી મધ્યમ વરસાદની આગાહી કરી છે. હવામાન વિભાગ મુજબ આજે કચ્છ, બનાસકાંઠા, પાટણ અને સાબરકાંઠામાં વરસાદનું યલો એલર્ટ જાહેર કરવામાં આવ્યું છે. જ્યારે દક્ષિણ ગુજરાતના તાપી, નવસારી, ડાંગ, વલસાડમાં પણ વરસાદનું યલો એલર્ટ છે. સંઘ પ્રદેશ દમણ અને દાદરાનગર હવેલીમાં પણ આજે વરસાદનું યલો એલર્ટ જાહેર કરવામાં આવ્યું છે. વરસાદની આગાહીને પગલે પાંચ દિવસ માછીમારોને દરિયો ન ખેડવા માટે સૂચના આપવામાં આવી છે.
ભારે વરસાદથી છોટાઉદેપુરમાં નીચાણવાળા વિસ્તારોમાં પાણી ભરાયા હતા. હાટ બજાર, વીજ કચેરી કમ્પાઉન્ડમાં પાણી ભરાયા હતા. વાપી-શામણાજી નેશનલ હાઈવે નંબર 56 બિસ્માર બની ગયો છે. માન નદીના પાણી ફરી વળતા કોઝ વે પર ગાબડા પડી ગયા છે.
ટોપ સ્ટોરી
ટ્રેન્ડિંગ સમાચાર
