અંબાલાલ પટેલની મોટી આગાહી: 23 જુલાઈએ બનશે મજબૂત સિસ્ટમ, આ વિસ્તારોમાં થશે ભારે વરસાદ
Ambalal Patel weather forecast: 17 અને 18 જુલાઈએ નવી સિસ્ટમ બનશે, જ્યારે 27 જુલાઈ બાદ આખા રાજ્યમાં સાર્વત્રિક મેઘમહેરની ભવિષ્યવાણી.
Ambalal Patel weather forecast: રાજ્યના ખેડૂતો અને વિવિધ સંગઠનોની સતત અપીલ બાદ જાણીતા હવામાન નિષ્ણાત અંબાલાલ પટેલે ફરી એકવાર વરસાદની આગાહી કરવાનું શરૂ કરી દીધું છે. આગાહી કરતા પહેલા તેમણે સ્પષ્ટતા કરી છે કે આ માત્ર ખેડૂતોના હિત માટે છે અને જો કોઈનું હિત જોખમાય તો તેઓ જવાબદાર રહેશે નહીં. અંબાલાલ કાકાની આ નવી આગાહી વરસાદની ચાતક નજરે રાહ જોતા ગુજરાતના ખેડૂતો માટે એક મોટા રાહતના સમાચાર લઈને આવી છે, જેમાં આગામી દિવસોમાં મજબૂત વરસાદી સિસ્ટમ બનવાની અને સાર્વત્રિક વરસાદની વાત કહેવામાં આવી છે.
રથયાત્રા અને જુલાઈના મધ્યમાં કેવું રહેશે હવામાન?
અંબાલાલ પટેલના જણાવ્યા અનુસાર, 14 અને 15 જુલાઈએ રાજ્યમાં વાદળો ઘેરાશે અને રથયાત્રાના દિવસે હવામાનમાં મોટો પલટો જોવા મળશે. રથયાત્રાના પવિત્ર દિવસે સૌરાષ્ટ્રમાં વરસાદ પડશે, જ્યારે મધ્ય અને ઉત્તર ગુજરાતમાં છાંટા પડવાની સંભાવના છે. તેમના પરંપરાગત જ્ઞાન મુજબ, હાલ બંગાળની ખાડીમાં જે સિસ્ટમ સક્રિય થઈ છે તેની અસર પૂર્વ ભારત (આસામ વગેરે) માં છે. નિયમ મુજબ જ્યારે પૂર્વમાં સારો વરસાદ હોય ત્યારે પશ્ચિમમાં (ગુજરાત-સિંધમાં) વરસાદ ઓછો રહે છે. તેથી 20 જુલાઈ સુધી રાજ્યમાં માત્ર હળવો કે છૂટોછવાયો વરસાદ જ જોવા મળશે.
23 જુલાઈએ બનશે મજબૂત સિસ્ટમ, ક્યાં ખાબકશે વરસાદ?
હવામાનમાં મોટો ફેરફાર 17 અને 18 જુલાઈએ જોવા મળશે, જ્યારે એક નવી સિસ્ટમ બનશે. પરંતુ, સૌથી સારા સમાચાર એ છે કે 23 જુલાઈના રોજ એક અત્યંત મજબૂત સિસ્ટમ સક્રિય થશે. આ સિસ્ટમના કારણે મધ્ય ગુજરાત અને ઉત્તર ગુજરાતમાં ભારે વરસાદ તૂટી પડશે. મહીસાગર, પંચમહાલ, વડોદરા અને આણંદની સાથે ઉત્તર ગુજરાતના મહેસાણા, બનાસકાંઠા, અરવલ્લી અને સાબરકાંઠાના વિસ્તારોમાં જળબંબાકારની સ્થિતિ સર્જાઈ શકે છે.
આ પણ વાંચોઃ આવતીકાલનું હવામાન: આગામી 12 કલાક ભારે! 22 રાજ્યોમાં વાવાઝોડા સાથે અતિભારે વરસાદ ખાબકશે
દક્ષિણ ગુજરાત અને સાર્વત્રિક વરસાદની એન્ટ્રી
22 જુલાઈ પછી દક્ષિણ ગુજરાતમાં પણ વરસાદ જોર પકડશે. ખાસ કરીને 23 થી 26 જુલાઈ દરમિયાન દક્ષિણ ગુજરાત અને મુંબઈ-મહારાષ્ટ્રના ભાગોમાં ભારેથી અતિભારે વરસાદ પડવાની પૂરી શક્યતા છે. આ સિસ્ટમ ધીમે ધીમે આખા ગુજરાતને તરબોળ કરશે. અંબાલાલ પટેલે ખુશખબર આપતા કહ્યું છે કે 27 જુલાઈથી 30 જુલાઈની વચ્ચે આખા ગુજરાતમાં સાર્વત્રિક અને સારો વરસાદ થવાની પૂરેપૂરી વકી છે.
ટોપ સ્ટોરી
ટ્રેન્ડિંગ સમાચાર
