આણંદમાં ભાજપ નેતાની કરતૂત: પ્રેમજાળમાં ફસાવી પરિણીતા પર મિત્રો સાથે મળી આચર્યું દુષ્કર્મ

ખંભાત તાલુકા ભાજપ યુવા મોરચાના કારોબારી સભ્ય વિજય ચૌહાણ અને તેના બે મિત્રો સામે ગેસ્ટ હાઉસમાં દુષ્કર્મ આચરી અશ્લીલ વીડિયો વાયરલ કરવાની ધમકી આપ્યાની ફરિયાદ. પોલીસે ત્રણેય આરોપીઓની કરી અટકાયત.

Anand Khambhat BJP Leader Arrested In Rape And Blackmail Case News

Source : ai/abp asmita

Show Quick Read

Key points generated by AI, verified by newsroom

• ખંભાતના ભાજપ નેતા વિજયે સોશિયલ મીડિયાથી પરિણીતાને પ્રેમજાળમાં ફસાવી.
• તેણે અશ્લીલ ફોટા-વિડીયો બતાવી બ્લેકમેલ કરી વારંવાર દુષ્કર્મ આચર્યું.
• બાદમાં બે મિત્રો સાથે ગેસ્ટહાઉસમાં બળજબરીથી સામૂહિક દુષ્કર્મ આચર્યું.
• પોલીસે પીડિતાની ફરિયાદ બાદ ત્રણેય આરોપીઓની તાત્કાલિક ધરપકડ કરી.

Khambhat Crime News: આણંદ જિલ્લાના ખંભાતમાં રાજકીય વર્તુળોમાં ખળભળાટ મચાવતો એક અત્યંત શરમજનક કિસ્સો પ્રકાશમાં આવ્યો છે. ખંભાત તાલુકા ભાજપ યુવા મોરચાના કારોબારી સભ્ય અને સ્થાનિક નેતા વિજય ચૌહાણ તેમજ તેના મિત્રો સામે એક પરિણીતાએ સામૂહિક દુષ્કર્મની ગંભીર ફરિયાદ નોંધાવી છે. પોલીસે તાત્કાલિક કાર્યવાહી કરતા ત્રણેય આરોપીઓની અટકાયત કરી લીધી છે.

સોશિયલ મીડિયાથી શરૂ થઈ જાળ

સમગ્ર ઘટનાની વિગત મુજબ, ભાજપ નેતા વિજય ચૌહાણ જૂન 2024માં સોશિયલ મીડિયા પ્લેટફોર્મ મારફતે આ પીડિત પરિણીતાના સંપર્કમાં આવ્યો હતો. શરૂઆતમાં સામાન્ય વાતચીત બાદ વિજયે મીઠી વાતો કરીને મહિલાને પોતાની પ્રેમજાળમાં ફસાવી હતી. ત્યારબાદ તકનો લાભ ઉઠાવીને તેણે પરિણીતા પર દુષ્કર્મ આચર્યું હતું. આટલેથી ન અટકતા, આ નરાધમે પોતાના મોબાઈલમાં મહિલાના અશ્લીલ ફોટા અને વીડિયો પણ ઉતારી લીધા હતા.

બ્લેકમેલિંગ અને સામૂહિક દુષ્કર્મનો સિલસિલો

ત્યારબાદ વિજય ચૌહાણે આ અશ્લીલ વીડિયો અને ફોટા સોશિયલ મીડિયા પર વાયરલ કરી દેવાની ધમકી આપીને પરિણીતાને બ્લેકમેલ કરવાનું શરૂ કર્યું. બદનામીના ડરથી પીડિતા લાચાર બની ગઈ, જેનો ફાયદો ઉઠાવીને વિજયે વારંવાર તેને પોતાની હવસનો શિકાર બનાવી અને તેના પર દુષ્કર્મ ગુજારતો રહ્યો.

હદ તો ત્યારે થઈ ગઈ જ્યારે થોડા સમય બાદ વિજયે પોતાની આ ગંદી હરકતમાં તેના બે મિત્રો કિરણ જાદવ અને પ્રદીપને પણ સામેલ કર્યા. આ ત્રણેય આરોપીઓ પરિણીતાને બળજબરીથી એક ગેસ્ટ હાઉસમાં લઈ ગયા અને ત્યાં ત્રણેયે મળીને મહિલા પર સામુહિક દુષ્કર્મ આચર્યું. આ ઉપરાંત, કોઈને ફરિયાદ કરશે તો જાનથી મારી નાખવાની ધમકી પણ આપી.

કંટાળીને પરિણીતાએ નોંધાવી ફરિયાદ

છેલ્લા ઘણા સમયથી સતત શારીરિક અને માનસિક ત્રાસ સહન કરી રહેલી પરિણીતા આખરે હિંમત ભેગી કરીને આગળ આવી. તેણે ખંભાત ગ્રામ્ય પોલીસ સ્ટેશન પહોંચીને ભાજપ નેતા વિજય ચૌહાણ, કિરણ જાદવ અને પ્રદીપ વિરુદ્ધ વિગતવાર ફરિયાદ નોંધાવી.

પોલીસે પરિણીતાની ફરિયાદના આધારે દુષ્કર્મ, બ્લેકમેલિંગ અને ધમકી આપવા સહિતની ગંભીર કલમો હેઠળ ગુનો નોંધીને તાત્કાલિક એક્શન લીધા હતા. ખંભાત પોલીસે ગણતરીના સમયમાં જ ત્રણેય આરોપીઓની અટકાયત કરી લીધી છે અને હાલમાં આ કેસની વધુ અને ઝીણવટભરી તપાસ ચાલી રહી છે.