સ્થાનિક સ્વરાજ્યની ચૂંટણીમાં વિધાનસભા કરતાં પણ ભાજપનો ઐતિહાસિક વિજય, જાણો ચોંકાવનારા આંકડા
એકલા કાંધલ જાડેજાની સમાજવાદી પાર્ટીએ બે નગરપાલિકા જીતી, કોંગ્રેસને માત્ર એક.
BJP Gujarat local election win: ગુજરાતની સ્થાનિક સ્વરાજ્યની ચૂંટણીમાં ભાજપે 2022ની વિધાનસભા ચૂંટણી કરતાં પણ વધુ સારું પ્રદર્શન કર્યું છે. કુલ 68 નગરપાલિકામાંથી 64 નગરપાલિકાના પરિણામોમાં ભાજપે 92 ટકા એટલે કે 59 નગરપાલિકાઓ પર વિજય મેળવ્યો છે.
આ આંકડો 2022ની વિધાનસભા ચૂંટણી કરતાં વધુ છે, જ્યાં ભાજપે 182માંથી 156 બેઠકો (86 ટકા) જીતી હતી. બીજી તરફ, કોંગ્રેસનું પતન સતત જારી રહ્યું છે. વિધાનસભામાં 17 બેઠકો (9 ટકા) જીતનાર કોંગ્રેસને આ વખતે માત્ર એક જ નગરપાલિકા (1.6 ટકા) મળી છે.
નોંધપાત્ર બાબત એ છે કે સમાજવાદી પાર્ટીના ધારાસભ્ય કાંધલ જાડેજાના નેતૃત્વમાં તેમની પાર્ટીએ રાણાવાવ અને કુતિયાણા નગરપાલિકામાં વિજય મેળવ્યો છે, જે સમગ્ર કોંગ્રેસ પાર્ટી કરતાં વધુ સારું પ્રદર્શન છે. બાકીની ચાર નગરપાલિકાના પરિણામો હજુ અનિર્ણિત છે.
સ્થાનિક સ્વરાજ્યની ચૂંટણીઓમાં ભાજપની આ જીત ઘણી રીતે મહત્વપૂર્ણ છે:
કોંગ્રેસના ગઢમાં ગાબડું: ભાજપે કોંગ્રેસના મજબૂત ગણાતા વિસ્તારોમાં જીત મેળવીને કોંગ્રેસના પાયાને હચમચાવી દીધો છે.
જનતાનો વિશ્વાસ: આ જીત દર્શાવે છે કે લોકો હજુ પણ ભાજપ પર વિશ્વાસ મૂકી રહ્યા છે અને પાર્ટીની નીતિઓ અને કાર્યક્રમોને સમર્થન આપી રહ્યા છે.
આગામી ચૂંટણીઓ માટે સંકેત: આ પરિણામો આગામી વિધાનસભા અને લોકસભા ચૂંટણીઓ માટે ભાજપ માટે સકારાત્મક સંકેત છે.
સ્થાનિક સ્વરાજ્યની ચૂંટણીઓમાં ભાજપની આ ભવ્ય જીત કોંગ્રેસ માટે ચિંતાનો વિષય છે, જ્યારે ભાજપ માટે ઉજવણીનો અવસર છે. આ પરિણામો ગુજરાતના રાજકારણમાં નવા સમીકરણો સર્જી શકે છે.
5 હજાર ઉમેદવારો મેદાનમાં હતા
સ્થાનિક સ્વરાજ્યની ચૂંટણીમાં 5775 દાવેદારો મેદાનમાં ઉતર્યા હતા અને કુલ 36 લાખ 71 હજાર 479 મતદારોને મતાધિકાર મળ્યો હતો. રાજ્યમાં પાલિકા-પંચાયતના યોજાયેલા મતદાનમાં ઘણા મતદાન મથકો પર મતદારોની લાંબી લાંબી કતારો પણ જોવા મળી હતી.
ઉલ્લેખનીય છે કે, આ વખતે સ્થાનિક સ્વરાજ્યની ચૂંટણી માટે કુલ 7036 ઉમેદવારીપત્રો દાખલ થયા હતા, જેમાંથી 1261 પત્રો અમાન્ય ઠર્યા, જ્યારે કે 5775 ઉમેદવારોની ઉમેદવારી માન્ય રાખવામાં આવી. જે બાદ 478 ઉમેદવારોએ ઉમેદવારીપત્ર પરત ખેંચ્યા, જેના કારણે 213 બેઠકો બિનહરીફ થઈ ગઈ. જેના પગલે હરિફાઇ હેઠળની બેઠકો માટે કુલ 5 હજાર 84 ઉમેદવારો ચૂંટણીના જંગમાં મેદાને ઉતર્યા હતાં.
આ પણ વાંચો....
આણંદ નગરપાલિકા ચૂંટણી પરિણામ: ભાજપનો દબદબો, પરંતુ અપક્ષોનો પડકાર
ટોપ સ્ટોરી
ટ્રેન્ડિંગ સમાચાર
