ગુજરાત લોકરક્ષક ભરતી: લેખિત પરીક્ષાની પ્રોવિઝનલ આન્સર કી જાહેર, 23 જૂન સુધી વાંધા અરજી કરી શકાશે!

રાજ્યમાં 12,000 થી વધુ જગ્યાઓ માટે 2.37 લાખ ઉમેદવારોએ આપી હતી પરીક્ષા, OMR શીટ પણ ઓનલાઈન ઉપલબ્ધ.

Written By : gujarati.abplive.com | Updated at : 20 Jun 2025 05:49 PM (IST)

ગુજરાત લોકરક્ષક ભરતી: લેખિત પરીક્ષાની પ્રોવિઝનલ આન્સર કી જાહેર

Source : abp asmita

ગુજરાત લોકરક્ષક કેડરની લેખિત પરીક્ષાની પ્રોવિઝનલ આન્સર કી આજે (20 જૂન) સત્તાવાર રીતે જાહેર થઈ ગઈ છે.
રાજ્યમાં કુલ 12,000 જેટલી લોકરક્ષક કેડરની જગ્યાઓ માટે ભરતી પ્રક્રિયા ચાલી રહી છે, જેમાં 2.37 લાખથી વધુ ઉમેદવારોએ 15 જૂને લેખિત પરીક્ષા આપી હતી.
ઉમેદવારો પ્રોવિઝનલ આન્સર કી સામે 23 જૂન, 2025 ની રાત્રિના 11:59 વાગ્યા સુધી ઓનલાઈન વાંધા અરજી કરી શકશે.
તમામ ઉમેદવારોની OMR શીટની સ્કેનિંગ કોપી 16 જૂનથી જ સત્તાવાર વેબસાઈટ પર ઉપલબ્ધ છે, જે 30 જૂન સુધી જોઈ શકાશે.
આન્સર કી અને OMR શીટ gprb.gujarat.gov.in અથવા lrdgujarat2021.in પરથી મેળવી શકાશે.

Gujarat Lokrakshak answer key: ગુજરાતમાં પોલીસ ભરતીને લઈને મહત્વપૂર્ણ સમાચાર સામે આવ્યા છે. રાજ્યમાં લોકરક્ષક કેડરની અંદાજે 12,000 જગ્યાઓ પર ચાલી રહેલી ભરતી પ્રક્રિયા અંતર્ગત લેખિત પરીક્ષાની પ્રોવિઝનલ આન્સર કી આજે શુક્રવારે (20 જૂન) બપોરે 4:00 વાગ્યે જાહેર કરવામાં આવી છે. ગત 15 જૂન, 2025 ના રોજ યોજાયેલી આ લેખિત પરીક્ષામાં 2.37 લાખથી વધુ ઉમેદવારો હાજર રહ્યા હતા.

પોલીસ ભરતી બોર્ડ દ્વારા 16 જૂનના રોજ જ પરીક્ષામાં હાજર રહેલા તમામ ઉમેદવારોની OMR Sheet સ્કેનિંગ કરીને સત્તાવાર વેબસાઈટ પર અપલોડ કરી દેવામાં આવી હતી. હવે, ઉમેદવારો ભરતી બોર્ડની સત્તાવાર વેબસાઈટ gprb.gujarat.gov.in અથવા lrdgujarat2021.in પર જઈને આ પ્રોવિઝનલ આન્સર કી મેળવી શકશે.

Provisional Answer Key જોવા અહીં ક્લિક કરો

જો કોઈ ઉમેદવારને પ્રોવિઝનલ આન્સર કીમાં દર્શાવેલા સવાલ-જવાબ સામે વાંધો જણાય, તો તેઓ આગામી ત્રણ દિવસ એટલે કે 23 જૂન, 2025 ની રાત્રિના 11:59 વાગ્યા સુધી ઓનલાઈન વાંધા અરજી કે રજૂઆત મોકલી શકશે. ભરતી બોર્ડે સ્પષ્ટ કર્યું છે કે ઓનલાઈન સિવાય અન્ય કોઈપણ રીતે મોકલવામાં આવેલા વાંધા અથવા સમય મર્યાદા પૂર્ણ થયા બાદ મોકલવામાં આવેલી રજૂઆતને ધ્યાનમાં લેવામાં આવશે નહીં.

લોકરક્ષક સંવર્ગની બિન હથિયારી પોલીસ કોન્સ્ટેબલ, હથિયારી પો.કો., જેલ સિપાઈ, SRPF સહિતની જગ્યાઓ માટે શારીરિક કસોટી અને લેખિત પરીક્ષા પૂર્ણ થઈ ગઈ છે. લેખિત પરીક્ષા અમદાવાદ, સુરત, વડોદરા, રાજકોટ, ભાવનગર, આણંદ અને ગાંધીનગર સહિત 825 કેન્દ્ર-શાળા ખાતે યોજાઈ હતી.

લેખિત પરીક્ષામાં હાજર રહેલા તમામ ઉમેદવારો તેમની OMR Sheet ની સ્કેનિંગ કોપી virtualview.co.in ભરતી બોર્ડની વેબસાઈટ પરથી જોઈ શકશે. ઉમેદવારો પરીક્ષાનું નામ, જિલ્લો, સીટ નંબર અથવા રોલ નંબર અને જન્મ તારીખ જેવી વિગતો દાખલ કરીને આગામી 30 જૂન સુધી પોતાની OMR Sheet મેળવી શકશે.