ખેડૂતો માટે માઠા સમાચાર: અલ નીનોને કારણે વરસાદ ઘટશે, જાણો ગુજરાતમાં ક્યારે થશે ચોમાસાની એન્ટ્રી?

imd monsoon forecast 2026: હવામાન વિભાગની આગાહી: રાજ્યમાં 19 જૂન સુધી હળવો વરસાદ પડશે, સરકારે ખેડૂતોને ઓછું પાણી માગતા પાક વાવવાની આપી સલાહ.

imd weather forecast el nino impact gujarat monsoon rain updates

Source : ai

Show Quick Read

Key points generated by AI, verified by newsroom

• અલ નીનો અસરથી ચોમાસું નબળું, ગુજરાતમાં ઓછો વરસાદ સંભવ.
• સરકારે ૧૯૭ જિલ્લામાં એલર્ટ આપી ખેડૂતોને પાક સલાહ.
• ૧૫ જૂન આસપાસ ગુજરાતમાં ચોમાસું, ૭ દિવસ હળવો વરસાદ.

imd monsoon forecast 2026: ગુજરાતના ખેડૂતો અને નાગરિકો માટે ચોમાસાને લઈને થોડા ચિંતાજનક સમાચાર છે. હવામાન વિભાગની આગાહી મુજબ, આ વર્ષે ચોમાસા પર અલ નીનોની ઘેરી અસર રહેશે, જેના કારણે સામાન્ય કરતા ઓછો વરસાદ પડવાની પૂરી શક્યતા છે. જોકે, એક તરફ 15 જૂનની આસપાસ રાજ્યમાં ચોમાસું બેસી જવાની સંભાવના છે અને 19 જૂન સુધી ઘણા વિસ્તારોમાં હળવાથી મધ્યમ વરસાદ પડી શકે છે. પરંતુ બીજી તરફ, ઓછો વરસાદ પડવાની અને ગરમી વધવાની શક્યતાઓને જોતા સરકારે અત્યારથી જ 197 જિલ્લાઓમાં એલર્ટ જાહેર કરીને આગોતરું આયોજન શરૂ કરી દીધું છે.

અલ નીનોની અસર અને સરકારની તૈયારી

હવામાન વિભાગના જણાવ્યા અનુસાર, હાલમાં ભૂમધ્ય પ્રશાંત મહાસાગર પર અલ નીનોની સ્થિતિ સક્રિય થઈ ચૂકી છે. દક્ષિણ-પશ્ચિમ ચોમાસા દરમિયાન આ સ્થિતિ વધુ મજબૂત બની શકે છે. તેના પરિણામે ચોમાસું નબળું પડશે અને અતિશય ગરમી સહન કરવાનો વારો આવી શકે છે. આ પરિસ્થિતિને પહોંચી વળવા સરકારે દેશના 197 જિલ્લાઓમાં તાત્કાલિક બચાવ કામગીરી અને આકસ્મિક આયોજન માટે કડક સૂચનાઓ આપી છે. સાથે જ, ખેડૂત ભાઈઓને પણ ખાસ સલાહ અપાઈ છે કે તેઓ કઠોળ અને ઓછા પાણીએ તૈયાર થતા પાકોનું જ વાવેતર કરે, જેથી નુકસાનીથી બચી શકાય.

આગામી 7 દિવસ સુધી વરસાદની આગાહી

એક તરફ વરસાદ ખેંચાવવાની ચિંતા છે, તો બીજી તરફ મધ્ય પાકિસ્તાન અને પશ્ચિમ રાજસ્થાન પર એક સાયક્લોનિક સર્ક્યુલેશન સક્રિય થયું છે. આ સિસ્ટમની અસરથી ગુજરાતમાં આગામી 7 દિવસ સુધી હળવાથી મધ્યમ વરસાદની આગાહી છે.

આજે: રાજ્યના 13 જિલ્લાઓ તેમજ સંઘ પ્રદેશ દમણ અને દાદરા નગર હવેલીમાં હળવો વરસાદ પડી શકે છે.

આવતીકાલે: દક્ષિણ ગુજરાતના સુરત, તાપી, ડાંગ, નવસારી અને વલસાડની સાથે દમણ અને દાદરા નગર હવેલીમાં વરસાદની શક્યતા છે.

15 જૂને: છોટાઉદેપુર સહિત દક્ષિણ ગુજરાતના નર્મદા, સુરત, તાપી, ડાંગ, નવસારી અને વલસાડમાં છૂટાછવાયા સ્થળોએ હળવોથી મધ્યમ વરસાદ વરસી શકે છે.

આ પણ વાંચોઃ ગુજરાતમાં વરસાદ ક્યારે આવશે? અંબાલાલ પટેલે કરી નવી આગાહી, આ તારીખ બાદ મેઘમહેરની શક્યતા

ક્યાં પહોંચ્યું છે ચોમાસું?

ચોમાસાની અત્યારની સ્થિતિ વિશે વાત કરીએ તો, મેઘરાજા મહારાષ્ટ્રના મોટાભાગના વિસ્તારોમાં પહોંચી ચૂક્યા છે. હાલ તેલંગાણા, આંધ્રપ્રદેશ અને કર્ણાટકના કેટલાક વિસ્તારોમાં સાનુકૂળ વાતાવરણ વચ્ચે ચોમાસું આગળ વધી રહ્યું છે. જો બધું બરાબર રહ્યું તો 15 જૂનની આસપાસ ગુજરાતમાં પણ ચોમાસાની સત્તાવાર એન્ટ્રી થઈ જશે.

આ પણ વાંચોઃ ગુજરાતમાં ચોમાસાને લઈ મોટી આગાહી: 13 જિલ્લા એલર્ટ, આ તારીખથી ધબધબાટી બોલશે!