ગુજરાતમાં ટ્રાફિક નિયમોમાં મોટો ફેરફાર, નવી ચલણ સિસ્ટમ લાગુ, લાયસન્સ સસ્પેન્ડ સુધીના નવા નિયમો જાણો

ગુજરાતમાં 12 ઓગસ્ટથી ટ્રાફિક ચલણ માટે નવી જનરેશનની ચલણ સિસ્ટમનો અમલ શરૂ કરવામાં આવ્યો છે.

પ્રતિકાત્મક તસવીર

Source : AI

Show Quick Read

Key points generated by AI, verified by newsroom

• ગુજરાતમાં 12 ઓગસ્ટથી નવી ચલણ સિસ્ટમ શરૂ થઈ.
• ચલણ પડકારવા 45 દિવસ, ચુકવણી માટે 30 વધારાના મળશે.
• ચલણ ન ભરાય તો ડ્રાઇવિંગ લાઇસન્સ-RC સેવાઓ અટકશે.
• કોર્ટમાં પડકારવા 50 ટકા ચલણ રકમ ભરવી ફરજિયાત.

ગાંધીનગરથી ટ્રાફિક નિયમો સાથે જોડાયેલા વાહનચાલકો માટે મહત્વપૂર્ણ સમાચાર સામે આવ્યા છે. ગુજરાતમાં 12 ઓગસ્ટથી ટ્રાફિક ચલણ માટે નવી જનરેશનની ચલણ સિસ્ટમનો અમલ શરૂ કરવામાં આવ્યો છે. નવી વ્યવસ્થા હેઠળ ચલણ ભરવા તેમજ તેને પડકારવા માટે અલગ-અલગ સમયમર્યાદા નક્કી કરવામાં આવી છે. નક્કી કરેલી સમયમર્યાદામાં કાર્યવાહી નહીં કરવામાં આવે તો ડ્રાઇવિંગ લાઇસન્સ અને વાહન રજીસ્ટ્રેશન સંબંધિત સેવાઓ પર અસર પડી શકે છે.

ચલણ ભરવા માટે 75 દિવસનો સમય

નવી સિસ્ટમ હેઠળ ચલણ જારી થયાની તારીખથી કુલ 75 દિવસની અંદર તેની રકમ ભરવાની રહેશે. વાહનચાલકને પ્રથમ તબક્કામાં ચલણ સામે વાંધો ઉઠાવવા અથવા તેને પડકારવા માટે 45 દિવસનો સમય આપવામાં આવશે. જો વાહનચાલક 45 દિવસની સમયમર્યાદામાં ચલણ સામે કોઈ પડકાર નહીં કરે તો તે ચલણ સ્વીકાર્ય હોવાનું માનવામાં આવશે. ત્યારબાદ ચલણની રકમ ભરવા માટે વધારાના 30 દિવસનો સમય આપવામાં આવશે.

પડકાર નામંજૂર થાય તો પણ 30 દિવસમાં ચુકવણી

જો વાહનચાલક દ્વારા ચલણ સામે કરવામાં આવેલો પડકાર સક્ષમ સત્તાધિકારી દ્વારા નામંજૂર કરવામાં આવે તો આદેશની તારીખ બાદ ચલણની રકમ ભરવા માટે વધુ 30 દિવસની તક આપવામાં આવશે. નક્કી કરેલી સમયમર્યાદામાં ચલણ ભરવાની કાર્યવાહી નહીં કરવામાં આવે તો વાહનચાલક માટે મુશ્કેલી ઊભી થઈ શકે છે. આવી સ્થિતિમાં ડ્રાઇવિંગ લાઇસન્સ અને વાહનના રજીસ્ટ્રેશન સંબંધિત કેટલીક સેવાઓ અટકાવવામાં આવી શકે છે.

વાહનના પોર્ટલ પર ‘Not to be Transacted’ નોંધ

બાકી ચલણની સ્થિતિમાં સંબંધિત વાહનના પોર્ટલ પર ‘Not to be Transacted’ નોંધ કરવામાં આવી શકે છે. એટલે કે બાકી ચલણનું નિરાકરણ ન આવે ત્યાં સુધી વાહન સંબંધિત કેટલીક પ્રક્રિયાઓ પર રોક લાગી શકે છે. જો વાહનચાલક ચલણને કોર્ટમાં પડકારવા માંગે છે, તો કોર્ટમાં જતાં પહેલાં ચલણની 50 ટકા રકમ ભરવી પડશે. ત્યારબાદ જ ચલણ સામે કોર્ટમાં કાયદેસરની કાર્યવાહી કરી શકાશે.

ગંભીર કેસમાં વાહનને પોલીસ દ્વારા સીધું ડિટેઇન

વાહનના પોર્ટલ પર ‘Not to be Transacted’ નોંધ કરવામાં આવી શકે જેથી વાહનની લે-વેચ, નામ ટ્રાન્સફર કે RTO સંબંધિત કોઈ પણ કામકાજ અટકી જશે. ખૂબ જ ગંભીર કેસમાં અથવા લાંબા સમય સુધી દંડ બાકી રાખનાર વાહનચાલકોના વાહનને પોલીસ દ્વારા સીધું ડિટેઇન કરી શકાશે.