Gujarat Rain Forecast : આજે આ 2 જિલ્લામાં અતિભારે વરસાદની આગાહી, રેડ એલર્ટ જાહેર
Gujarat Rain Forecast : આજે દક્ષિણ ગુજરાતમાં ભારે વરસાદનું અનુમાન છે. વલસાડ અને નવસારીમાં અતિભારે વરસાદની શક્યતાને જોતા રેડ એલર્ટ જાહેર કરવામાં આવ્યું છે.
Gujarat Rain Forecast : ગુજરાતમાં ફરી એકવાર મેઘરાજા મહેરબાન થશે. અપર એર સાયક્લોનિક સર્ક્યુલેશન અને ટ્રફ લાઈન સક્રિય થવાને કારણે હવામાન વિભાગે આગામી 2 દિવસ સુધી રાજ્યના મોટાભાગના જિલ્લાઓમાં અત્યંત ભારે વરસાદની આગાહી કરી છે. વરસાદના રૌદ્ર સ્વરૂપની શક્યતાને જોતા દક્ષિણ ગુજરાતના બંદરો પર 3 નંબરનું સિગ્નલ લગાવી દેવામાં આવ્યું છે. આ સાથે જ દરિયામાં ભારે કરંટ જોવા મળી રહ્યો હોવાથી માછીમારોને પણ આગામી 3 દિવસ સુધી દરિયો ન ખેડવા માટે કડક સૂચના આપી દેવામાં આવી છે. આજે એટલે કે 22 જુલાઈના રોજ પણ અનેક જિલ્લાઓમાં મેઘમહેર થવાની પૂરી સંભાવના છે, જેના માટે વિસ્તારો પ્રમાણે એલર્ટ જાહેર કરાયા છે.
હવામાન વિભાગની આજની આગાહી પર નજર કરીએ તો, આજે દક્ષિણ ગુજરાતમાં વરસાદનું જોર વધુ રહેશે. નવસારી અને વલસાડ જિલ્લા માટે અત્યંત ભારે વરસાદની આગાહી સાથે 'રેડ એલર્ટ' જાહેર કરાયું છે. જ્યારે સુરત, તાપી અને ડાંગ માટે હવામાન વિભાગે 'ઓરેન્જ એલર્ટ' આપ્યું છે. આ સિવાય રાજ્યના અન્ય 10 જિલ્લાઓ એવા છે જ્યાં આજે વરસાદને લઈને 'યલો એલર્ટ' આપવામાં આવ્યું છે.
આજે આ જિલ્લામાં રેડ એલર્ટ
22 જુલાઈએ એટલે કે આજે દક્ષિણ ગુજરાતના નવસારી અને વલસાડ જિલ્લાની સાથે સાથે સંઘ પ્રદેશ દમણ અને દાદરાનગર હવેલીમાં ભારે વરસાદની સંભાવના છે. આ વિસ્તારોમાં જળબંબાકારની સ્થિતિ સર્જાઈ શકે છે, તેથી હવામાન વિભાગે અહીં 'રેડ એલર્ટ' જાહેર કર્યું છે.
આજે આ જિલ્લામાં ઓરેન્જ એલર્ટ
મધ્ય અને દક્ષિણ ગુજરાતના અન્ય વિસ્તારોમાં પણ વરસાદનું જોર જોવા મળશે. 22 જુલાઈના રોજ અરવલ્લી, મહીસાગર, પંચમહાલ, દાહોદ અને છોટા ઉદેપુરની સાથે દક્ષિણ ગુજરાતના નર્મદા, સુરત, તાપી અને ડાંગ જિલ્લામાં ભારે વરસાદ પડી શકે છે. આ જિલ્લાઓ માટે હવામાન વિભાગે 'ઓરેન્જ એલર્ટ' જાહેર કર્યું છે.
આ જિલ્લામાં આજે વરસાદનું યલો એલર્ટ
અમદાવાદ અને ગાંધીનગર સહિતના કેટલાક જિલ્લાઓમાં પણ મધ્યમ વરસાદ થવાની શક્યતા છે. આજે અમદાવાદ, ગાંધીનગર, સાબરકાંઠા, આણંદ, ખેડા, વડોદરા અને ભરૂચ જિલ્લા માટે 'યલો એલર્ટ' જાહેર કરવામાં આવ્યું છે. આમ, આગામી બે દિવસ રાજ્યમાં સાર્વત્રિક વરસાદની શક્યતા છે.
ટોપ સ્ટોરી
ટ્રેન્ડિંગ સમાચાર
