Gujarat Rain: આગામી 3 કલાક રાજ્યના આ જિલ્લાઓમાં ગાજવીજ સાથે વરસાદની આગાહી, હવામાન નાઉ કાસ્ટ
હવામાન વિભાગે આગામી ત્રણ કલાક માટે નાઉ કાસ્ટ જાહેર કર્યું છે. જેમાં રાજ્યના 18 જિલ્લાઓમાં ઓરેન્જ એલર્ટ આપવામાં આવ્યું છે.
- હવામાન વિભાગે ગુજરાતના 18 જિલ્લામાં ઓરેન્જ એલર્ટ જાહેર કર્યું.
- વધુ 10 જિલ્લામાં આગામી ત્રણ કલાક હળવા વરસાદની શક્યતા છે.
- રાજ્યમાં આગામી 7 દિવસ હળવાથી મધ્યમ વરસાદની સંભાવના છે.
- ચોમાસામાં અત્યાર સુધી સરેરાશ કરતાં 9 ટકા વધુ વરસાદ નોંધાયો.
ગુજરાતમાં ફરી એકવાર વરસાદી માહોલ જામ્યો છે. હવામાન વિભાગે આગામી ત્રણ કલાક માટે નાઉ કાસ્ટ જાહેર કર્યું છે. જેમાં રાજ્યના 18 જિલ્લાઓમાં ઓરેન્જ એલર્ટ આપવામાં આવ્યું છે. જ્યારે 10 જિલ્લાઓમાં યેલો એલર્ટ જાહેર કરવામાં આવ્યું છે. હવામાન વિભાગના અનુમાન મુજબ બપોરે 1 વાગ્યાથી સાંજે 4 વાગ્યા સુધી અનેક વિસ્તારોમાં વરસાદની શક્યતા છે.
18 જિલ્લાઓમાં ઓરેન્જ એલર્ટ
હવામાન વિભાગની આગાહી મુજબ અમદાવાદ, ગાંધીનગર, ખેડા, બોટાદ, સાબરકાંઠા, બનાસકાંઠા, અરવલ્લી, મહીસાગર, દાહોદ, પંચમહાલ, છોટાઉદેપુર, નર્મદા, તાપી, ડાંગ, નવસારી, વલસાડ, દમણ અને દાદરા-નગર હવેલીમાં ગાજવીજ સાથે મધ્યમ વરસાદ પડી શકે છે. અમદાવાદ અને ગાંધીનગર સહિત ઉત્તર ગુજરાત, મધ્ય ગુજરાત તથા દક્ષિણ ગુજરાતના કેટલાક વિસ્તારોમાં આગામી ત્રણ કલાક દરમિયાન વરસાદી માહોલ રહેવાની આગાહી છે. કેટલાક સ્થળોએ ગાજવીજ સાથે વરસાદ પડી શકે છે.
10 જિલ્લાઓમાં યેલો એલર્ટ
રાજ્યના અન્ય 10 જિલ્લાઓમાં યેલો એલર્ટ જાહેર કરવામાં આવ્યું છે. રાજકોટ, સુરેન્દ્રનગર, અમરેલી, ભાવનગર, વડોદરા, આણંદ, મહેસાણા, પાટણ, ભરૂચ અને સુરતમાં હળવા વરસાદની આગાહી કરવામાં આવી છે. હવામાન વિભાગના નાઉ કાસ્ટ મુજબ બપોરે 1 વાગ્યાથી સાંજે 4 વાગ્યા સુધી રાજ્યના વિવિધ વિસ્તારોમાં વરસાદની સંભાવના છે. ખાસ કરીને ઓરેન્જ એલર્ટ ધરાવતા જિલ્લાઓમાં ગાજવીજ સાથે મધ્યમ વરસાદની શક્યતા હોવાથી સ્થાનિક તંત્ર અને લોકોને સાવચેતી રાખવાની સલાહ આપવામાં આવી છે.
આગામી 7 દિવસ સુધી રાજ્યભરમાં વરસાદની સંભાવના
ગુજરાત પર લો પ્રેશર, મોનસૂન ટ્રફ, વેસ્ટર્ન ડિસ્ટર્બન્સ અને સાયક્લોનિક સર્ક્યુલેશન સક્રિય થયા છે. આ સિસ્ટમની અસરને કારણે આગામી 7 દિવસ સુધી રાજ્યભરમાં હળવાથી મધ્યમ વરસાદ પડવાની સંભાવના છે.
આ પણ વાંચો-IMD Rain Alerts: આગામી 5 દિવસ દેશના આ રાજ્યોમાં ભારે વરસાદનું એલર્ટ, જાણો હવામાન અપડેટ
ચોમાસાની આ સિઝનમાં ગુજરાતમાં વરસાદના આંકડા પર નજર કરીએ તો સ્થિતિ એકંદરે ઘણી સારી રહી છે. હવામાન વિભાગના વૈજ્ઞાનિક પ્રદીપ શર્માના જણાવ્યા અનુસાર: અત્યાર સુધીમાં રાજ્યમાં સરેરાશ 491.2 mm (એટલે કે આશરે 19.64 ઈંચ) વરસાદ ખાબકી ચૂક્યો છે. સામાન્ય રીતે આ સમયગાળા દરમિયાન રાજ્યમાં 450.5 mm વરસાદ થવો જોઈએ. આ આંકડાઓ સ્પષ્ટ કરે છે કે ગુજરાતમાં અત્યાર સુધીમાં સામાન્ય કરતા 9 ટકા વધુ વરસાદ નોંધાયો છે. કચ્છ અને સૌરાષ્ટ્રના વિસ્તારો હજુ પણ સારા વરસાદની રાહ જોઈ રહ્યા છે. આંકડા મુજબ, સૌરાષ્ટ્ર અને કચ્છ પંથકમાં સિઝનનો સરેરાશ વરસાદ હજુ પણ 13 ટકા જેટલો ઓછો નોંધાયો છે.
ટોપ સ્ટોરી
ટ્રેન્ડિંગ સમાચાર
