ગુજરાતમાં ફરી ચોમાસા જેવો માહોલ! આવતીકાલે રાજ્યના 9 જિલ્લામાં વરસાદની આગાહી, જુઓ લેટેસ્ટ વેધર અપડેટ
Gujarat Weather Alert: હવામાન વિભાગની આગાહી મુજબ 16 થી 19 ઓક્ટોબર દરમિયાન દક્ષિણ ગુજરાતમાં થન્ડર સ્ટોર્મ સાથે વરસાદની સંભાવના; સૌરાષ્ટ્રમાં 17 ઓક્ટોબરથી વરસાદી માહોલ જામશે.
Gujarat Rain Alert: રાજ્યમાં ચોમાસું વિદાયની તૈયારીમાં હોય તેવા માહોલ વચ્ચે હવામાન વિભાગે આગામી દિવસોમાં કેટલાક વિસ્તારોમાં સામાન્ય વરસાદની આગાહી કરી છે. 16 ઓક્ટોબરથી લઈને 19 ઓક્ટોબર દરમિયાન દક્ષિણ ગુજરાત અને સૌરાષ્ટ્રના ભાગોમાં હળવા વરસાદી ઝાપટાં પડવાની શક્યતા છે.
આવતીકાલ (16 ઓક્ટોબર) માટેની આગાહી: હવામાન વિભાગના જણાવ્યા અનુસાર, આવતીકાલે એટલે કે 16 ઓક્ટોબરના રોજ દક્ષિણ ગુજરાતના કેટલાક જિલ્લાઓમાં વરસાદની સંભાવના છે. આ આગાહી મુજબ નવસારી, તાપી, ડાંગ, વલસાડ તેમજ કેન્દ્રશાસિત પ્રદેશો દમણ અને દાદરાનગર હવેલીમાં સામાન્ય વરસાદ અથવા થન્ડર સ્ટોર્મ એક્ટિવિટી થવાની શક્યતા છે.
આગામી 17 થી 19 ઓક્ટોબર દરમિયાન દક્ષિણ ગુજરાતમાં વરસાદનું જોર યથાવત રહી શકે છે. આ ઉપરાંત, 17 ઓક્ટોબરથી સૌરાષ્ટ્રના દરિયાકાંઠાના ભાગોમાં પણ વરસાદી માહોલ જોવા મળશે. ગીર સોમનાથ, અમરેલી અને ભાવનગરમાં 17 ઓક્ટોબરના રોજ વરસાદની આગાહી કરવામાં આવી છે. હવામાન વિભાગે આ સમગ્ર ગાળા દરમિયાન થન્ડર સ્ટોર્મ એક્ટિવિટી એટલે કે વીજળીના કડાકા-ભડાકા સાથે વરસાદ થવાની શક્યતા પણ વ્યક્ત કરી છે.
વરસાદની આગાહી વચ્ચે રાજ્યના તાપમાનમાં હાલ કોઈ મોટો ફેરફાર થવાની સંભાવના નથી. આગામી 7 દિવસ સુધી મહત્તમ તાપમાન યથાવત રહેશે. જોકે, લઘુતમ તાપમાન અંગે આગાહી છે કે આગામી બે દિવસ સુધી તે યથાવત રહ્યા બાદ, ત્યારબાદના બે દિવસમાં તેમાં 2 થી 3 ડિગ્રીનો વધારો થઈ શકે છે, જેના કારણે સવારે અને રાત્રે પણ ગરમીનો અનુભવ વધશે. ખેડૂતોને આ વરસાદને ધ્યાનમાં રાખીને જરૂરી તકેદારી રાખવા સૂચન કરવામાં આવ્યું છે.
અંબાલાલ પટેલની આગાહી
રાજ્યમાં હવામાનની સ્થિતિ અને આગાહીઓ માટે જાણીતા નિષ્ણાંત અંબાલાલ પટેલે અરબ સાગરમાં આગામી સમયમાં વધુ એક વાવાઝોડું સર્જાવા અંગે મોટું અનુમાન વ્યક્ત કર્યું છે, જેના કારણે ગુજરાતના વાતાવરણમાં નોંધપાત્ર પલટો આવવાની સંભાવના છે.
અંબાલાલ પટેલના અનુમાન મુજબ, આગામી 26 ઓક્ટોબરથી લઈને નવેમ્બરની શરૂઆતમાં અરબ સાગરમાં વધુ એક શક્તિશાળી વાવાઝોડું (પ્રબળ વાવાઝોડું) બનવાની શક્યતા છે. તેમણે જણાવ્યું છે કે અરબ સાગરમાં 18થી 21 ઓક્ટોબર સુધીમાં દરિયાઈ હલચલ શરૂ થઈ જશે, જે હલચલ અંતે વાવાઝોડાનું સ્વરૂપ ધારણ કરી શકે છે.
આ સંભવિત વાવાઝોડાની અસરને કારણે ગુજરાતના વાતાવરણમાં મોટો પલટો જોવા મળી શકે છે. એટલું જ નહીં, આ વાવાઝોડું દક્ષિણ ભારતના રાજ્યોમાં પણ ભારે વરસાદ લાવવાની ક્ષમતા ધરાવે છે, તેવી આગાહી પણ અંબાલાલ પટેલે વ્યક્ત કરી છે.
વરસાદી માહોલ બાદ ગુજરાતમાં ઠંડીની શરૂઆત ક્યારે થશે તે અંગે પણ અંબાલાલ પટેલે પોતાનું અનુમાન જાહેર કર્યું છે. તેમના મતે, ડિસેમ્બર મહિનાની શરૂઆતથી જ રાજ્યમાં ઠંડા પવનો ફૂંકાવાની શરૂઆત થઈ શકે છે, જેના કારણે લોકોને ઠંડકનો અનુભવ થશે.
ટોપ સ્ટોરી
ટ્રેન્ડિંગ સમાચાર
