Gujarat Rain: અમદાવાદ સહિત 14 જિલ્લામાં આગામી 2 કલાક વરસાદની આગાહી, જાણો ક્યાં વરસશે
રાજ્યમાં અચાનક હવામાનમાં પલટો આવ્યો છે. હવામાન વિભાગે આગામી 2 કલાકમાં રાજ્યના 14 જિલ્લામાં હળવા વરસાદની આગાહી સાથે નાઉકાસ્ટ જાહેર કર્યું છે.
- રાજ્યના ૧૪ જિલ્લામાં આગામી 2 કલાક વરસાદની આગાહી.
- સાબરકાંઠા-મહીસાગરમાં વાદળછાયું વાતાવરણ.
- ગાંધીનગરના વિસ્તારોમાં વરસાદ પડ્યો, રાજ્યમાં વાતાવરણ બદલાયું.
અમદાવાદ : રાજ્યમાં અચાનક હવામાનમાં પલટો આવ્યો છે. હવામાન વિભાગે આગામી 2 કલાકમાં રાજ્યના 14 જિલ્લામાં હળવા વરસાદની આગાહી સાથે નાઉકાસ્ટ જાહેર કર્યું છે. અમદાવાદ, ગાંધીનગર, મહેસાણા, પંચમહાલ, નવસારી અને વલસાડ સહિતના જિલ્લાઓમાં હળવો વરસાદ પડી શકે છે. બીજી તરફ, સાબરકાંઠા અને મહીસાગર જિલ્લામાં વાદળછાયા વાતાવરણને કારણે ખેડૂતોની ચિંતામાં વધારો થયો છે. ગાંધીનગર જિલ્લાના કેટલાક વિસ્તારોમાં વરસાદ પણ નોંધાયો છે.
હવામાન વિભાગે જાહેર કર્યું નાઉકાસ્ટ
હવામાન વિભાગની આગાહી મુજબ, આગામી 2 કલાક દરમિયાન રાજ્યના વિવિધ વિસ્તારોમાં હળવો વરસાદ થવાની શક્યતા છે. અમદાવાદ, ગાંધીનગર, મહેસાણા, પંચમહાલ, નવસારી અને વલસાડ સહિતના જિલ્લાઓમાં વરસાદ પડી શકે છે. આ ઉપરાંત સાબરકાંઠા, અરવલ્લી, દાહોદ અને છોટાઉદેપુર સહિતના વિસ્તારોમાં પણ વરસાદની સંભાવના વ્યક્ત કરવામાં આવી છે. હવામાનમાં આવેલા આ ફેરફારને કારણે ખેડૂતો સહિત નાગરિકોએ હવામાનની સ્થિતિ પર નજર રાખવી જરૂરી છે.
સાબરકાંઠામાં વાતાવરણમાં પલટો
સાબરકાંઠા જિલ્લામાં અચાનક વાતાવરણમાં પલટો આવ્યો છે. જિલ્લાના વિવિધ વિસ્તારોમાં વાદળછાયું વાતાવરણ છવાતાં ખેડૂતોની ચિંતામાં વધારો થયો છે. હાલમાં રવિ પાકોના વાવેતરની મોસમ ચાલી રહી છે. આવા સમયે વાતાવરણમાં આવેલા ફેરફારને કારણે ખેડૂતોની મૂંઝવણ વધી છે. ખાસ કરીને બટાકા, ઘઉં અને ચણાના વાવેતર સમયે બદલાયેલા હવામાનને કારણે ખેડૂતો ચિંતિત બન્યા છે. જિલ્લાના તલોદ, પ્રાંતિજ, હિંમતનગર અને ઇડર સહિતના ગ્રામ્ય વિસ્તારોમાં વાતાવરણમાં પલટો જોવા મળ્યો છે.
મહીસાગર જિલ્લામાં આકાશમાં વાદળો ઘેરાયાં
મહીસાગર જિલ્લામાં પણ બપોર બાદ વાતાવરણમાં અચાનક ફેરફાર જોવા મળ્યો છે. લુણાવાડા સહિત જિલ્લાના અન્ય તાલુકાઓમાં વાદળછાયું વાતાવરણ છવાયું છે. આકાશમાં વાદળો ઘેરાતાં હવામાન વિભાગની આગાહી મુજબ જિલ્લામાં વાતાવરણમાં પલટો જોવા મળી રહ્યો છે. વરસાદની શક્યતાને ધ્યાનમાં રાખીને ખેડૂતોમાં પણ ચિંતા જોવા મળી રહી છે.
આ પણ વાંચો- Cyclone Arnab: અર્નબ વાવાઝોડાનો કહેર, ઓડિશાના 300 ગામડા સંપર્કવિહોણા, અનેક ટ્રેન રદ્દ
ગાંધીનગરના કેટલાક વિસ્તારોમાં વરસાદ
ગાંધીનગર જિલ્લાના કેટલાક વિસ્તારોમાં વરસાદ પડ્યો છે. રાંધેજા અને તેની આસપાસના વિસ્તારોમાં વરસાદ નોંધાયો છે. આ ઉપરાંત લોદરા અને માણસા સહિતના વિસ્તારોમાં પણ વરસાદી માહોલ જોવા મળ્યો છે. રાજ્યના વિવિધ વિસ્તારોમાં વાતાવરણમાં આવેલા ફેરફાર વચ્ચે હવામાન વિભાગની આગામી આગાહી પર સૌની નજર છે.
Before You Go
ચોરવાડમાં રિલાયન્સ પરિવારે યોજ્યો ભવ્ય કાર્યક્રમ, જિયોના 10 વર્ષની સફળતાની ભવ્ય ઉજવણી
ટોપ સ્ટોરી
ટ્રેન્ડિંગ સમાચાર
