Gujarat Rain: વીજળીના કડાકા ભડાકા સાથે આજે તૂટી પડશે વરસાદ, લેટેસ્ટ આગાહી જાણી લો
હવામાન વિભાગ દ્વારા આગામી સાત દિવસ સુધી વરસાદને લઈ આગાહી કરવામાં આવી છે. રથયાત્રાના દિવસે હળવાથી માધ્યમથી વરસાદની આગાહી હવામાન વિભાગે કરી છે.
અમદાવાદ : હવામાન વિભાગ દ્વારા આગામી સાત દિવસ સુધી વરસાદને લઈ આગાહી કરવામાં આવી છે. રથયાત્રાના દિવસે હળવાથી માધ્યમથી વરસાદની આગાહી હવામાન વિભાગે કરી છે. આગામી 5 દિવસ ઠંડર સ્ટ્રોમની વોર્નિંગ આપવામાં આવી છે. 28 જૂન સુધી 30થી 40 કિલોમીટર પ્રતિ કલાકની ઝડપે ઠંડર સ્ટ્રોમની વોર્નિંગ આપવામાં આવી છે. હવામાન વિભાગે આજે રાજ્યમાં ભારે વરસાદની આગાહી કરી છે. આજે રાજ્યના અનેક જિલ્લાઓમાં ભારે પવન અને વીજળીના કડાકા સાથે ધોધમાર વરસાદ તૂટી પડશે.
આજે આ જિલ્લાઓમાં ભારે વરસાદની આગાહી
હવામાન વિભાગની આગાહી મુજબ, આજે વડોદરા, ભરૂચ, સુરત, નવસારી, વલસાડ, દમણ, દાહોદ, મહીસાગર અને દાદરાનગર હવેલીમાં ભારેથી અતિભારે વરસાદની આગાહી સાથે રેડ એલર્ટ આપવામાં આવ્યું છે.
આ સિવાય સાબરકાંઠા, ગાંધીનગર, અરવલ્લી, ખેડા, આણંદ, પંચમહાલ, છોટાઉદેપુર અને ડાંગમાં ઓરેન્જ એલર્ટ સાથે વરસાદની આગાહી હવામાન વિભાગ દ્વારા કરાઈ છે.
જ્યારે બનાસકાંઠા, પાટણ, મહેસાણા, અમદાવાદમાં આજે ભારે વરસાદની આગાહી હવામાન વિભાગે કરી છે. રથયાત્રાના દિવસે પણ રાજ્યમાં વરસાદી માહોલ રહેશે. હવામાન વિભાગના જણાવ્યા મુજબ આગાહી સાત દિવસ સુધી રાજ્યમાં વરસાદી માહોલ યથાવત રહેશે. કેટલાક જિલ્લાઓમાં ધીમીધારે વરસાદ વરસશે તો કેટલાક જિલ્લાઓમાં અનરાધાર વરસાદ વરસી શકે છે. સૌરાષ્ટ અને કચ્છમાં ભારેથી અતિ ભારે વરસાદની આગાહી કરવામાં આવી છે.
અમદાવાદમાં ભારે વરસાદની આગાહી
અમરેલી, ભાવનગર, સુરેન્દ્નગર, રાજકોટ,જૂનાગઢ, ગીર સોમનાથ અને દિવમાં પણ ભારે વરસાદની આગાહી કરાઈ છે. માછીમારોને આજે દરિયો ન ખેડવા સૂચના આપવામાં આવી છે. દરિયાકાંઠે 40 થી 50 કિલોમીટરની ઝડપે પવન ફૂંકાશે. અમદાવાદમાં પણ આજે ઠંડર સ્ટ્રોમ સાથે ભારે વરસાદની આગાહી છે.
છેલ્લા 24 કલાકમાં રાજ્યના 170 તાલુકામાં વરસાદ
રાજ્યમાં છેલ્લા બે દિવસથી વરસાદી માહોલ જામ્યો છે. છેલ્લા 24 કલાકમાં રાજ્યના 170 તાલુકાઓમાં વરસાદ વરસ્યો છે. સૌથી વધુ સુરત શહેરમાં 13.6 ઈંચ વરસાદ ખાબક્યો છે, આ ઉપરાંત સુરત જિલ્લામાં પણ મૂશળધાર વરસાદ વરસ્યો છે. સુરતમાં છેલ્લા 24 કલાકમાં કામરેજમાં 10.7 ઈંચ વરસાદ પડ્યો છે. પલસાણામાં 8.2 ઇંચ વરસાદ, બારડોલીમાં 6.6 ઈંચ વરસાદ, ઓલપાડમાં 5 ઈંચ વરસાદ, ચૌર્યાસીમાં 4.3 ઈંચ વરસાદ, સુરત જિલ્લાના માંડવીમાં 3.5 ઈંચ વરસાદ પડ્યો છે. આ ઉપરાંત ભરૂચ અને નવસારીમાં 3-3 ઈંચ વરસાદ અને તાપી જિલ્લાના વ્યારામાં 3.7 ઈંચ વરસાદ ખાબક્યો છે. વરસાદને કારણે સુરત શહેરનો કોઈ પણ વિસ્તાર એવો નહોતો કે જ્યાં પાણી ના ભરાયું હોય. સુરતના દરેક વિસ્તારમાં પાણીનો ભરાવો થયો હતો. અતિભારે વરસાદ વરસતા જિલ્લા કલેકટરે શાળાઓમાં રજા જાહેર કરી હતી.
ટોપ સ્ટોરી
ટ્રેન્ડિંગ સમાચાર
