Dahod Rain: ધોધમાર વરસાદથી દાહોદ શહેરમાં જળબંબાકાર, નીચાણવાળા વિસ્તારોમાં ભરાયા પાણી

હવામાન વિભાગની આગાહી વચ્ચે દાહોદ જિલ્લામાં ધોધમાર વરસાદ વરસી રહ્યો છે. ધોધમાર વરસાદથી દાહોદ શહેરમાં જળબંબાકારની સ્થિતિ સર્જાઈ છે.

દાહોદ જિલ્લામાં વરસાદ

Source : તસવીર- ABP અસ્મિતા

દાહોદ: હવામાન વિભાગની આગાહી વચ્ચે દાહોદ જિલ્લામાં ધોધમાર વરસાદ વરસી રહ્યો છે. ધોધમાર વરસાદથી દાહોદ શહેરમાં જળબંબાકારની સ્થિતિ સર્જાઈ છે. દાહોદ શહેરમાં મોડી રાત્રિથી શરુ થયેલા વરસાદથી જળબંબાકારની સ્થિતિનું નિર્માણ થયુ છે. શહેરમાં અનેક ઠેકાણે નીચાણવાળા વિસ્તારમાં પાણી ભરાયા છે.  કોમ્પલેક્ષમાં પાણી ભરાવાની સ્થિતિનું નિર્માણ થયુ છે.

દાહોદ જિલ્લામાં મોડી રાત્રિના વરસાદથી ડીપનાળું ધોવાયુ હતું.  જિલ્લાના સંજેલી તાલુકામાં મોડી રાત્રિથી ધોધમાર વરસાદ વરસી રહ્યો છે. ભારે વરસાદના કારણે નદી-નાળાઓ બે કાંઠે થતા હિરોલા ખાતે નદી પરનું ડીપનાળું ધોવાયું છે. જેથી સ્થાનિકોને અવર જવર કરવામાં મુશ્કેલી પડી રહી છે. 
 
ભારે પવન સાથેના વરસાદથી દાહોદમાં અનેક ઠેકાણે નુકસાનીના દ્રશ્યો સામે આવ્યા છે.  લીમડીમા ગોધરા રોડ પર વર્ષો જુનુ મહાકાય વડનુ વૃક્ષ અને  વીજ પોલ ધરાશાયી થયો હતો.  જેના કારણે લીમડી-ગોધરા રોડ તરફનો રસ્તો બંધ કરાયો હતો. આ સમગ્ર ઘટના સીસીટીવીમાં કેદ થઈ છે.   

રાજ્યમાં ભારે વરસાદની આગાહી

મધ્યપ્રદેશ તરફ સર્જાયેલી વરસાદી સિસ્ટમ  ધીરે ધીરે રાજ્ય પર આવતા ફરી મોટાભાગના વિસ્તારમાં વરસાદી માહોલ જામ્યો છે.  હવામાન વિભાગે (Meteorological Department) આગામી 2 દિવસ સાર્વત્રિક મધ્યમથી હળવા વરસાદનું અનુમાન વ્યક્ત કર્યું છે. આજે રાજ્યના 12 જિલ્લામાં ભારેથી અતિભારે વરસાદની (heavy rain) હવામાન વિભાગે   (Meteorological Department) આગાહી કરી છે.  

સૌરાષ્ટ્રના 6  મધ્ય અને દક્ષિણ ગુજરાતના 6 જિલ્લામાં ભારેથી અતિભારે વરસાદનું ઓરેન્જ એલર્ટ જાહેર આપવામાં આવ્યું છે.   16 જિલ્લામાં ભારે વરસાદનું યલો એલર્ટ જાહેર કરવામાં આવ્યું છે.

સૌરાષ્ટ્રની વાત કરીએ તો હવામાન વિભાગની  આગાહી મુજબ  મોરબી, સુરેન્દ્રનગર, રાજકોટ, બોટાદ, અમરેલી અને ભાવનગરમાં આજે  ભારેથી અતિભારે વરસાદની આગાહી છે.   દ્વારકા, જામનગર, પોરબંદર, જૂનાગઢ અને ગીર સોમનાથમાં પણ આજે ભારે વરસાદનું અનુમાન છે.

હવામાન વિભાગની આગાહી મુજબ મધ્યગુજરાતના આણંદ, વડોદરા, છોટા ઉદેપુરમાં આજે ભારેથી અતિભારે વરસાદ વરસી શકે છે.   ખેડા, પંચમહાલ, દાહોદમાં ભારે વરસાદની આગાહીને પગલે હવામાન વિભાગે યલો એલર્ટ જાહેર કર્યુ છે.  દક્ષિણ ગુજરાતના સુરત, ભરૂચ અને નર્મદાના છુટાછવાયા સ્થળોએ આજે ભારેથી અતિભારે વરસાદની આગાહી કરવામાં આવી છે.   તાપી, ડાંગ,નવસારી, અને વલસાડમાં પણ ભારે વરસાદની આગાહીને પગલે યલો એલર્ટ જાહેર  કરવામાં આવ્યું છે.