Gujarat Rain: ખેલૈયાઓના રંગમાં મેઘરાજા ભંગ પાડશે, 30 સપ્ટેમ્બર સુધી ભારે વરસાદની આગાહી

નવરાત્રિમાં વરસાદને લઈ હવામાન વિભાગ દ્વારા આગાહી કરવામાં આવી છે. આગાહી અનુસાર ખેલૈયાઓના રંગમાં મેઘરાજા ભંગ પાડશે.

પ્રતિકાત્મક તસવીર

Source : તસવીર સોશિયલ મીડિયા

અમદાવાદ: નવરાત્રિમાં વરસાદને લઈ હવામાન વિભાગ દ્વારા આગાહી કરવામાં આવી છે. આગાહી અનુસાર ખેલૈયાઓના રંગમાં મેઘરાજા ભંગ પાડશે.  ગરબા ગ્રાઉન્ડો  પાણીથી તરબોળ થશે.  કાલથી 30 સપ્ટેમ્બર સુધી ભારે વરસાદની આગાહી કરવામાં આવી છે.  નવરાત્રિમાં ગરબાની રમઝટ બોલાવતા ખેલૈયાઓ માટે હવામાન વિભાગે માઠા સમાચાર આપ્યા છે.  બંગાળની ખાડીમાં વોકમાર્ક લો પ્રેશર સક્રિય થતા આગામી સાત દિવસ રાજ્યમાં હળવાથી મધ્યમ વરસાદની હવામાન વિભાગે આગાહી વ્યક્ત કરી છે. એટલુ જ નહીં કાલથી 30 સપ્ટેમ્બર સુધી કેટલાક જિલ્લા ભારે વરસાદ  વરસી શકે છે.

30થી 40 કિલોમીટર પ્રતિ કલાકની ઝડપે પવન ફુંકાશે

દક્ષિણ ગુજરાત, મધ્ય ગુજરાત અને સૌરાષ્ટ્રના જિલ્લામાં 30 સપ્ટેમ્બર સુધી ધોધમાર વરસાદની હવામાન વિભાગે આગાહી વ્યક્ત કરી છે. આ સાથે જ 30થી 40 કિલોમીટર પ્રતિ કલાકની ઝડપે પવન ફુંકાવાની હવામાન વિભાગે શક્યતા વ્યક્ત કરી છે.  આવતીકાલે દક્ષિણ ગુજરાતના નર્મદા, તાપી, ડાંગ, નવસારી, વલસાડમાં ભારે વરસાદની શક્યતાને પગલે યલો એલર્ટ જાહેર કરવામાં આવ્યું છે.  સંઘ પ્રદેશ દમણ અને દાદરાનગર હવેલીમાં પણ યલો એલર્ટ આપવામાં આવ્યું છે. 

અનેક જિલ્લામાં ભારે વરસાદનું યલો એલર્ટ
 
જ્યારે 28 સપ્ટેમ્બરે સૌરાષ્ટ્રના ગીર સોમનાથ, અમરેલી, ભાવનગર, રાજકોટ, બોટાદ અને સુરેન્દ્રનગરમાં વરસાદનું યલો એલર્ટ આપવામાં આવ્યું છે. જ્યારે અમદાવાદ અને ગાંધીનગરની સાથે ઉત્તર ગુજરાતના સાબરકાંઠા અને અરવલ્લીમાં ભારે વરસાદનું યલો એલર્ટ આપવામાં આવ્યું છે.  મધ્ય ગુજરાતના આણંદ, ખેડા, મહીસાગર, વડોદરા, પંચમહાલ, દાહોદ અને છોટા ઉદેપુરમાં યલો એલર્ટ જાહેર કરાયું છે. 

જ્યારે દક્ષિણ ગુજરાતના ભરૂચ, નર્મદા, સુરત, તાપી, નવસારી, ડાંગ અને વલસાડમાં પણ ગાજવીજ સાથે ભારે વરસાદ વરસી શકે છે. આ તરફ સંઘ પ્રદેશ દીવ, દમણ અને દાદરાનગર હવેલીમાં પણ વરસાદનું હવામાન વિભાગે યલો એલર્ટ જાહેર કર્યું છે.  

રાજ્યમાં સરેરાશ 111.18 ટકા વરસાદ વરસ્યો

વરસાદની આગાહીની વચ્ચે ગુજરાતના મોટા ભાગના જિલ્લામાંથી ચોમાસાએ વિદાય લીધી છે.  અમદાવાદ, વલ્લભ વિદ્યાનગર અને સૌરાષ્ટ્ર-કચ્છના વિવિધ જિલ્લામાંથી દક્ષિણ પશ્ચિમના ચોમાસાએ  વિદાય લીધી છે.   આ વખતે ચોમાસાની સિઝનમાં રાજ્યમાં સરેરાશ 111.18 ટકા વરસાદ વરસ્યો છે.

રાજ્યમાં આ વર્ષે પણ ચોમાસું સારુ રહ્યું છે.  સ્ટેટ ઇમરજન્સી ઓપરેશન સેન્ટર-SEOC ગાંધીનગર દ્વારા જણાવાયું છે કે, રાજ્યમાં ચાલુ ચોમાસું સિઝનમાં સાર્વત્રિક વરસાદના પરિણામે 18 સપ્ટેમ્બર 2025ની સ્થિતિએ સરેરાશ 108 ટકાથી વધુ વરસાદ નોંધાયો છે. જેમાં સૌથી વધુ કચ્છ પ્રદેશમાં 135 ટકા, ઉત્તર ગુજરાતમાં 118 ટકા, દક્ષિણ ગુજરાતમાં 112 ટકા, પૂર્વ-મધ્યમમાં 110 ટકા, જ્યારે સૌરાષ્ટ્રમાં 93 ટકાથી વધુ સરેરાશ વરસાદ નોંધાયો છે.