છેલ્લા 24 કલાકમાં ગુજરાતમાં કઈ જગ્યાએ કેટલા ઈંચ વરસાદ ખાબક્યો? જાણો આ રહ્યાં લેટેસ્ટ આંકડા

છેલ્લા 24 કલાકમાં ગુજરાતના 198 તાલુકાઓમાં વરસાદ ખાબક્યો હતો. જેમાં સૌથી વધુ વરસાદ સુરેન્દ્રનગરના ચુડામાં ખાબક્યો હતો

ગાંધીનગર: સમગ્ર ગુજરાતમાં બે દિવસથી ચોમાસાની સિઝનનો પ્રારંભ થઈ ગયો છે જોકે છેલ્લા એક અઠવાડિયાથી ગુજરાતના અલગ-અલગ વિસ્તારોમાં વરસાદ પડી રહ્યો છે. ગુજરાતમાં ભારે પવન સાથે વરસાદની ધમાકેદાર એન્ટ્રી થઈ હતી. ત્યારે છેલ્લા 24 કલાકમાં ગુજરાતના 198 તાલુકાઓમાં વરસાદ ખાબક્યો હતો. જેમાં સૌથી વધુ વરસાદ સુરેન્દ્રનગરના ચુડામાં ખાબક્યો હતો. ચુડામાં સવા ચાર ઈંચ વરસાદ ખાબક્યો હતો. છેલ્લા24 કલાકમાં ગુજરાતના 198 તાલુકાઓમાં વરસાદ વરસ્યો હતો. જેમાં સૌથી વધુ વરસાદ સુરેન્દ્રનગરના ચુડામાં વરસાદ ખાબક્યો હતો. ચુડામાં ભારે વરસાદને કારણે જ્યાં જુઓ ત્યાં પાણી જ પાણી થઈ ગયું હતું. આ ઉપરાંત અમદાવાદના ધંધુકામાં ચાર ઈંચ અને વલસાડના કપરાડામાં 3 ઈંચ વરસાદ ખાબક્યો હતો. સુરેન્દ્રનગરના લિંબડીમાં 3 ઈંચ, નડિયાદમાં 3 ઈંચ, બોટાદના રાણપુરમાં અઢી ઈંચ, ખેડાના વસોમાં પણ સવા બે ઈંચ વરસાદ નોંધાયો હતો. ઉત્તર મધ્ય પ્રદેશમાં સાયક્લોનિક સરક્યુલેશન સર્જાવવાને કારણે ઉત્તર ગુજરાત, દક્ષિણ ગુજરાત અને સૌરાષ્ટ્રના અનેક જિલ્લાઓમાં આગામી પાંચ દિવસ ભારેથી અતિભારે વરસાદ પડી શકે છે. હવામાન વિભાગના જણાવ્યા પ્રમાણે, આજે પંચમહાલ, દાહોદ, ખેડા, અમદાવાદ, આણંદ, છોટાઉદેપુર, નર્મદા, ડાંગ, તાપી, અમરેલી અને ભાવનગરમાં ભારે વરસાદની આગાહી કરવામાં આવી છે.

17 તારીખે ડાંગ, નવસારી, વલસાડ, દમણ, દાદરાનગર હવેલી, જૂનાગઢ અને ગીર સોમનાથ સહિતના જિલ્લામાં ભારે વરસાદની હવામાન વિભાગ દ્વારા આગાહી કરવામાં આવી છે. 18 તારીખે જૂને નવસારી, વલસાડ, દમણ, દાદરા નગર હવેલી, સુરત, ડાંગ, તાપી, ગીર સોમનાથ, જૂનાગઢ, અમરેલી અને ભાવનગરમાં ભારેથી અતિભારે વરસાદની આગાહી કરવામાં આવી છે.