Gujarat Rain: આજે રાજ્યના 121 તાલુકામાં વરસાદ, સાબરકાંઠાના વિજયનગરમાં સૌથી વધુ વરસ્યો 

ગુજરાતમાં આજે પણ વહેલી સવારથી જ અનેક જિલ્લાઓમાં વરસાદ વરસી રહ્યો છે. સાબરકાંઠા જિલ્લામાં ધોધમાર વરસાદ વરસ્યો છે.

પ્રતિકાત્મક તસવીર

Source : તસવીર સોશિયલ મીડિયા

અમદાવાદ : ગુજરાતમાં આજે પણ વહેલી સવારથી જ અનેક જિલ્લાઓમાં વરસાદ વરસી રહ્યો છે. સાબરકાંઠા જિલ્લામાં ધોધમાર વરસાદ વરસ્યો છે. હવામાન વિભાગ દ્વારા આજે પણ અનેક જિલ્લાઓમાં વરસાદની આગાહી હવામાન વિભાગે કરી છે. આજના દિવસમાં રાજ્યના 121 તાલુકામાં વરસાદ નોંધાયો છે.  સૌથી વધારે સાબરકાંઠાના વિજયનગરમાં 2.24 ઈંચ વરસાદ વરસ્યો છે. 

આ સિવાય મહીસાગરના બાલાસિનોરમાં 2.13 ઈંચ વરસાદ, તાપીના સોનગઢમાં 1.93 ઈંચ, ખેડાના કપડવંજમાં 1.93 ઈંચ, સુરતના ઉમરપાડા તાલુકામાં 1.93 ઈંચ વરસાદ વરસ્યો છે.  

જ્યારે વલસાડ, દાંતા અને વડાલીમાં દોઢ ઈંચ વરસાદ વરસ્યો હતો. સુરતના માંડવી અને પલસાણામાં દોઢ ઈંચ વરસાદ પડ્યો હતો.  ખેરગામ, લુણાવાડા અને ઉચ્છલમાં સવા ઈંચ વરસાદ વરસ્યો છે.  ધરમપુર, ખેડબ્રહ્મા અને પોશિનામાં એક ઈંચ વરસાદ વરસ્યો છે.  રાજ્યના 105 તાલુકામાં એક ઈંચ સુધીનો વરસાદ નોંધાયો છે.  

છેલ્લા 2 કલાકમાં રાજ્યના 47 તાલુકામાં વરસાદ

છેલ્લા  2 કલાકમાં વલસાડ તાલુકામાં 1 ઈંચ વરસાદ નોંધાયો છે.  ધરમપુર તાલુકામાં પોણો ઈંચ વરસાદ, ખેરગામ તાલુકામાં પોણો ઈંચ વરસાદ વરસ્યો છે. છેલ્લા 2 કલાકથી અનેક તાલુકાઓમાં ધોધમાર વરસાદ વરસી રહ્યો છે. હવામાન વિભાગ દ્વારા આજે પણ અનેક જિલ્લાઓમાં ભારે વરસાદને લઈ એલર્ટ આપવામાં આવ્યું છે. 

સાબરકાંઠા જિલ્લામાં ભારે વરસાદ

આજે સાબરકાંઠા જિલ્લામાં વહેલી સવારથી જ સાર્વત્રિક વરસાદ વરસી રહ્યો છે.  વડાલી, વિજયનગર અને ખેડબ્રહ્મા તાલુકામાં વરસાદ વરસી રહ્યો છે. ભારે વરસાદના પગલે સાબરકાંઠા જિલ્લાના નદી- નાળા બે કાંઠે વહેતા થયા છે. ઉપરવાસમાં પણ સતત ભારે વરસાદના કારણે હરણાવ નદી બે કાંઠે વહેતી થઈ છે.

વિજયનગરમાંથી પસાર થતી હરણાવ નદી તોફાની બની છે.સરસવ ગામમાં તો નદીના પાણી પ્રાથમિક આરોગ્ય કેન્દ્ર, પ્રાથમિક શાળા અને કોલેજમાં ઘૂસી ગયા હતા.  આ ઉપરાંત વિજયનગર- ખોખરા માર્ગ પર પણ પાણી ફરી વળ્યા હતા.  આ તરફ હરણાવ ડેમમાં પણ ઉપરવાસમાંથી વિપુલ પ્રમાણમાં પાણીની આવક થઈ છે. પાણીની અવિરત આવકથી હરણાવ જળાશયના ત્રણ દરવાજા 3.30 મીટર ખોલી નદીમાં પાણી છોડાયું. 11 હજાર 413 ક્યુસેક પાણીની આવક સામે જ નદીમાં છોડાઈ રહ્યું છે.

હવામાન વિભાગે આગામી 7 દિવસ સુધી કરી છે વરસાદની આગાહી

ગુજરાતમાં મેઘરાજા ફરી એક વખત મહેરબાન થયા છે. આજે વહેલી સવારથી જ અનેક જિલ્લાઓમાં વરસાદી માહોલ છે. હવામાન વિભાગે આગામી 7 દિવસ સુધી ગુજરાતમાં ક્યાંક ભારે તો ક્યાંક છૂટછવાયા વરસાદની આગાહી વ્યક્ત કરી છે. હવાામાન વિભાગે ઓગસ્ટના અંત સુધી રાજ્યમાં મેઘ મહેર યથાવત રહેવાના સંકેત આપ્યાં છે. બંગાળની ખાડીમાં બીજી એક સિસ્ટમ આકાર લઇ રહી છે. જને લઈ અનેક જિલ્લામાં આ સિસ્ટમ ભારે વરસાદ લાવશે.