Gujarat Rain: ત્રણ વરસાદી સિસ્ટમ સક્રિય, સાત દિવસ રાજ્યમાં ધોધમાર વરસાદની આગાહી

રાજ્યમાં એક સાથે ત્રણ-ત્રણ વરસાદી સિસ્ટમ સક્રિય થઈ છે. હવામાન વિભાગે આગામી સાત દિવસ સુધી રાજ્યમાં ધોધમાર વરસાદની આગાહી વ્યક્ત કરી છે.

પ્રતિકાત્મક તસવીર

Source : તસવીર સોશિયલ મીડિયા

અમદાવાદ : રાજ્યમાં એક સાથે ત્રણ-ત્રણ વરસાદી સિસ્ટમ સક્રિય થઈ છે. હવામાન વિભાગે આગામી સાત દિવસ સુધી રાજ્યમાં ધોધમાર વરસાદની આગાહી વ્યક્ત કરી છે.  હવામાન વિભાગે સાત દિવસ રાજ્યભરમાં વરસાદની આગાહી કરી છે. હવામાન વિભાગ મુજબ આગામી સાત દિવસ રાજ્યના અલગ-અલગ જિલ્લામાં ક્યાંક ભારે તો ક્યાંક હળવો વરસાદ વરસી શકે છે.

ભારે વરસાદની આગાહી વચ્ચે માછીમારોને દરિયો ન ખેડવા માટે સૂચના આપવામાં આવી છે. આજે રાજ્યના 100થી વધુ તાલુકામાં વરસાદ નોંધાયો છે. જેમાં સૌથી વધુ દ્વારકામાં પોણા પાંચ ઈંચ, કપરાડા અને ધરમપુરમાં સાડા ત્રણ ઈંચ વરસાદ ખાબક્યો હતો.  કલ્યાણપુર, વ્યારા, આહવા,સોનગઢમાં ત્રણ ઈંચથી વધુ વરસાદ ખાબક્યો છે. 

આવતીકાલે આ જિલ્લાઓમાં વરસાદનું એલર્ટ

હવામાન વિભાગે આજે 10 જિલ્લા અને બે સંઘ પ્રદેશ દમણ અને દાદરાનગર હવેલીમાં વરસાદનું ઓરેન્જ એલર્ટ જાહેર કર્યું છે. જ્યારે 16 જિલ્લામાં વરસાદનું યલો એલર્ટ જાહેર કરવામાં આવ્યું છે.  આવતીકાલે અમરેલી, ભાવનગર, નવસારી, વલસાડની સાથે દમણ અને દાદરાનગર હવેલીમાં વરસાદનું ઓરેન્જ એલર્ટ જાહેર કરવામાં આવ્યું છે. જ્યારે રાજકોટ, બોટાદ, ગીર સોમનાથ, દીવ, આણંદ, ભરૂચ, સુરત, તાપી, ડાંગમાં વરસાદનું યલો એલર્ટ જાહેર કરવામાં આવ્યું છે.

બપોરે 2 વાગ્યા સુધીમાં રાજ્યના 100 તાલુકામાં વરસાદ

રાજ્યમાં વરસાદી માહોલ જામ્યો છે. હવામાન વિભાગની વરસાદની આગાહી વચ્ચે આજે પણ વહેલી સવારથી જ રાજ્યમાં વરસાદ માહોલ છે. ગુજરાતના કેટલાક જિલ્લાઓમાં ધીમીધારે તો ક્યાંક ધોધમાર વરસાદ વરસ્યો છે.  આજે બપોરે 2 વાગ્યા સુધીમાં રાજ્યના 100 તાલુકાઓમાં વરસાદ વરસ્યો છે. દેવભૂમિ દ્વારકામાં સૌથી વધુ 4.45 ઈંચ વરસાદ નોંધાયો છે. જ્યારે
કપરાડા અને ધરમપુરમાં 3.5 ઈંચ વરસાદ પડ્યો છે.

દેવભૂમિ દ્વારકા જિલ્લાના કલ્યાણપુરમાં પણ ધોધમાર વરસાદ વરસ્યો છે. ભારે પવન સાથે કલ્યાણપુર તાલુકામાં  3.43 ઈંચ વરસાદ ખાબક્યો હતો. વરસાદના કારણે અહીં નીચાણવાળા વિસ્તારોમાં પાણી ભરાવવાની સમસ્યા થઈ હતી. ભારે વરસાદને પગલે અનેક વિસ્તારોમાં પાણી ભરાયા છે.

તાપીના વ્યારામાં 3.35 ઈંચ વરસાદ નોંધાયો છે. ડાંગના આહવામાં 3.11 ઈંચ વરસાદ વરસ્યો છે. ડાંગમાં વરસાદને કારણે વાતાવરણ એકદમ સુંદર બની ગયું છે.   તાપીના સોનગઢમાં 3.07 ઈંચ વરસાદ વરસ્યો છે. વાપી અને વઘઈમાં 3-3 ઈંચ વરસાદ નોંધાયો છે.

નવસારીના વાંસદામાં પણ વહેલી સવારથી જ વરસાદી માહોલ છે. અહીં 3 ઈંચ વરસાદ પડ્યો છે. સુરતના બારડોલીમાં 2.50 ઈંચ વરસાદ વરસ્યો છે.  પોરબંદરના રાણાવાવમાં 2.32 ઈંચ વરસાદ પડ્યો છે.