Vav-Tharad: વાવ-થરાદના ઔદ્યોગિક વિકાસ માટે શંકર ચૌધરીની મોટી જાહેરાત, તમામ સ્ટાર્ટઅપ માટે લૉનની ગેરંટી પોતે લેશે

Shankar Chaudhary: સરકાર દ્વારા ઔદ્યોગિક વિકાસ અર્થે ૪૫ ટકા સુધીની આકર્ષક સબસિડીની જાહેરાત કરવામાં આવતા સમગ્ર પંથકના યુવા વર્ગ અને ઉદ્યોગસાહસિકોમાં ભારે ઉત્સાહ જોવા મળી રહ્યો છે

એબીપી અસ્મિતા તસવીર

Source : એબીપી અસ્મિતા

Shankar Chaudhary: થરાદ વિધાનસભા ક્ષેત્રના તાજેતરમાં જ નૂતન વર્ષાભિનંદન સ્નેહમિલન કાર્યક્રમ યોજાયો હતો. આ કાર્યક્રમ દરમિયાન વિધાનસભા અધ્યક્ષ અને બનાસ ડેરીના ચેરમેન શંકર ચૌધરીએ વાવ-થરાદ જિલ્લામાં 1 હજાર સ્ટાર્ટઅપ તૈયાર કરવાના મહત્ત્વપૂર્ણ સંકલ્પની જાહેરાત કરી છે, જે અંતર્ગત સ્થાનિક યુવાનોને રોજગારી પૂરી પાડવા અને ઔદ્યોગિક વિકાસને વેગ આપવા માટે સરકાર દ્વારા 45 ટકા સબસિડી આપવામાં આવશે.

કાર્યક્રમની વિગતો આપતા અધ્યક્ષ શંકર ચૌધરીએ જણાવ્યું હતું કે આ વિસ્તારના યુવાનો પોતાના વ્યવસાય અને નવી પહેલ શરૂ કરી શકે તે માટે જો લોનની જરૂર પડશે, તો તમામ સ્ટાર્ટઅપ માટે લોનની ગેરંટી તેઓ પોતે લેશે. આ અભિયાનને સફળ બનાવવા માટે તેમણે વાવ-થરાદ જિલ્લાના તમામ ધારાસભ્યોને પણ આ જવાબદારી નિષ્ઠાપૂર્વક ઉપાડી લેવા વિશેષ હાંકલ કરી હતી. સરકાર દ્વારા ઔદ્યોગિક વિકાસ અર્થે ૪૫ ટકા સુધીની આકર્ષક સબસિડીની જાહેરાત કરવામાં આવતા સમગ્ર પંથકના યુવા વર્ગ અને ઉદ્યોગસાહસિકોમાં ભારે ઉત્સાહ જોવા મળી રહ્યો છે.

આ ભગીરથ પ્રયાસથી ઉત્તર ગુજરાતના આ પછાત ગણાતા વિસ્તારોમાં રોજગારીની નવી તકોનું સર્જન થશે અને આર્થિક વિકાસને અભૂતપૂર્વ વેગ મળશે. આગામી સમયમાં આ સ્ટાર્ટઅપ નીતિ સ્થાનિક અર્થવ્યવસ્થાને મજબૂત બનાવવામાં અને યુવાનોને આત્મનિર્ભર કરવામાં સીમાચિહ્નરૂપ સાબિત થશે.