બિહારમાં પત્રકારની ગોળી મારીને હત્યા કરવાનો પ્રયાસ, હાલત ગંભીર

  પટના: પટનાના અરવલના પત્રકાર પંકજ મિશ્રાને  ગોળી મારીને હત્યાનો પ્રયાસ કરવામાં આવ્યો હતો. હાલ તેમને સારવાર માટે એક ખાનગી હોસ્પિટલમાં દાખલ કરવામાં આવ્યા છે. ડોક્ટર્સના જણાવ્યા પ્રમાણે તેમની સ્થિતિ ખૂબ ગંભીર માનવામાં આવી રહી છે. ગુરુવારે સવારે પંકજ પંજાબ નેશનલ બેન્કમાંથી પૈસા લઈને તેના ઘર તરફ જઈ રહ્યો હતો ત્યારે જ હથિયાર સાથે રાહ જોઈ રહેલા આરોપીઓએ તેના પર હુમલો કરી દીધો હતો. ત્યારપછી આરોપીઓ પૈસા લૂંટીને ભાગી ગયા હતા. પોલીસે આ ઘટનામાં એક આરોપીની ધરપકડ કરી લીધી છે. નોંધનીય છે કે, પંકજ મિશ્રા હિન્દી ન્યૂઝ પેપર રાષ્ટ્રીય સહારા માટે કામ કરે છે. પોલીસના જણાવ્યા પ્રમાણે જે બે લોકોએ પંકજ ઉપર હુમલો કર્યો છે તે તેમના ગામના જ છે. પંકજ બેન્કમાંથી એક લાખ લઈને ઘર તરફ જવા નીકળ્યા હતા. તે દરમિયાન બાઈક પરથી પસાર થતા બે લોકોએ તેમના પૈસા લૂંટીને તેમના પર ગોળી ચલાવી હતી. પોલીસ વિભાગના જણાવ્યા પ્રમાણે એક આરોપીની ધરપકડ કરી લેવામાં આવી છે. અંગત દુશ્મનીમાં પંકજ મિશ્રા ઉપર આ હુમલો થયો હોવાનું માનવામાં આવે છે.