બંગાળમાં ભાજપની જીત વચ્ચે સંજય રાઉતનું નિવેદન, ‘એવું લાગે છે કે મોદી-શાહ રાષ્ટ્રીય સ્તરે પણ....’

શિવસેના (UBT) નેતા સંજય રાઉતે બંગાળમાં ભાજપની જીત સ્વીકારી, પણ આરોપ લગાવ્યો કે રાષ્ટ્રીય સ્તરે મોદી-શાહનો યુગ હવે પૂરો થઈ રહ્યો છે; બંગાળમાં ભાજપનો 198 બેઠકો પર દબદબો.

bjp west bengal victory sanjay raut statement modi shah national power

Source : PTI

Show Quick Read

Key points generated by AI, verified by newsroom

• ભાજપે પશ્ચિમ બંગાળ વિધાનસભા ચૂંટણીમાં પ્રચંડ બહુમતી મેળવી.
• શિવસેનાના સંજય રાઉતે ચૂંટણી પ્રક્રિયા પર ગંભીર આરોપો મૂક્યા.
• TMC 100 બેઠકોની અંદર સમેટાઈ, ભાજપ 189 બેઠકો પર આગળ.
• ભવાનીપુર અને નંદીગ્રામ જેવી દિગ્ગજ બેઠકો પર રસાકસી ચાલુ.

Sanjay Raut on Bengal results: પશ્ચિમ બંગાળ વિધાનસભા ચૂંટણી 2026 ના પરિણામોમાં ભારતીય જનતા પાર્ટી (BJP) એ પ્રચંડ બહુમતી મેળવી લીધી છે અને સત્તાધારી TMC 100 ના આંકડાની અંદર સમેટાઈ ગઈ છે. ભાજપના આ ઐતિહાસિક પ્રદર્શન પર શિવસેના (UBT) ના રાજ્યસભા સાંસદ સંજય રાઉતે મોટી પ્રતિક્રિયા આપી છે. રાઉતે સ્વીકાર્યું છે કે બંગાળમાં પીએમ મોદી અને અમિત શાહનું સપનું આખરે પૂરું થયું છે, પરંતુ તેમણે આકરો કટાક્ષ કરતા કહ્યું છે કે "એક દીવો ઓલવાય તે પહેલાં વધુ તેજસ્વી રીતે બળે છે." એટલે કે તેમના મતે, ભલે ભાજપ બંગાળ જીતી ગયું હોય, પણ રાષ્ટ્રીય સ્તરે હવે મોદી-શાહનો રાજકીય યુગ ખતમ થવા જઈ રહ્યો છે અને વિપક્ષ ફરી એકવાર લડવા માટે ઊભો થશે.

રાઉતના ચૂંટણી પ્રક્રિયા પર ગંભીર આરોપો

સંજય રાઉતે ભાજપની આ જીત પર સવાલો ઉઠાવતા ગંભીર આક્ષેપો પણ કર્યા છે. તેમણે દાવો કર્યો કે બંગાળમાં 30 થી 35 જેટલા મતદાન મથકો પર જાણીજોઈને મતગણતરી રોકી દેવામાં આવી હતી. એટલું જ નહીં, તેમણે એવો સનસનીખેજ આરોપ પણ લગાવ્યો કે કેન્દ્રીય રિઝર્વ ફોર્સ (CRF) ની મદદ લઈને ભાજપના કાર્યકરો બૂથ પર લૂંટફાટ મચાવી રહ્યા છે.

બંગાળમાં અત્યારે શું છે આંકડાકીય સ્થિતિ?

સાંજે 4:50 વાગ્યા સુધીના ચૂંટણી પંચના સત્તાવાર આંકડા મુજબ, બંગાળમાં ભાજપની આંધી સ્પષ્ટ જોઈ શકાય છે. ભાજપ 9 બેઠકો જીતી ચૂક્યું છે અને 189 બેઠકો પર મજબૂત લીડ સાથે આગળ છે. તેની સામે મમતા બેનર્જીની પાર્ટી TMC માત્ર 1 બેઠક જીતી શકી છે અને 88 બેઠકો પર આગળ ચાલી રહી છે. આ ઉપરાંત, કોંગ્રેસ અને હુમાયુ કબીરની પાર્ટી 2-2 બેઠકો પર આગળ છે.

દિગ્ગજોની બેઠકો પર ખરાખરીનો જંગ:

ભવાનીપુર બેઠક (મમતા બેનર્જી આગળ): મુખ્યમંત્રી મમતા બેનર્જી તેમની ભવાનીપુર બેઠક પર ભાજપના દિગ્ગજ નેતા સુવેન્દુ અધિકારી સામે ટક્કર લઈ રહ્યા છે. 13 રાઉન્ડની ગણતરી પછી મમતા 46,726 મતો સાથે આગળ છે. જ્યારે સુવેન્દુ 41,377 મતો સાથે બીજા નંબરે છે. અહીં મમતા 5,349 મતોની લીડ ધરાવે છે, જોકે આ બેઠક પર કુલ 20 રાઉન્ડની ગણતરી થવાની હોવાથી હજુ ચિત્ર બદલાઈ શકે છે.

નંદીગ્રામ બેઠક (સુવેન્દુ અધિકારી આગળ): સુવેન્દુ અધિકારી આ વખતે બે બેઠકો પરથી લડી રહ્યા છે. નંદીગ્રામ બેઠક પર 15 રાઉન્ડ પછી સુવેન્દુ 102,106 મતો સાથે આગળ ચાલી રહ્યા છે. તેમણે TMC ઉમેદવાર પવિત્રા કર (જેમને 100,568 મત મળ્યા છે) પર 1,538 મતોની મામૂલી સરસાઈ મેળવી છે. આ બેઠક પર કુલ 18 રાઉન્ડની મતગણતરી થવાની છે, એટલે અહીં કાંટાની ટક્કર છે.