દેશના ટોપ 10 કોરોના ‘હોટસ્પોટ’માં ગુજરાતનું કયું શહેર સામેલ થયું? આ શહેરમાં નોંધાયા છે સૌથી વધુ કેસ

ગુજરાતમાં કોરોના વાયરસના કેસમાં સતત વધારો થઈ રહ્યો છે ત્યારે છેલ્લા 24 કલાકમાં વધુ લોકોનો ટેસ્ટ પોઝિટિવ આવતાં ગુજરાતમાં કોરોના વાયરસથી સંક્રમિતોનો આંકડો 74 પર પહોંચ્યો ગયો

અમદાવાદઃ ગુજરાતમાં કોરોના વાયરસના કેસમાં સતત વધારો થઈ રહ્યો છે ત્યારે છેલ્લા 24 કલાકમાં વધુ લોકોનો ટેસ્ટ પોઝિટિવ આવતાં ગુજરાતમાં કોરોના વાયરસથી સંક્રમિતોનો આંકડો 74 પર પહોંચ્યો ગયો છે. જેમાંથી 23 કોવિડ-19ના દર્દીઓ અમદાવાદના છે. આ સાથે જ અમદાવાદ કોવિડ 19ના દેશના ટોપ 10 ‘હોટસ્પોટ’માં સામેલ થઈ ગયું છે. જેમાં નોઈડા, ઉત્તરપ્રદેશનું મેરઠ, રાજસ્થાનનું ભિલવાડા, મહારાષ્ટ્રનું મુંબઈ તેમજ પુણેનો પણ સમાવેશ થાય છે. મંગળવારે ગુજરાતમાં વધુ ચાર કેસ નોંધાયા હતા જેમાંથી એક-એક અમદાવાદ, સુરત, રાજકોટ અને ગાંધીનગરના હતા. મંગળવારે કોઈનું મૃત્યુ ન નોંધાતા મોતનો આંકડો 6 પર યથાવત્ રહ્યો છે. આરોગ્ય અને પરિવાર કલ્યાણ વિભાગના મુખ્ય સચિવ જયંતિ રવિએ કહ્યું હતું કે, સૌથી વધારે પોઝિટિવ કેસ તેમજ તેમના સંપર્કમાં આવતાં લોકોના કારણે કેન્દ્ર સરકારે અમદાવાદને એક હોટસ્પોટ તરીકે ઓળખાવ્યું છે.

વધુમાં તેમણે જણાવ્યું હતું કે, પરંતુ સક્રિય રીતે, કોન્ટેક્ટમાં આવેલા વ્યક્તિઓને ઓળખવા અને જરૂરી પગલા લેવા માટે અમે સુરત, વડોદરા, રાજકોટ અને ભાવનગર જેવા શહેરોમાં પણ કામ કરી રહ્યા છીએ. આઈસોલેશનના અમલ માટે અમદાવાદ મહાનગરપાલિકા તેમજ એજન્સીઓએ મંગળવારે દાણીલીમડા અને બહેરામપુરા જેવા વિસ્તારોમાં કામગીરી હાથ ધરી હતી. ગુજરાતના આંકડા પર એક નજર કરીએ તો, અમદાવાદ 23 કેસ નોંધાયા છે જ્યારે વડોદરા-ગાંધીનગરમાં 9, રાજકોટમાં 10, સુરતમાં 10, ભાવનગરમાં 6, ગીર-સોમનાથમાં 2, મહેસાણા, કચ્છ અને પોરબંદરમાં 1-1 એક નોંધાયા છે. અમદાવાદમાં 3, ભાવનગરમાં બે અને સુરતમાં એક વ્યક્તિનું કોરોનાના કારણે મોત નિપજ્યું છે.