કોરોના અપડેટઃ દેશમાં 24 કલાકમાં પ્રથમ વખત 26,000થી વધારે નવા કેસ, અંદાજે 5,00,000 લોકો થયા સાજા

કોરોના સંક્રમિતની સંખ્યા પ્રમાણે ભારત વિશ્વનો ત્રીજો સૌથી પ્રભાવિત દેશ છે.

નવી દિલ્હીઃ અમેરિકા અને બ્રાઝીલ બાદ હવે દરરોજ સૌથી વધારે કેસ ભારતમાં સામે આવી રહ્યા છે. આજે પ્રથમ વખત 24 કલાકમાં 26 હજારથી વધારે કોરોનાના નવા કેસ સામે આવ્યા છે. દેશમાં કુલ કેસની સંખ્યા હવે 8 લાખની નજીક પહોંચી ગઈ છે. સ્વાસ્થ્ય મંત્રાલયના લેટેસ્ટ આંકડા અનુસાર દેશમાં અત્યાર સુધીમાં 7,93,802 લોકોને કોરોનાને ચેપ લાગ્યો છે. તેમાંથી 21,604 લોકોના મોત થયા છે. જ્યારે 4,95,000 લોકો સારવાર લઈને સાજા થઈ ગયા છે. છેલ્લા 24 કલાકમાં કોરોના વાયરસના 26,506 નવા કેસ સામે આવ્યા અને 475 લોકોના મોત થયા છે. વિશ્વમાં ત્રીજો સૌથી પ્રભાવિત દેશ કોરોના સંક્રમિતની સંખ્યા પ્રમાણે ભારત વિશ્વનો ત્રીજો સૌથી પ્રભાવિત દેશ છે. અમેરિકા, બ્રાઝીલ બાદ કોરોના મહામારીથી સૌથી વધારે પ્રભાવિત ભારત છે. પરંતુ જો પ્રતિ 10 લાખ જનસંખ્યા પ્રમાણે કોરોના કેસ અને મૃત્યુદરની વાત કરીએ તો અન્ય દેશોની તુલનમાં ભારતની સ્થિતિ ઘણી સારી છે. ભારત કરતાં વધારે કેસ અમેરિકા  (3,219,993), બ્રાઝીલ, (1,759,103)માં છે. દેશમાં કોરોનાના કેસ વધવાની ગતિ પણ વિશ્વમાં ત્રીજા નંબર પર છે. એક્ટવિ કેસના મામલે ટોપ-5 રાજ્ય આંકડા અનુસાર, દેશમાં હાલમાં 2,76,000 કોરોનાના એક્ટિવ કેસ છે. સૌથી વધારે એક્ટિવ કેસ મહારાષ્ટ્રમાં છે. મહારાષ્ટ્રમાં 93 હજારથી વધારે સંક્રમિતોની હોસ્પિટલમાં સારવાર ચાલી રહી છે. ત્યાર બાદ બીજા નંબર પર તમિલનાડુ, ત્રીજા નંબર પર દિલ્હી, ચોથા નંબર પર ગુજરાત અને પાંચમાં નંબર પર પશ્ચિમ બંગાળ છે. આ પાંચ રાજ્યોમાં સૌથી વધારે એક્ટિવ કેસ છે. એક્ટિવ કેસ મામલે વિશ્વમાં ભારતનું ચોથું સ્થાન છે. એટલે કે ભારત એવો ચોથો દેશ છે, જ્યાં હાલમાં સૌથી વધારે એક્ટિવ કેસ છે. આઈસીએમઆર અનુસાર 8 જુલાઈ સુધી ટેસ્ટ કરવામાં આવલે સેમ્પલોની કુલ સંખ્યા 1,07,40,832 છે, જેમાં  2,67,061 સેમ્પલોનું ગઈકાલે ટેસ્ટ કરવામાં આવ્યું છે.