Train Ticket Fare: રેલવેની મોટી ભેટ, 18 ટ્રેનોના ભાડા ઘટશે, જાણો કયા રૂટ પર કેટલી થશે બચત

Railway Surcharge: 18 ટ્રેનોમાંથી સુપરફાસ્ટનો દરજ્જો હટાવાશે; સ્લીપરમાં ₹30 અને એસીમાં ₹75 સુધીનો ફાયદો.

indian railway train fare reduced superfast surcharge removed new rules

Source : ABPLIVE AI

Show Quick Read

Key points generated by AI, verified by newsroom

• ૧ જાન્યુઆરી, ૨૦૨૭ થી ૧૮ સુપરફાસ્ટ ટ્રેનો સસ્તી.
• સુપરફાસ્ટ સરચાર્જ નાબૂદ થતા ભાડામાં નોંધપાત્ર ઘટાડો.
• મુસાફરોને ટિકિટ પર ૩૦ થી ૭૫ રૂપિયાની બચત થશે.
• આ ટ્રેનોના નંબર પણ બદલાશે; ધ્યાન રાખવા જણાવાયું.

Indian Railway train fare reduction: નવા વર્ષથી રેલવે મુસાફરોને મોટી ભેટ મળવા જઈ રહી છે. રેલવે વિભાગ દ્વારા કેટલીક ટ્રેનોના ટિકિટ ભાડામાં સુધારો કરવામાં આવનાર છે. આ નિર્ણયનો સીધો અર્થ એ છે કે, 1 જાન્યુઆરી 2027થી મુસાફરો માટે ટ્રેનની મુસાફરી પહેલા કરતાં વધુ સસ્તી બની જશે.

સામાન્ય રીતે ટ્રેન મુસાફરીનું સૌથી સસ્તું અને સુવિધાજનક માધ્યમ છે, જેના કારણે તે લોકોની પહેલી પસંદ હોય છે. લોકો પોતાની જરૂરિયાત અને બજેટ અનુસાર ટિકિટ બુક કરાવતા હોય છે. હવે જો તમે પણ ટ્રેનમાં નિયમિત મુસાફરી કરો છો, તો આગામી મહિનાઓથી તમને ટિકિટના ભાડામાં મોટી રાહત મળવાની છે. ઘણા સમયથી એવી ચર્ચાઓ ચાલી રહી હતી કે ટ્રેનોના ભાડામાં ઘટાડો થઈ શકે છે. પરંતુ આ ભાડામાં ઘટાડો થવા પાછળનું મુખ્ય કારણ શું છે? ચાલો તેને વિગતે સમજીએ.

કેમ ઘટશે ટ્રેનનું ભાડું?

ભારતીય રેલવેએ એક મોટો નિર્ણય લેતા 18 સુપરફાસ્ટ ટ્રેનોનો ‘સુપરફાસ્ટ’ દરજ્જો રદ કરવાનો નિર્ણય કર્યો છે. આ તમામ 18 ટ્રેનોને હવે નિયમિત ‘મેઇલ/એક્સપ્રેસ’ શ્રેણીમાં બદલી નાખવામાં આવશે. આનો સીધો ફાયદો મુસાફરોને થશે, કારણ કે હવે ટિકિટ બુક કરતી વખતે મુસાફરોએ 'સુપરફાસ્ટ સરચાર્જ' ચૂકવવો પડશે નહીં. આ સરચાર્જ હટી જવાથી ટિકિટના ભાવમાં નોંધપાત્ર ઘટાડો થશે.

ટિકિટમાં કેટલા રૂપિયાની બચત થશે?

સુપરફાસ્ટ સરચાર્જ હટી ગયા પછી મુસાફરોને કેટલી રાહત મળશે તે સૌથી મોટો પ્રશ્ન છે. મળતા અહેવાલો મુજબ, આ ફેરફારથી અલગ-અલગ શ્રેણીમાં મુસાફરોને સારો એવો ફાયદો થશે. સ્લીપર ક્લાસની ટિકિટમાં ₹30 ની બચત થશે. જ્યારે એસી ચેર કાર, 3 ટાયર એસી (3AC), 3 ટાયર એસી ઇકોનોમી અને 2 ટાયર એસી (2AC) ની ટિકિટ પર મુસાફરો ₹45 બચાવી શકશે.

આ ઉપરાંત, જો તમે ફર્સ્ટ એસી (1AC) માં મુસાફરી કરો છો, તો તમારી ટિકિટમાં સીધા ₹75 ની બચત થઈ શકે છે. ટૂંકમાં કહીએ તો, ટિકિટની શ્રેણી અનુસાર મુસાફરોને ₹30 થી લઈને ₹75 સુધીનો ફાયદો થશે. જે લોકો વારંવાર ટ્રેનમાં મુસાફરી કરે છે તેમના માટે આ નિર્ણય ખૂબ જ ફાયદાકારક સાબિત થશે.

ટ્રેનના નંબર બદલાશે, મુસાફરોએ ધ્યાન રાખવું

આ સુધારાની સાથે જ ટ્રેનના નંબરો પણ બદલાઈ જશે. જૂના સુપરફાસ્ટ નંબરોની જગ્યાએ હવે નવા એક્સપ્રેસ નંબરો ફાળવવામાં આવશે. જો તમે આ 18 ટ્રેનોમાંથી કોઈમાં મુસાફરી કરવાના હોવ, તો હવે તમારે જૂનાને બદલે નવા ટ્રેન નંબર યાદ રાખવા પડશે. જો તમે જૂના નંબરથી ટ્રેન સર્ચ કરશો તો તમને મુશ્કેલી પડી શકે છે.

અહીં બદલાયેલા ટ્રેન નંબરોની યાદી છે:

ટનકપુર - જૂની દિલ્હી પૂર્ણગિરી જન શતાબ્દી: 12035 થી બદલાઈને 15317

જૂની દિલ્હી - ટનકપુર પૂર્ણગિરી જન શતાબ્દી: 12036 થી બદલાઈને 15318

દેહરાદૂન - કાઠગોદામ નૈની જન શતાબ્દી: 12091 થી બદલાઈને 15315

કાઠગોદામ - દેહરાદૂન નૈની જન શતાબ્દી: 12092 થી બદલાઈને 15316

મુરાદાબાદ - રામનગર કોર્બેટ પાર્ક લિંક: 25013 થી બદલાઈને 15313

રામનગર - મુરાદાબાદ કોર્બેટ પાર્ક લિંક: 25014 થી બદલાઈને 15314

મુરાદાબાદ - રામનગર લિંક એક્સપ્રેસ: 25035 થી બદલાઈને 15335

રામનગર - મુરાદાબાદ લિંક એક્સપ્રેસ: 25036 થી બદલાઈને 15336

ઇસ્લામપુર - નવી દિલ્હી મગધ એક્સપ્રેસ: 20801 થી બદલાઈને 18633

નવી દિલ્હી - ઈસ્લામપુર મગધ એક્સપ્રેસ: 20802 થી બદલાઈને 18634

દરભંગા - જલંધર સિટી અંત્યોદય એક્સપ્રેસ: 22551 થી બદલાઈને 15541

જલંધર સિટી - દરભંગા અંત્યોદય એક્સપ્રેસ: 22552 થી બદલાઈને 15542

પાટલીપુત્ર - ચંદીગઢ એક્સપ્રેસ: 22355 થી બદલાઈને 13255

ચંદીગઢ - પાટલીપુત્ર એક્સપ્રેસ: 22356 થી બદલાઈને 13256

મુઝફ્ફરપુર - આનંદ વિહાર બિહાર સંપર્ક ક્રાંતિ એક્સપ્રેસ: 12557 થી બદલાઈને 15577

આનંદ વિહાર - મુઝફ્ફરપુર બિહાર સંપર્ક ક્રાંતિ એક્સપ્રેસ: 12558 થી બદલાઈને 15578

રાજગીર - નવી દિલ્હી શ્રમજીવી એક્સપ્રેસ: 12391 થી બદલાઈને 13291

નવી દિલ્હી - રાજગીર શ્રમજીવી એક્સપ્રેસ: 12392 થી બદલાઈને 13292

નવા વર્ષથી એટલે કે 1 જાન્યુઆરી, 2027 થી આ ફેરફારો લાગુ થઈ જશે. તેથી ટિકિટ બુક કરતી વખતે નવા ટ્રેન નંબરનું ખાસ ધ્યાન રાખવું જેથી મુસાફરીમાં કોઈ અગવડ ન પડે.