ખેડૂતોના 378 દિવસના આંદોલનનો અંત, જાણો કઈ તારીખે ખેડૂતો કરશે વિજયકૂચ ? કૂચ ક્યાંથી શરૂ થઈ ક્યાં જશે ?

ખેડૂતો સામેના કેસ પરત ખેંચવા સહિતની તમામ માંગણીઓ સરકારે માની લીધી છે, અને તેમને લેખિતમાં પત્ર પણ આપી દીધો છે.

નવી દિલ્હીઃ ભારતમાં છેલ્લા એક વર્ષથી વધુ સમયથી ખેડૂતો આંદોલન કરી રહ્યાં હતા, ખેડૂતોની માંગો હતી કે કૃષિ કાયદાઓ પાછા ખેંચી લે સરકાર, જોકે હવે સરકારે આ માંગોને માની લીધી છે, જેના કારણે ખેડૂત આંદોલનનો અંત આવી ગયો છે. દિલ્હી બોર્ડર પર છેલ્લા 1 વર્ષ 14 દિવસથી એટલે કે 378 દિવસથી ચાલતુ ખેડૂત આંદોલન આજે સાંજ સુધીમાં સમેટાઈ જશે. 

ખેડૂતો સામેના કેસ પરત ખેંચવા સહિતની તમામ માંગણીઓ સરકારે માની લીધી છે, અને તેમને લેખિતમાં પત્ર પણ આપી દીધો છે. આજે સાંજે 5 વાગે ખેડૂત આંદોલન સમાપ્ત કરવાની ખેડૂત સંગઠન દ્વારા જાહેરાત કરાશે. ખેડૂતોએ પોતાના તંબુઓ ઉખાડવાની શરૂઆત પણ કરી દીધી છે. ખેડૂતો હવે પોત પોતાના ઘરે જવાની તૈયારીઓ કરી રહ્યાં છે.  

ખાસ વાત છે કે, આંદોલનની આગેવાની કરનાર પંજાબના 32 ખેડૂત સંગઠનોએ તેમનો કાર્યક્રમ પણ બનાવી દીધો છે. તેમાં 11 ડિસેમ્બરે દિલ્હથી પંજાબ સુધીની વિજય કૂચ કરવાનો પ્લાન બનાવ્યો છે. સિંઘુ અને ટીકરી બોર્ડરથી ખેડૂતો એક સાથે પંજાબ રવાના થશે. 13 ડિસેમ્બરે પંજાબમાં 32 સંગઠોના નેતા અમૃતસરમાં આવેલા દરબાર સાહિબમાં દર્શન કરશે. ત્યારપછી 15 ડિસેમ્બરે પંજાબમાં અંદાજે 116 જગ્યાએ શરૂ કરવામાં આવેલું આંદોલન ખતમ કરવામાં આવશે. હરિયાણાના 28 ખેડૂત સંગઠનોએ ચેમની પણ રણનીતિ બનાવી દીધી છે.