ચોમાસા અંગે સ્કાયમેટની ડરામણી આગાહી: દેશમાં 70% દુષ્કાળની શક્યતા, જાણી લો ચિંતાજનક વિગત

મજબૂત 'અલ નીનો'ના કારણે ઓગસ્ટ અને સપ્ટેમ્બરમાં વરસાદ ઘટશે; ગુજરાત સહિત પશ્ચિમ ભારતમાં ખેતી પર મોટો ખતરો અને મોંઘવારી વધવાની શક્યતા.

skymet monsoon forecast drought risk el nino impact india rain update

Source : AI

Show Quick Read

Key points generated by AI, verified by newsroom

• સ્કાયમેટે ચોમાસાની આગાહી ઘટાડી, 70% દુષ્કાળની આશંકા.
• મજબૂત અલ નીનોને કારણે ઓગસ્ટ-સપ્ટેમ્બરમાં વરસાદ ઘટશે.
• 85% LPA વરસાદ, ગુજરાતમાં ખેતી અને મોંઘવારી વધશે.

Skymet Monsoon Forecast: જો તમે ખેતી સાથે જોડાયેલા છો અથવા તો પહેલેથી જ મોંઘવારીનો માર સહન કરી રહ્યા છો, તો તમારા માટે એક ચિંતાજનક સમાચાર છે. જાણીતી ખાનગી હવામાન સંસ્થા 'સ્કાયમેટ વેધર' (Skymet Weather) એ વર્ષ 2026 ના ચોમાસા અંગેની પોતાની અગાઉની આગાહીમાં ધરખમ ઘટાડો કર્યો છે. સ્કાયમેટના લેટેસ્ટ રિપોર્ટ મુજબ, દેશમાં આ વર્ષે દુષ્કાળ પડવાની 70% જેટલી મોટી આશંકા વ્યક્ત કરવામાં આવી છે. પ્રશાંત મહાસાગરમાં 'અલ નીનો' (El Nino) ની સ્થિતિ સતત મજબૂત થઈ રહી છે, જેના કારણે ખાસ કરીને ઓગસ્ટ અને સપ્ટેમ્બર મહિનામાં વરસાદમાં મોટો ઘટાડો નોંધાયો છે. આ પરિસ્થિતિએ ખેડૂતોથી લઈને સામાન્ય નાગરિકો સુધી સૌની ચિંતા વધારી દીધી છે.

સ્કાયમેટે જાહેર કરેલા નવા આંકડા શું કહે છે?

સ્કાયમેટે સમગ્ર ચોમાસાની સીઝન માટે પોતાનો અંદાજ ઘટાડી દીધો છે. નવા અનુમાન મુજબ, આ વર્ષે દીર્ઘકાલીન સરેરાશ (LPA) ના માત્ર 85% જ વરસાદ થવાની ધારણા છે, જે એક ગંભીર વરસાદી ખાધ તરફ ઈશારો કરે છે.

જો મહિના પ્રમાણે વિશ્લેષણ કરીએ તો, ઓગસ્ટ મહિનામાં સરેરાશના 84% અને સપ્ટેમ્બર મહિનામાં સરેરાશના માત્ર 80% જ વરસાદ પડવાની શક્યતા છે.

તમને જણાવી દઈએ કે, શરૂઆતથી જ વરસાદની સ્થિતિ ચિંતાજનક રહી છે. 1 જૂનથી લઈને 31 જુલાઈ સુધીના સમયગાળામાં જ દેશભરમાં સરેરાશ કરતાં 13% ઓછો વરસાદ નોંધાઈ ચૂક્યો છે.

ચોમાસું કેમ નબળું પડી ગયું? આ રહ્યા મુખ્ય કારણો

આ વખતે વરસાદ ખેંચાવા પાછળનું સૌથી મોટું કારણ 'સ્ટ્રોંગ અલ નીનો' છે. ભૂમધ્યરેખીય પ્રશાંત મહાસાગરનું પાણી ખૂબ જ ઝડપથી ગરમ થઈ રહ્યું છે, અને આ શક્તિશાળી અલ નીનોની સીધી નકારાત્મક અસર ભારતીય ચોમાસા પર પડી રહી છે.

બીજી તરફ, ભારતીય ચોમાસાને જે બે પરિબળો સપોર્ટ કરે છે - ઇન્ડિયન ઓશન ડિપોલ (IOD) અને મેડન-જુલિયન ઓસિલેશન (MJO) - તે પણ હાલમાં નબળા પડી ગયા છે. આ બંને ફેક્ટર્સ તરફથી ભારતીય ચોમાસાને ફરીથી પુનર્જીવિત કરવા માટે કોઈ ખાસ સાથ મળી રહ્યો નથી.

આ પણ વાંચોઃ ગુજરાતમાં વરસાદનો નવો રાઉન્ડ: અંબાલાલ પટેલ અને હવામાન વિભાગે કરી મોટી આગાહી, જાણો વિગત

આપણા પર શું અસર થશે?

આ નબળા ચોમાસાની સૌથી માઠી અસર ગુજરાત પર પડી શકે છે. અહેવાલો અનુસાર, ગુજરાત (ખાસ કરીને સૌરાષ્ટ્ર અને કચ્છના વિસ્તારો) તેમજ પશ્ચિમ ભારતના અન્ય ભાગોમાં સરેરાશ કરતા ઓછો વરસાદ રહેવાથી ખેતી માટે અત્યંત ચિંતાજનક સ્થિતિ ઊભી થઈ શકે છે.

વરસાદ ખેંચાવાને કારણે ખરીફ પાકોના ઉત્પાદનને મોટો ફટકો પડશે. પાક ઓછો આવવાથી બજારમાં અનાજ અને શાકભાજીની અછત સર્જાશે, જેના પરિણામે આગામી દિવસોમાં મોંઘવારી હજુ વધુ વકરે તેવો ભય મંડરાઈ રહ્યો છે.