Cancer: બિહાર ભાજપના આ દિગ્ગજ નેતાને થયું કેન્સર, કહ્યુ- 'લોકસભા ચૂંટણીમાં કાંઇ કરી શકીશ નહી'

Sushil Kumar Modi Cancer:સુશીલ કુમાર મોદી બિહારના નાયબ મુખ્યમંત્રી હોવા ઉપરાંત રાજ્યસભાના સાંસદ પણ રહી ચૂક્યા છે

પ્રતિકાત્મક તસવીર

Source : Getty

Sushil Kumar Modi Cancer: બિહારના પૂર્વ નાયબ મુખ્યમંત્રી સુશીલ કુમાર મોદી આ લોકસભા ચૂંટણીમાં મદદના નામે કંઈ કરી શકશે નહીં. તેઓ છેલ્લા છ મહિનાથી કેન્સરથી પીડિત છે. બુધવારે (03 એપ્રિલ) સુશીલ મોદીએ પોતે સોશિયલ મીડિયા પ્લેટફોર્મ X પર આ માહિતી આપી હતી.

पिछले 6 माह से कैंसर से संघर्ष कर रहा हूँ । अब लगा कि लोगों को बताने का समय आ गया है । लोक सभा चुनाव में कुछ कर नहीं पाऊँगा ।
PM को सब कुछ बता दिया है ।
देश, बिहार और पार्टी का सदा आभार और सदैव समर्पित |

— Sushil Kumar Modi (मोदी का परिवार ) (@SushilModi) April 3, 2024

સુશીલ કુમાર મોદીએ સોશિયલ મીડિયા પ્લેટફોર્મ પર લખ્યું કે છેલ્લા છ મહિનાથી કેન્સર સામે લડી રહ્યો છું. હવે લાગે છે કે લોકોને જણાવવાનો સમય આવી ગયો છે. લોકસભા ચૂંટણીમાં હું કામ કરી શકીશ નહીં. વડાપ્રધાનને બધી જાણકારી આપી છે. દેશ, બિહાર અને પાર્ટીનો આભાર અને સમર્પિત.

સુશીલ મોદી ચારેય ગૃહોના સભ્ય રહી ચૂક્યા છે

નોંધનીય છે કે સુશીલ કુમાર મોદી બિહારના નાયબ મુખ્યમંત્રી હોવા ઉપરાંત રાજ્યસભાના સાંસદ પણ રહી ચૂક્યા છે. જોકે, આ વર્ષે તેમને રાજ્યસભામાં મોકલવામાં આવ્યા ન હતા. આ સિવાય તેઓ પાર્ટીમાં અનેક પદો પર રહી ચૂક્યા છે. તેમના 33 વર્ષના જાહેર જીવનમાં તેઓ રાજ્યસભા, લોકસભા, વિધાન પરિષદ અને વિધાનસભા સહિત ચારેય ગૃહોના સભ્ય રહ્યા છે. તેમણે પાંચ વર્ષ સુધી વિધાન પરિષદમાં વિરોધ પક્ષના નેતા તરીકે પણ સેવા આપી હતી.

સુશીલ કુમાર મોદી બિહારના ઉપમુખ્યમંત્રી અને નાણામંત્રી પણ રહી ચૂક્યા છે. નાણાપ્રધાન હતા ત્યારે તેમને રાજ્યોના નાણાં પ્રધાનોની અધિકૃત સમિતિના અધ્યક્ષ બનાવવામાં આવ્યા હતા. જેપી ચળવળમાં સક્રિય રહીને અને કટોકટી દરમિયાન 19 મહિના જેલમાં રહીને તેઓ રાજકારણમાં આવ્યા ત્યારે તેઓ સતત 15 વર્ષ સુધી ધારાસભ્ય રહ્યા હતા. 9 વર્ષ સુધી વિધાન પરિષદના સભ્ય હતા. લોકસભામાં ભાગલપુર સંસદીય ક્ષેત્રનું પ્રતિનિધિત્વ કર્યું છે. રાજ્યસભાના સભ્ય બન્યા બાદ તેઓ ગૃહની કાયદા અને ન્યાય સમિતિના અધ્યક્ષ હતા.

હવે આપી કેન્સર થયાની જાણકારી

સુશીલ કુમાર મોદીએ પોતાની પોસ્ટમાં સ્પષ્ટ લખ્યું છે કે તેઓ છ મહિનાથી કેન્સરથી પીડિત છે પરંતુ હવે તેમણે લોકોને પોતાની બીમારી વિશે જાણકારી આપી છે. કારણ સ્પષ્ટ છે કે લોકસભાની ચૂંટણી છે અને તેઓ ભાજપના વરિષ્ઠ નેતા છે, તેથી તેમણે પાર્ટીના ચૂંટણી પ્રચાર કે અન્ય કાર્યક્રમોમાં જવું પડતું હતું. આવી સ્થિતિમાં તેમણે લખ્યું કે હવે કહેવાનો સમય આવી ગયો છે. તેઓ લોકસભાની ચૂંટણીમાં કંઈ કામ કરી શકશે નહીં.