PM મોદી 29 ડિસેમ્બરે દેશની સૌથી ઝડપી ટ્રેનને બતાવશે લીલી ઝંડી

નવી દિલ્હીઃ વડાપ્રધાન નરેન્દ્ર મોદી દેશની સૌથી ઝડપી ટ્રેનને 29 ડિસેમ્બરના રોજ લીલી ઝંડી આપશે. સૂત્રોના મતે વડાપ્રધાન મોદી ‘ટ્રેન-18’ને પોતાના સંસદીય ક્ષેત્ર વારાણસીથી રવાના કરી શકે છે. સૂત્રોએ જણાવ્યું કે, એન્જિન વિનાની દેશની પ્રથમ ટ્રેન શતાબ્દી ટ્રેનોનું સ્થાન લેશે અને આ દિલ્હી અને વારાણસી વચ્ચે દોડશે. ટ્રેન-18નું નિર્માણ આઇસીએફ ચેન્નઇએ 100 કરોડ રૂપિયાના ખર્ચે કર્યું છે. ટ્રેન-18 દેશની સૌથી ઝડપી ટ્રેન છે. ટ્રાયલ દરમિયાન આ ટ્રેનની સ્પીડ પ્રતિ કલાક 180 કિલોમીટરથી વધુની રહી હતી. ટ્રાયલ દરમિયાન ટ્રેન-18ની સફળતાથી પ્રભાવિત થઇને રેલવે મંત્રી પિયૂષ ગોયલે તાજેતરમાં જ આઇસીએફને ચાલુ નાણાકીય વર્ષમાં આવી વધુ ચાર ટ્રેનો બનાવવા કહ્યું છે. ટ્રેનની ખાસિયતોની વાત કરવામાં આવે તો ટ્રેનમાં બે વિશેષ ડબ્બા હશે. જેમાં 52-52 સીટો હશે અને બાકીના ડબ્બામાં 78-78 સીટો હશે. ઇન્ટર સિટી સફર માટે બનેલી આ ટ્રેનની સ્પીડ 160થી 180 કિલોમીટર પ્રતિ કલાકની રહેશે. આ ટ્રેન પર 100 કરોડ રૂપિયાનો ખર્ચ કરાયો છે. તમામ ડબ્બામાં વાઇ-ફાઇ રહેશે. સીટો 360 ડિગ્રી સુધી ઘૂમી શકે છે. ટ્રેનના દરવાજા ટચ સેન્સિટિવ હશે. જ્યાં સુધી ટ્રેન પુરી રીતે રોકાશે નહી ત્યાં  સુધી દરવાજા ખુલશે નહીં.