રાજકોટ સિવિલ હોસ્પિટલમાંથી ફરાર થયેલો કોરોના સંક્રમિત વ્યક્તિ ઝડપાયો, જાણો વિગત

સમગ્ર ગુજરાતમાં કોરોનાનો કહેર જોવા મળી રહ્યો છે જોકે મંગળવારે રાજકોટના જંગલેશ્વર વિસ્તારમાં રહેતા 41 વર્ષીય વ્યક્તિનો કોરોના ટેસ્ટ પોઝિટિવ આવ્યો

રાજકોટઃ સમગ્ર ગુજરાતમાં કોરોનાનો કહેર જોવા મળી રહ્યો છે જોકે મંગળવારે રાજકોટના જંગલેશ્વર વિસ્તારમાં રહેતા 41 વર્ષીય વ્યક્તિનો કોરોના ટેસ્ટ પોઝિટિવ આવ્યો છે. તે કઈ રીતે સંક્રમિત થયો તેની જાણ હજુ સુધી થઈ નથી. કારણ કે તે પોતાના ટ્રાવેલ હિસ્ટ્રી જાહેર કરવામાં અધિકારીઓને સહયોગ આપી રહ્યો નથી. જ્યારે તે વ્યક્તિને પોતે કોરોના વાયરસની ચપેટમાં આવી ગયો હોવાની જાણ થતાં જ તે રાજકોટ સિવિલ હોસ્પિટલમાંથી ભાગી પણ ગયો હતો. સોમવારે સાંજે આ વ્યક્તિની તબિયત ખરાબ થતાં ખાનગી હોસ્પિટલ દ્વારા તેને રેફર કરવામાં આવ્યો હતો. જ્યારે સિવિલ હોસ્પિટલના ડોક્ટરોએ તેને કેટલીક ફોર્માલિટી પૂરી કરવાનું કહ્યું તો તે ત્યાંથી ભાગી ગયો હતો. ડોક્ટરોએ આરોગ્ય વિભાગના અધિકારીઓને પણ એલર્ટ કર્યાં હતા. કારણ કે તે વ્યક્તિનો ફોન સ્વિચ્ડ-ઓફ આવી રહ્યો હતો . જોકે, સાવચેત પોલીસે દોઢ કલાકની મહેનત બાદ તેને જંગલેશ્વર વિસ્તારમાંથી શોધી કાઢ્યો હતો. ત્યાર બાદ પોલીસ અને આરોગ્ય વિભાગના અધિકારીઓએ હાશકારો લીધો હતો.