લાંબા વિરામ બાદ સૌરાષ્ટ્રમાં થઈ મેઘમહેર, ભાવનગર-જામનગર-રાજકોટ જિલ્લામાં વરસાદ
લાંબા વિરામ બાદ ગુજરાતમાં ફરી વરસાદની ધમાકેદાર એન્ટ્રી થઈ છે.હવામાન વિભાગની વરસાદની આગાહી વચ્ચે ભાવનગર, જૂનાગઢ, રાજકોટ અને જામનગર જિલ્લાના કેટલાક વિસ્તારોમાં વરસાદી ઝાપટાં અને ધીમીધારે વરસાદ વરસ્યો.
- લાંબા વિરામ બાદ ગુજરાતમાં વરસાદ, ખેડૂતોમાં ખુશીનો માહોલ.
- ભાવનગર, જૂનાગઢ, રાજકોટ અને જામનગરમાં વરસાદી ઝાપટાં વરસ્યા.
- પાક માટે હજુ વધુ સારા વરસાદની ખેડૂતોને જરૂરિયાત.
- હવામાન વિભાગે 12-15 સપ્ટેમ્બર દરમિયાન ભારે વરસાદની આગાહી કરી.
Gujarat Rain: લાંબા વિરામ બાદ ગુજરાતમાં ફરી વરસાદની ધમાકેદાર એન્ટ્રી થઈ છે.હવામાન વિભાગની વરસાદની આગાહી વચ્ચે ભાવનગર, જૂનાગઢ, રાજકોટ અને જામનગર જિલ્લાના કેટલાક વિસ્તારોમાં વરસાદી ઝાપટાં અને ધીમીધારે વરસાદ વરસ્યો છે. એક મહિના બાદ વરસાદનું આગમન થતાં ખેડૂતોમાં ખુશીનો માહોલ જોવા મળ્યો છે. પાક માટે વરસાદ ફાયદાકારક સાબિત થાય તેવી આશા સાથે ખેડૂતો હવે સારા વરસાદની રાહ જોઈ રહ્યા છે.
ભાવનગર શહેર અને ગ્રામ્ય વિસ્તારોમાં વરસાદ
ભાવનગર શહેર અને ગ્રામ્ય વિસ્તારોમાં પણ વરસાદ વરસ્યો છે. મહુવા અને જેસર તાલુકામાં વરસાદી માહોલ જોવા મળ્યો હતો. જેસરના રાણીગામ, દેપલા, કરજાળા, ઝકડલા અને હિપાવડલી સહિતના ગામોમાં વરસાદ વરસ્યો હતો. લાંબા સમય બાદ વરસાદ પડતાં ખેડૂતોમાં ખુશીની લાગણી જોવા મળી હતી. વરસાદના કારણે ખેતરોમાં ઉભા પાકને રાહત મળવાની આશા ખેડૂતો વ્યક્ત કરી રહ્યા છે.
જૂનાગઢમાં પણ ધીમીધારે વરસાદ
જૂનાગઢ શહેરના કેટલાક વિસ્તારોમાં વરસાદ વરસ્યો છે. જૂનાગઢ શહેર ઉપરાંત આસપાસના ગામડાઓમાં પણ વરસાદી ઝાપટાં પડ્યા હતા. ધીમીધારે વરસાદની શરૂઆત થતાં ખેડૂતોમાં ખુશીનો માહોલ છવાયો છે. ખેડૂતોનું કહેવું છે કે હાલ પડેલો વરસાદ પૂરતો નથી અને ખેતી માટે હજુ સારા વરસાદની જરૂરિયાત છે. આગામી દિવસોમાં સારો વરસાદ થાય તેવી ખેડૂતો આશા રાખી રહ્યા છે.
ઉપલેટામાં લાંબા વિરામ બાદ વરસાદની એન્ટ્રી
રાજકોટ જિલ્લામાં પણ લાંબા વિરામ બાદ વરસાદનું આગમન થયું હતું. ઉપલેટા શહેર અને આસપાસના ગામોમાં વહેલી સવારે ધીમીધારે વરસાદ વરસ્યો હતો. લાંબા સમય બાદ મેઘરાજાની પધરામણી થતાં ખેડૂતોમાં ખુશી જોવા મળી હતી. ધીમીધારે પડેલા વરસાદથી ખેડૂતોના પાકને ફાયદો થવાની શક્યતા છે.વરસાદનું પ્રમાણ ઓછું હોવાથી ખેડૂતો હજુ સારા વરસાદની રાહ જોઈ રહ્યા છે.
જામનગરના ધ્રોલ પંથકમાં વરસાદી ઝાપટાં
જામનગર જિલ્લામાં પણ મેઘરાજાની પધરામણી થઈ છે. ધ્રોલ તાલુકામાં વરસાદી ઝાપટાં પડ્યા હતા. હમાપર, ખીજડીયા, ઈટાળા અને માનસર સહિતના ગામોમાં વરસાદ નોંધાયો હતો. લાંબા વિરામ બાદ વરસાદ પડતાં ધરતીપુત્રોમાં આનંદ છવાયો છે.
આ પણ વાંચો- Gujarat Rain: રાજ્યમાં આ તારીખ સુધી વરસશે ભારે વરસાદ, વાંચી લો હવામાન વિભાગની મોટી આગાહી
ગુજરાતમાં મધ્યમથી ભારે વરસાદની આગાહી
રાજ્યમાં આજથી 15 સપ્ટેમ્બર સુધી અનેક વિસ્તારોમાં મધ્યમથી ભારે વરસાદ વરસી શકે છે. ખાસ કરીને 12થી 14 સપ્ટેમ્બર દરમિયાન ભારે વરસાદની આગાહી કરવામાં આવી છે. અપર એર સાયક્લોનિક સર્ક્યુલેશન અને લો-પ્રેશર સિસ્ટમની અસરને કારણે દક્ષિણ ગુજરાત, મધ્ય ગુજરાત અને સૌરાષ્ટ્રના કેટલાક વિસ્તારોમાં ભારે વરસાદ પડી શકે છે. બીજી તરફ રાજ્યમાં અત્યાર સુધીમાં સામાન્યની સરખામણીએ 19 ટકા વરસાદની ઘટ નોંધાઈ છે.
Before You Go
Patan Politics: ભાજપ-કોંગ્રેસમાં પતિરાજની રેસ? હારીજ નગરપાલિકાની ઘટનાથી વિવાદ
ટોપ સ્ટોરી
ટ્રેન્ડિંગ સમાચાર
