Vadodara : એન્જીનિયરિંગના 17 વર્ષના વિદ્યાર્થીએ ફ્રેન્ડના ઘરે જઈ પાંચમા માળેથી કૂદી કર્યો આપઘાત....
એન્જિનિયરિંગના વિદ્યાર્થી એવા 17 વર્ષીય મયૂર શીર્ષદે પોતાના મિત્રના એપાર્ટમેન્ટના પાંચમા માળેથી પડતું મૂકી આપઘાત કરી લેતાં ખળભળાટ મચી ગયો છે. મયૂરે મિત્રના ઘરે આવી કેમ આપઘાત કર્યો એ સવાલ ઉઠ્યો છે.
વડોદરાઃ વડોદરાની મહારાજા સયાજીરાવ યુનિવર્સિટીના એન્જિનિયરિંગના વિદ્યાર્થી એવા 17 વર્ષીય મયૂર શીર્ષદે પોતાના મિત્રના એપાર્ટમેન્ટના પાંચમા માળેથી પડતું મૂકી આપઘાત કરી લેતાં ખળભળાટ મચી ગયો છે. ડિપ્લોમા મિકેનિકલ એન્જિનિયરિંગમાં ભણતા મયૂરે મોડી રાત્રે મિત્રના ઘરે આવી કેમ આપઘાત કર્યો એ સવાલ ઉઠ્યો છે. આ બનાવ અંગે ગોત્રી પોલીસે આપઘાતનો ગુનો નોંધી કાર્યવાહી હાથ ધરી છે.
વડોદરાના ગોત્રી વિસ્તારમાં આવેલી ગોકુળનગર સોસાયટીમાં મયૂર ક્રિષ્ણા શીર્ષદ રહેતો હતો. બુધવારે મોડી સાંજે 6 વાગ્યા સુધી તેણે મિત્રો સાથે સોશિયલ મીડિયા પર ચેટ કરી હતી. એ પછી મયૂર ગોત્રી રોડ પર આવેલા શિવાલય હાઇટ્સમાં રહેતા મિત્રને મળવા ગયો હતો. જો કે પોતાના મિત્રને મળતાં પહેલાં મયૂરે શિવાલય હાઇટ્સના ડી બ્લોકના પાંચમા માળેથી પડતું મૂકી આપઘાત કરી લીધો હતો.
સાંજે 7 વાગ્યાની આસપાસ પાર્કિંગમાં જોરથી પડવાનો અવાજ આવતા જ મયૂરનો મિત્ર. તેનો પરિવાર તથા બિલ્ડિંગના રહીશો દોડી આવ્યા હતા. શિવાલય હાઇટ્ર્સના પાંચમા માળેથી પડતું મૂકતાંની સાથે મયૂરનું મોત નિપજ્યું હતું. આ બનાવની જાણ મયુરના પરિવારજનોને કરવામાં આવતા તુરંત બધાં દોડી આવ્યાં હતાં. મયૂરનાં માતા તેમજ ભાઇ-બહેનના હૈયાફાટ રૂદને સૌને ખળભળાવી મૂક્યા હતા. તેના પિતા દુબઇમાં છે અને પુત્રના મોતના સમાચારે તેમને ખળભળાવી મૂક્યા હતા.
આ બનાવની જાણ ગોત્રી પોલીસને કરવામાં આવતા પોલીસ પણ દોડી આવી હતી. મૃતદેહનો કબજો લઇ પોસ્ટમોર્ટમ માટે સયાજી હોસ્પિટલમાં મોકલી અપાયો હતો. મયૂર ભણવામાં ખૂબ હોશિયાર હતો અને હાલમાં કોરોનાના કારણે ઓનલાઇન અભ્યાસ ચાલતો હતો. બપોર બાદ તે ટ્યુસન ક્લાસમાં પણ જતો હતો.
પોલીસે આપેલી માહિતી પ્રમાણે ગોત્રી રોડ શિવાલય હાઇટ્સના ડી બ્લોકના પાંચમા માળેથી પડતું મૂકનાર મયૂર શિર્ષદ મહારાજા સયાજીરાવ યુનિવર્સિટીમાં ડિપ્લોમા મિકેનિકલ એન્જિનિયરિંગના બીજા વર્ષમાં અભ્યાસ કરતો હતો. આ બનાવ અંગે ગુનો દાખલ કરી કાર્યવાહી હાથ ધરવામાં આવી છે.
ટોપ સ્ટોરી
ટ્રેન્ડિંગ સમાચાર
