કોરોનાના વધતા કેસથી ચીન ફરી પરેશાન, 6 દિવસમાં બનાવી નવી હોસ્પિટલ

રશિયાથી વધુ સંખ્યામાં કોરોના વાયરસના દર્દીઓ દેશમાં આવ્યા છે. ઘણા લોકો સુઇફેન્હેથી ચીનમાં પ્રવેશ્યા છે

બેઇજિંગઃ થોડા દિવસ અગાઉ જ્યારે ચીને જાહેરાત કરી હતી કે તે હુબેઇ રાજ્ય અને વુહાન શહેરમાંથી લોકડાઉન ખોલી રહ્યું છે. ત્યારે એવું લાગતું હતું કે ચીને કોરોના પર કાબૂ મેળવી લીધો છે અને હવે લોકોની જિદગી સામાન્ય થઇ રહી છે. પરંતુ ચીનમાં એકવાર ફરી કોરોના વાયરસ ફેલાવવાનો ખતરો વધ્યો છે. જેને જોતા ચીને ફરીથી એક નવી 13 માળની હોસ્પિટલ બનાવી છે. વાસ્તવમાં કોરોના વધતા કેસને ધ્યાનમાં રાખીને ચીને રશિયાની બોર્ડર પર 13 માળની ખાલી ઇમારતને હોસ્પિટલમાં ફેરવી દીધી છે. છ દિવસની અંદર હોસ્પિટલ બનીને તૈયાર થઇ ગઇ હતી. ચીનના સરકારી મીડિયા અનુસાર, રશિયાથી વધુ સંખ્યામાં કોરોના વાયરસના દર્દીઓ દેશમાં આવ્યા છે. ઘણા લોકો સુઇફેન્હેથી ચીનમાં પ્રવેશ્યા છે. જેમાં ચીની નાગરિક પણ સામેલ છે જે રશિયામાં બિઝનેસ કરે છે. અત્યાર સુધી સુઇફેન્હેમાં વિદેશથી કોરોનાના ઓછામા ઓછા 243 કેસ આવી ચૂક્યા છે. કુલ કેસની સંખ્યા 1000 થઇ ગઇ છે. જેમાં ઘણા લોકો એવા છે જેમનામાં કોરોનાના લક્ષણો જોવા મળ્યા નથી. ચીનના સુઇફેન્હેમાં એક હોસ્પિટલ 580 બેડનની હશે. જેમાં કોઇ લક્ષણો વિનાના દર્દીઓને આઇસોલેટ કર્યા છે. આ અગાઉ બુધવારે 70 હજારથી વસ્તીવાળા સુઇફેન્હે શહેરમાં ચીને પુરી રીતે લોકડાઉનની જાહેરાત કરી છે. ચીને રશિયાના બોર્ડર પર સુઇફેન્હે શહેરમાં અસ્થાયી લેબ પણ બનાવી છે. આ લેબમાં દરરોજ 1000 ટેસ્ટ થઇ રહ્યા છે.