ઈરાન-અમેરિકા વચ્ચેનું સીઝફાયર તૂટ્યું? તેહરાનમાં અમેરિકાનો મોટો હુમલો, મિસાઇલ-ડ્રોન સાઇટ્સ પર અટેક
US-Iran Conflict: હોર્મુઝ જળમાર્ગમાં એક વ્યાવસાયિક જહાજ પર થયેલા ડ્રોન હુમલા બાદ અમેરિકાએ ઈરાન સામે જવાબી સૈન્ય કાર્યવાહી કરી છે.
US-Iran Conflict:મધ્ય પૂર્વમાં ફરી એકવાર તણાવ ચરમસીમાએ પહોંચી ગયો છે. સ્ટ્રેટ ઓફ હોર્મુઝમાં એક વ્યાવસાયિક જહાજ પર થયેલા ડ્રોન હુમલા બાદ અમેરિકાએ ઈરાન વિરુદ્ધ મોટું સૈન્ય એક્શન લીધું છે. અમેરિકન સેન્ટ્રલ કમાન્ડ (CENTCOM)એ દાવો કર્યો છે કે તેણે ઈરાનના અનેક સૈન્ય ઠેકાણાઓ પર જવાબી હવાઈ હુમલા કર્યા છે. અમેરિકાનું કહેવું છે કે આ કાર્યવાહી વ્યાવસાયિક જહાજ પર થયેલા હુમલાના જવાબમાં કરવામાં આવી છે.
CENTCOMએ સોશિયલ મીડિયા પ્લેટફોર્મ X પર જાહેર કરેલા નિવેદનમાં જણાવ્યું કે, 26 જૂને અમેરિકી સેનાએ ઈરાન સામે જવાબી હુમલા કર્યા. નિવેદન અનુસાર, આ કાર્યવાહી 25 જૂને સ્ટ્રેટ ઓફ હોર્મુઝથી ઓમાનના કિનારા નજીક પસાર થઈ રહેલા એક વ્યાવસાયિક જહાજ પર થયેલા હુમલાના જવાબમાં કરવામાં આવી હતી.
મિસાઇલ, ડ્રોન ઠેકાણાં અને રડાર સાઇટ્સને બનાવ્યા નિશાન
અમેરિકી સેનાએ જણાવ્યું કે તેણે ઈરાનના મિસાઇલ અને ડ્રોન સંગ્રહ કેન્દ્રો તેમજ તટીય રડાર ઠેકાણાઓ પર હુમલા કર્યા. અમેરિકાના જણાવ્યા મુજબ, સિંગાપુરના ધ્વજવાળું માલવાહક જહાજ M/V Ever Lovely પર એકતરફી હુમલાખોર ડ્રોન દ્વારા હુમલો કરવામાં આવ્યો હતો, જ્યારે તે સ્ટ્રેટ ઓફ હોર્મુઝમાંથી બહાર નીકળી રહ્યું હતું.
CENTCOMએ જણાવ્યું કે, વ્યાવસાયિક જહાજ પર ઈરાની દળો દ્વારા કરવામાં આવેલ હુમલો સંપૂર્ણપણે અયોગ્ય હતો અને તે યુદ્ધવિરામ કરારનું સ્પષ્ટ ઉલ્લંઘન છે.
આ પણ વાંચો: ધરતી હલી-ઇમારતો જમીનદોસ્ત, વેનેઝુએલામાં ભૂકંપની તબાહીનો લાઇવ નજારો, સામે આવ્યા ભયાનક વીડિયો
વ્યાવસાયિક જહાજોની સુરક્ષા ચાલુ રહેશે
CENTCOMએ જણાવ્યું કે, અમેરિકી સેના સ્ટ્રેટ ઓફ હોર્મુઝમાંથી પસાર થતા વ્યાવસાયિક જહાજોને સુરક્ષિત માર્ગ ઉપલબ્ધ કરાવવાનું અને જરૂરી સમન્વય જાળવી રાખવાનું ચાલુ રાખશે. અમેરિકાએ જણાવ્યું કે તેની સેના વિસ્તારમાં સંપૂર્ણ સતર્કતા સાથે તૈનાત છે, જેથી ઈરાન સાથે થયેલા કરારનું પાલન સુનિશ્ચિત કરી શકાય.
બ્રિટને પણ જહાજ પર હુમલાની પુષ્ટિ કરી
બ્રિટિશ સેનાએ ગુરુવારે જણાવ્યું કે ઓમાનના કિનારા નજીક એક કન્ટેનર જહાજ કોઈ પ્રોજેક્ટાઇલની ઝપેટમાં આવ્યું હતું. યુનાઇટેડ કિંગડમ મેરિટાઇમ ટ્રેડ ઓપરેશન્સ સેન્ટરના જણાવ્યા મુજબ, આ ઘટનામાં કોઈ જાનહાનિ કે ઈજાની માહિતી મળી નથી.
IMOએ જહાજોની નિકાસ અસ્થાયી રીતે રોકી
આંતરરાષ્ટ્રીય સમુદ્રી સંસ્થા (IMO)એ પર્શિયન ખાડીમાં ફસાયેલા જહાજોની નિકાસ અસ્થાયી રીતે રોકી દીધી છે. સંસ્થાએ જણાવ્યું કે જ્યાં સુધી અન્ય જહાજોની સુરક્ષાની ખાતરી નહીં મળે, ત્યાં સુધી નિકાસ પ્રક્રિયા ફરી શરૂ કરવામાં આવશે નહીં.
IMOના મહાસચિવ અર્સેનિયો ડોમિંગ્યુઝના જણાવ્યા મુજબ, છેલ્લા કેટલાક દિવસોમાં લગભગ 115 જહાજો જળમાર્ગમાંથી બહાર નીકળી ચૂક્યા છે, જ્યારે હજુ પણ આશરે 500 જહાજો તે વિસ્તારમાં હાજર છે.
ડોનાલ્ડ ટ્રમ્પે હુમલાને ગણાવ્યો 'મૂર્ખતાપૂર્ણ'
અમેરિકાના રાષ્ટ્રપતિ Donald Trumpએ અગાઉ સ્ટ્રેટ ઓફ હોર્મુઝમાં માલવાહક જહાજ પર થયેલા હુમલાને યુદ્ધવિરામ કરારનું "મૂર્ખતાપૂર્ણ ઉલ્લંઘન" ગણાવ્યું હતું.તેમણે પોતાના સોશિયલ મીડિયા પ્લેટફોર્મ પર લખ્યું કે જહાજ પર છોડવામાં આવેલા ચાર ડ્રોનમાંથી એકે તેના ઉપરના ભાગને નુકસાન પહોંચાડ્યું હતું, પરંતુ જહાજ તેની મુસાફરી ચાલુ રાખવામાં સફળ રહ્યું. તેમણે જણાવ્યું કે અમેરિકી સેનાએ બાકીના ત્રણ ડ્રોનને તોડી પાડ્યા હતા.
ઈરાનને આપી ચેતવણી
શુક્રવારે ઓવલ ઓફિસમાં પત્રકારો સાથેની વાતચીત દરમિયાન ટ્રમ્પને પૂછવામાં આવ્યું કે, તાજેતરના ડ્રોન હુમલા બાદ ઈરાનને કોઈ પરિણામ ભોગવવું પડશે કે નહીં. તેના જવાબમાં તેમણે કહ્યું, "તમને ટૂંક સમયમાં જ ખબર પડી જશે."
તેમણે વધુમાં કહ્યું કે તેમને ઈરાન દ્વારા જહાજ પર હુમલો કરવાનો પ્રયાસ બિલકુલ પસંદ આવ્યો નથી. ટ્રમ્પે જણાવ્યું, "તેમણે ચાર ડ્રોન મોકલ્યા હતા, જેમાંથી અમે ત્રણને તોડી પાડ્યા. તેમણે આવું કરવું જોઈએ નહોતું. હવે આગળ શું થશે, તે તમને જલ્દી ખબર પડી જશે."
ટોપ સ્ટોરી
ટ્રેન્ડિંગ સમાચાર
