ભાવનગરનો ભાલ પંથક જળબંબાકાર: માનવસર્જિત પૂરે અનેક ગામોને બેટમાં ફેરવ્યા, ગેરકાયદે પાળાથી પાણીનો નિકાલ અટક્યો

Bhavnagar floods: ડ્રોન કેમેરામાં કેદ થયા વિનાશકારી દ્રશ્યો; માઢીયા, પાળીયાદ, દેવળીયા સહિતના ગામોમાં ભારે તારાજી; 10 વર્ષથી સમસ્યા છતાં તંત્રની નિષ્ક્રિયતા બાદ કાર્યવાહી શરૂ.

Bhal Panthak rain news: ધોધમાર વરસાદ બાદ ભાવનગર જિલ્લાના ભાલ પંથકમાં સર્વત્ર જળબંબાકારની સ્થિતિ સર્જાઈ છે. જ્યાં જુઓ ત્યાં ફક્ત પાણી જ પાણી દેખાઈ રહ્યું છે, અને ડ્રોન કેમેરામાં કેદ થયેલા આકાશી દ્રશ્યો આ જળબંબાકારની ભયાવહતા દર્શાવે છે. આ પૂર સંપૂર્ણપણે માનવસર્જિત હોવાનું સામે આવ્યું છે, જેના કારણે ભાલ પંથકના મોટાભાગના ગામડાઓ બેટમાં ફેરવાઈ ગયા છે.

ખાસ કરીને, માઢીયા ગામના દ્રશ્યો હૃદયદ્રાવક છે. અહીં મીઠાના અગરોના માલિકો દ્વારા ગેરકાયદે બાંધવામાં આવેલા પાળા વરસાદી પાણીના કુદરતી નિકાલમાં અવરોધરૂપ બન્યા છે.

આના પરિણામે, વરસાદના પાણીનો ભરાવો થતાં ગામોના ગામો બેટમાં ફેરવાઈ ગયા છે. ભાલ પંથકના પાળીયાદ, દેવળીયા, માઢીયા, સવાઈનગર, સનેસ, ખેતા ખાટલી, અને કાળા તળાવ જેવા ગામો આ માનવસર્જિત પૂરને કારણે ભારે નુકસાન પામ્યા છે અને જનજીવન અસ્તવ્યસ્ત થઈ ગયું છે.