ઘરમાં 2 કે 3 AC ચલાવવા છે? જાણો કેટલા KW ની સોલાર પેનલ બેસ્ટ રહેશે

જો તમે પણ ભવિષ્યની જરૂરિયાતોને ધ્યાનમાં રાખીને ઘરે સોલાર પેનલ લગાવવાનું વિચારી રહ્યા છો, તો બજેટ, જગ્યા અને યોગ્ય ક્ષમતા (કિલોવોટ) ની પસંદગી માટે આ માહિતી જરૂર વાંચો.

ઘરમાં સોલાર પેનલ લગાવવી એ હવે માત્ર સુવિધા નથી પરંતુ દરેક ઋતુની પ્રાથમિક જરૂરિયાત બની ગઈ છે. શિયાળાની કડકડતી ઠંડીમાં ગીઝર અને હીટર જેવા ભારે વીજળી ખેંચતા ઉપકરણો સતત વપરાય છે, જ્યારે ઉનાળામાં AC અને રેફ્રિજરેટરના કારણે વીજળીનું બિલ આસમાને પહોંચી જાય છે. આ બંને ઋતુમાં વધતા જતા લાઇટબિલથી રાહત મેળવવા માટે સોલાર સિસ્ટમ એક ઉત્તમ વિકલ્પ છે.

જો તમે હાલમાં સોલાર પેનલ લગાવવાનું પ્લાનિંગ કરી રહ્યા હોવ અને ભવિષ્યમાં ઘરમાં 2 કે 3 AC ચલાવવાની ઇચ્છા હોય, તો અત્યારથી જ યોગ્ય ક્ષમતાવાળી સિસ્ટમ પસંદ કરવી ખૂબ જરૂરી છે. શરૂઆતમાં ઓછી ક્ષમતાવાળી સોલાર પેનલ લગાવવાથી ભવિષ્યમાં નવા ઉપકરણો ઉમેરાતા તે અપૂરતી પડશે, અને બાદમાં તેની કેપેસિટી વધારવા માટે તમારે નવેસરથી મોટો આર્થિક બોજ સહન કરવો પડી શકે છે.

ભવિષ્યમાં 2 AC ચલાવવાની જરૂરિયાત હોય અને ઘરમાં અન્ય ઈલેક્ટ્રિક લોડ બહુ વધારે ન હોય, તો તમારા ઘર માટે 5 કિલોવોટ (kW) ની સોલાર સિસ્ટમ એકદમ યોગ્ય અને પર્યાપ્ત સાબિત થશે. આ કેપેસિટીથી સામાન્ય ઘરગથ્થુ વપરાશની સાથે બે એર કંડિશનર સરળતાથી ચલાવી શકાય છે.

બીજી તરફ, જો તમે ઘરમાં 3 AC ની સાથે વોશિંગ મશીન, ગીઝર અને અન્ય ભારે વિદ્યુત ઉપકરણો એકસાથે વાપરવા માંગતા હોવ, તો ભવિષ્યના લાંબાગાળાના આયોજનને ધ્યાનમાં રાખીને સીધી 10 કિલોવોટ (kW) ની સોલાર સિસ્ટમ લગાવવી વધારે ફાયદાકારક રહેશે.

સોલાર સિસ્ટમ પસંદ કરતી વખતે ફક્ત જરૂરિયાત જ નહીં પણ તમારા બજેટ અને ઘરની છત પર ઉપલબ્ધ જગ્યાનું પણ ખાસ ધ્યાન રાખવું જરૂરી છે. આ ઉપરાંત, સોલાર સેટઅપ માટે હંમેશા એવું ઇન્વર્ટર (Inverter) પસંદ કરવું જોઈએ જેને ભવિષ્યમાં વીજળીનો લોડ વધે ત્યારે સરળતાથી અપગ્રેડ કરી શકાય.

ઘરમાં 2 કે 3 AC વાપરવા માટે હંમેશા 'ઇન્વર્ટર AC' ની જ પસંદગી કરવી જોઇએ, કારણ કે તે વીજળીનો બગાડ અટકાવી વપરાશ ઘટાડવામાં મોટો ભાગ ભજવે છે. માત્ર AC ની સંખ્યા જ નહીં, પરંતુ તે દિવસમાં કેટલા કલાક ચાલે છે, તેની ક્ષમતા (ટન) કેટલી છે અને તેનું સ્ટાર રેટિંગ શું છે તે તમામ બાબતો ધ્યાનમાં લેવી જરૂરી છે.

આમ, ઘરના તમામ વિદ્યુત ઉપકરણોના કુલ લોડની ચોક્કસ ગણતરી કર્યા બાદ જ તમારા ઘર માટે કેટલા કિલોવોટની સોલાર સિસ્ટમ શ્રેષ્ઠ રહેશે તેનો આખરી નિર્ણય લેવો જોઈએ.