ભાજપના નેતાનો સેક્સકાંડઃ પીડિતાના પતિ પર રાજકીય વ્યક્તિ ‘છબિલ પટેલ’એ ડિવોર્સ આપવા દબાણ કરેલું, આ ‘છબિલ પટેલ’ કોણ છે?

છબિલ પટેલનો ઉલ્લેખ આ પહેલાં જ્યંતિ ભાનુશાળી સાથે શારીરિક સંબંધો હોવાનો દાવો કરતી નડિયાદની વિધવા યુવતીની ઓડિયો ટેપમાં પણ થયો હતો. હવે ફરી તેમનો ઉલ્લેખ થતાં આ મામલો રાજકીય રીતે ગરમી પકડશે તેવી પૂરી શક્યતા છે.

યુવતીના પતિએ આ છબિલ પટેલને પોતે ઓળખતો નથી તેવો દાવો કર્યો છે. છબિલ પટેલ કોણ તેવી સ્પષ્ટતા તેણે કરી નથી પણ આ ઉલ્લેખ કોંગ્રેસના ભૂતપૂર્વ ધારાસભ્ય અને હાલમાં ભાજપના નેતા છબિલ પટેલનો હોવાનું મનાય છે. છબિલ પટેલનો ઉલ્લેખ તેણે રાજકીય વ્યક્તિ તરીકે કર્યો છે એ સ્પષ્ટ છે.

જો કે તેણે સૌથી ચોંકાવનારો આક્ષેપ એ કર્યો કે, આ યુવતી સાથે પોતાનાં લગ્ન થયાં પછી તેના સેક્સ સંબંધોની તેને ખબર પડી હતી. એ પછી યુવતીએ પોતાની પાસે છૂટાછેડાની માગણી કરી હતી. એ વખતે છબિલ પટેલ નામનો રાજકીય વ્યક્તિ પોતાને ફોન કરીને છૂટાછેડા આપવા માટે દબાણ કરતો હતો તેવો આક્ષેપ તેણે કર્યો છે.

અમદાવાદઃ ભાજપનાં નેતા જયંતિ ભાનુશાળી સામે સુરતની યુવતીએ બળાત્કારની ફરિયાદ નોંધાવી એ કેસમાં આજે નવો વળાંક આવ્યો છે. આ યુવતીનો ભૂતપૂર્વ પતિ આજે મીડિયા સામે હાજર થયો હતો. યુવતીને સંખ્યાબંધ યુવકો સાથે શારીરિક સંબંધો હોવાનો દાવો પણ તેણે કર્યો છે.