સેન્ચુરિયન ટેસ્ટમાં ટીમ ઈન્ડિયામાં ક્યા ચાર ગુજરાતી ક્રિકેટરનો કરાયો સમાવેશ, જાણો વિગત

પાર્થિવ પટેલઃ રિદ્ધિમાન સાહાની જગ્યાએ ટીમ ઈન્ડિયામાં સ્થાન મેળવનાર અમદાવાદનો વિકેટ કિપર બેટ્સમેન પાર્થિવ પટેલ અત્યાર સુધીમાં 23 મેચમાં 878 રન બનાવી ચુક્યો છે. 2002માં ઇંગ્લેન્ડ સામે તેણે ટેસ્ટ ડેબ્યૂ કર્યું હતું.

ચેતેશ્વર પૂજારાઃ ટીમ ઈન્ડિયામાં રાહુલ દ્રવિડની નિવૃત્તિ બાદ ધ વોલ તરીકે ઓળખ ધરાવતો સૌરાષ્ટ્રાનો રન મશીન ચેતેશ્વર પૂજારા 55 ટેસ્ટમાં 52.64 રનની એવરેજથી 4422 રન બનાવી ચુક્યો છે. કેપટાઉન ટેસ્ટની બંને ઇનિંગમાં તે અપેક્ષા મુજબનો દેખાવ કરી શક્યો નહોતો.

હાર્દિક પંડ્યાઃ ઓલરાઉન્ડર તરીકે ટીમમાં પસંદ કરાયેલા હાર્દિક પંડ્યાએ પ્રથમ મેચમાં બેટ અને બોલ દ્વારા શાનદાર પ્રદર્શન કર્યું હતું. કેપટાઉન ટેસ્ટમાં પ્રથમ ઈનિંગમાં ભારતીય ટીમ સંકટમાં હતી ત્યારે પંડ્યાએ આક્રમક બેટિંગ કરીને 93 રન બનાવ્યા હતા. તે અત્યાર સુધીમાં 3 ટેસ્ટમાં 178 રન બનાવવાની સાથે 4 વિકેટ ઝડપી ચુક્યો છે.

જસપ્રીત બુમરાહઃ અમદાવાદના ફાસ્ટ બોલર જસપ્રીત બુમરાહે સાઉથ આફ્રિકા પ્રવાસ દરમિયાન કેપટાઉનમાં રમાયેલી પ્રથમ ટેસ્ટમાં ડેબ્યૂ કર્યું હતું. જેમાં તેણે પ્રથમ ઈનિંગમાં 1 અને બીજી ઈનિંગમાં 3 મળી મેચમાં કુલ 4 વિકેટ ખેરવી હતી.

સેન્ચુરિયનઃ સાઉથ આફ્રિકાના પ્રવાસે ગયેલી ટીમ ઈન્ડિયા જે સેન્ચુરિયનમાં શ્રેણીની બીજી મેચ રમી રહી છે. સાઉથ આફ્રિકાએ ટોસ જીતીને પ્રથમ બેટિંગ કરવાનો નિર્ણય લીધો છે. ભારતીય ટીમમાં અમદાવાદી વિકેટ કિપર બેટ્સમેન પાર્થિવ પટેલનું પુનરાગમન થવાની સાથે જ આ મેચમાં ચાર ગુજરાતીઓ પ્રથમ વખત એક સાથે રમી રહ્યા છે.