ક્રિકેટનાં તમામ ફોર્મેટમાં DRSને મળી લીલીઝંડી, જાણો ક્યારથી લાગૂ પડશે

દુબઈઃ આઇસીસીએ હવે ક્રિકેટનાં ત્રણેય ફોર્મેટ એટલે કે ટેસ્ટ, વન ડે અને ટી-20માં હવે એકસમાન ડીઆરએસના ઉપયોગને લીલી ઝંડી આપી દીધી છે. આ સિસ્ટમ આગામી ઓક્ટોબરથી લાગુ થઈ જશે.

આઇસીસીની બે દિવસની મિટિંગમાં આ અંગેનો નિર્ણય લેવામાં આવ્યો હતો. ઉલ્લેખનીય છે કે આમાં હોકઆઇ, હોટ સ્પોટ, અલ્ટ્રા એજ, રિયલ ટાઇમ સ્નિકો ટેકનિકનો ઉપયોગ સચોટ નિર્ણય લેવા માટે કરવામાં આવે છે. આમાં એ વાતની દરખાસ્ત પણ કરવામાં આવી છે કે શ્રેણીમાં આઇસીસી જ ડીઆરએસનો ખર્ચ ઉઠાવશે. આગામી જૂન મહિનામાં લંડનમાં આઇસીસીની યોજાનારી બેઠકમાં મંજૂરીની મહોર લાગી જશે.

આઇસીસીએ જણાવ્યું, ”ડીઆરએસ ટેકનિકનો આંતરરાષ્ટ્રીય ક્રિકેટમાં ઉપયોગ કરવાના નિર્ણય પર સહમતિ સધાઈ ગઈ છે. આઇસીસીની ક્રિકેટ કાઉન્સિલ આના ઉપયોગ અંગે ચર્ચા કરશે અને જૂન-2017માં આ અંગે અંતિમ નિર્ણય લેવાશે. ત્યાર બાદ આ વર્ષના ઓક્ટોબરથી ડીઆરએસ લાગુ થઈ જશે. વેસ્ટ ઇન્ડીઝમાં 2018માં યોજાનારા મહિલા ટી-20 વર્લ્ડકપમાં ડીઆરએસનો ઉપયોગ કરાશે. આ વર્લ્ડકપમા દરેક ટીમને એક-એક રિવ્યૂની તક આપવામાં આવશે.