નિવૃત્તીને લઈને ફેરવી તોડ્યું આ ભારતીય ક્રિકેટરે, જાણો કઈ ટીમ સાથે કરશે વાપસી

રાયડુએ વર્લ્ડકપ 2019 માટે અવગણના કર્યા બાદ આંતરરાષ્ટ્રીય ક્રિકેટના તમામ ફોર્મેટમાંથી નિવૃત્તીની જાહેરાત કરી દીધી હતી.

નવી દિલ્હીઃ ક્રિકેટમાંથી નિવૃત્તીની જાહેરાતના બે મહિનાની અંદર અંબાતિ રાયડુએ યૂ ટર્ન લીધો છે. 33 વર્ષના રાયડુ ફરી રમવા માટે તૈયાર છે. તેણે આગામી ઘરેલુ સીઝનમાં હૈદ્રાબાદ માટે રમવાની ઈચ્છા વ્યક્ત કરી છે. તેણે વર્લ્ડકપ 2019 માટે અવગણના કર્યા બાદ આંતરરાષ્ટ્રીય ક્રિકેટના તમામ ફોર્મેટમાંથી નિવૃત્તીની જાહેરાત કરી દીધી હતી. રાયડુએ પોતાની ઉપલબ્ધતા વિશે હૈદ્રાબાદ ક્રિકેટ એસોસિએશનને જાણકારી આપી છે. ગુરુવારે હૈદરાબાદ ક્રિકેટ એસોસિએશનના સીઓએને પત્ર લખીને કહ્યું કે, "હું (અંબાતી રાયડુ) તમારી નોંધ લેવા માંગું છું કે હું નિવૃત્તિમાંથી બહાર આવવા માગું છું અને તમામ ફોર્મેટમાં ક્રિકેટ રમવા માંગુ છું." ત્યારબાદ, હૈદરાબાદ ક્રિકેટ એસોશિયેસનના સીઈઓએ કહ્યું કે, " અંબાતી રાયડુએ નિવૃત્તિ પાછી ખેંચી લીધી છે અને 2019-20માં હૈદરાબાદ માટે તમામ ફોર્મેટમાં રમવા માટે ઉપલબ્ધ છે." રાયડુએ કહ્યું કે, હું ચેન્નાઇ સુપરકિંગ્સ, વી.વી.એસ. લક્ષ્મણ અને નોએલ ડેવિડનો આભાર માનું છે જેઓ મુશ્કેલ સમય દરમિયાન ખૂબ જ સહાયક રહ્યા છે અને મને એ સમજાવવા માટે મદદરૂપ બન્યાં છે કે મારામાં પૂરતું ક્રિકેટ બાકી છે અને નિવૃત્તિ લેવાનો નિર્ણય ભાવનાત્મક રીતે ઉતાવળો હતો. હું ખૂબ જ પ્રતિભાશાળી હૈદરાબાદની ટીમ સાથે આગળ એક અદ્દભુત સીઝનની રાહ જોઈ રહ્યો છું અને હૈદરાબાદની ટીમમાં જોડાવા માટે હું 10 સપ્ટેમ્બરથી ઉપલબ્ધ રહીશ. હૈદરાબાદની પસંદગી સમિતિના અધ્યક્ષ બનવા માટે ફેવરિટ ડેવિડે રાયડુના નિર્ણયને આવકાર્યો છે. ડેવિડે કહ્યું કે, "તે નિર્ણય લેવો સરળ નથી. ભૂલ સ્વીકારવામાં ઘણી નમ્રતા અને હિંમતની જરૂર પડે છે. રાયડુના પુનરાગમનથી હું ખરેખર ઉત્સાહિત છું. તેનામાં હજી ઘણું ક્રિકેટ બાકી છે અને મને ખાતરી છે કે તે હૈદરાબાદ ક્રિકેટ માટે મોટું વરદાન છે. તેને મારો સંપૂર્ણ ટેકો છે અને ટીમને વધુ ઊંચાઈએ પહોંચવામાં મદદ કરશે.