T20 વર્લ્ડ કપ: અભિષેક શર્માનો શરમજનક રેકોર્ડ, 3 મેચમાં 0 પર આઉટ થનાર પ્રથમ ભારતીય

T20 વર્લ્ડ કપ 2026માં ભારતીય ઓપનર અભિષેક શર્માનો ફ્લોપ શો યથાવત. યુએસએ, પાકિસ્તાન અને નેધરલેન્ડ્સ સામે સળંગ 3 મેચમાં 0 પર આઉટ થઈને બનાવ્યો શરમજનક રેકોર્ડ.

Abhishek Sharma duck

Source : सोशल मीडिया

Show Quick Read

Key points generated by AI, verified by newsroom

• અભિષેક શર્મા T20 વર્લ્ડ કપમાં ત્રણ વાર શૂન્ય પર આઉટ.
• યુએસએ, પાકિસ્તાન અને નેધરલેન્ડ્સ સામે સતત નિષ્ફળતા.
• T20 વર્લ્ડ કપમાં પ્રથમ ત્રણ ઇનિંગ્સમાં શૂન્ય સાથે રેકોર્ડ.
• છેલ્લી ૬ T20 ઇનિંગ્સમાં ૪ વખત શૂન્ય રન.

Abhishek Sharma duck: ભારતીય ક્રિકેટ ટીમના આક્રમક યુવા ઓપનર મનાતા અભિષેક શર્માએ 18 ફેબ્રુઆરી 2026 ના રોજ રમાયેલી T20 વર્લ્ડ કપની નેધરલેન્ડ્સ સામેની ગ્રુપ મેચમાં ફરી એકવાર નિરાશાજનક પ્રદર્શન કરતા સળંગ ત્રીજી વખત શૂન્ય પર આઉટ થઈને એક અત્યંત શરમજનક રેકોર્ડ પોતાના નામે કર્યો છે. ખરાબ ફોર્મ સામે ઝઝૂમી રહેલા અભિષેક શર્મા T20 વર્લ્ડ કપના ઇતિહાસમાં પોતાની કારકિર્દીની સૌપ્રથમ ત્રણ ઇનિંગ્સમાં ખાતું ખોલાવ્યા વિના જ પેવેલિયન પરત ફરનાર સૌપ્રથમ ભારતીય બેટ્સમેન બની ગયો છે. તેની આ સતત નિષ્ફળતાઓએ ટીમ મેનેજમેન્ટ માટે નવી ચિંતાઓ ઉભી કરી છે.

શૂન્યની હેટ્રિક: યુએસએ, પાકિસ્તાન અને હવે નેધરલેન્ડ્સ

આ વર્તમાન T20 વર્લ્ડ કપ અભિષેક શર્માની કારકિર્દીનો સૌપ્રથમ વર્લ્ડ કપ છે, પરંતુ તેની શરૂઆત કોઈ ખરાબ સ્વપ્નથી કમ રહી નથી. આ મેગા ટુર્નામેન્ટમાં તેના પ્રદર્શન પર નજર કરીએ તો, તે પોતાની પહેલી જ મેચમાં યુએસએ (USA) સામે શૂન્ય રને આઉટ થઈને 'ગોલ્ડન ડક' નો શિકાર બન્યો હતો.

ત્યારબાદ, નામિબિયા સામેની મેચમાં તેને પ્લેઇંગ ઇલેવનમાંથી આરામ આપવામાં આવ્યો હતો. જોકે, પાકિસ્તાન સામેની હાઈ વોલ્ટેજ મેચમાં જ્યારે ટીમ મેનેજમેન્ટે તેના પર ફરીથી ભરોસો મૂક્યો, ત્યારે તે 4 બોલનો સામનો કર્યા પછી પણ એક પણ રન બનાવી શક્યો નહોતો અને આઉટ થઈ ગયો. હવે બુધવારે રમાયેલી નેધરલેન્ડ્સ સામેની મેચમાં પણ તે માત્ર 3 બોલ રમીને કોઈ પણ રન બનાવ્યા વિના ફરી પેવેલિયન ભેગો થઈ ગયો છે. આમ, તેણે શૂન્યની શરમજનક હેટ્રિક લગાવી છે.

આશિષ નેહરાનો વર્ષો જૂનો રેકોર્ડ તૂટ્યો

અભિષેક શર્મા હવે T20 વર્લ્ડ કપના ઇતિહાસમાં એવો પ્રથમ ભારતીય ખેલાડી બની ગયો છે, જેણે વર્લ્ડ કપમાં પોતાની પ્રથમ ત્રણ ઇનિંગ્સમાં શૂન્ય રન બનાવ્યા હોય. આ અગાઉ આ અનિચ્છનીય રેકોર્ડ ભારતીય ટીમના ભૂતપૂર્વ ફાસ્ટ બોલર આશિષ નેહરાના નામે નોંધાયેલો હતો. આશિષ નેહરા પોતાની T20 વર્લ્ડ કપ કારકિર્દીની શરૂઆતની બે ઇનિંગ્સમાં કોઈ રન બનાવ્યા વિના આઉટ થયો હતો. રસપ્રદ વાત એ છે કે, નેહરાએ પોતાના સમગ્ર T20 વર્લ્ડ કપ કરિયરમાં ક્યારેય બેટથી એક પણ રન બનાવ્યો નથી. હવે એક શુદ્ધ બેટ્સમેન હોવા છતાં અભિષેકે આ રેકોર્ડ તોડીને ચાહકોને નિરાશ કર્યા છે.

છેલ્લી 6 ઇનિંગ્સમાં 4 વખત 0 પર આઉટ

અભિષેક શર્માનો આ ખરાબ રેકોર્ડ માત્ર T20 વર્લ્ડ કપ પૂરતો સીમિત નથી. જો તેની ઓવરઓલ આંતરરાષ્ટ્રીય કારકિર્દીના તાજેતરના આંકડા તપાસીએ તો, તે તેની છેલ્લી 6 T20 ઇનિંગ્સમાં કુલ 4 વખત શૂન્ય પર આઉટ થયો છે. આ 6 ઇનિંગ્સમાં તે માત્ર 98 રન જ બનાવી શક્યો છે, જેમાં એકમાત્ર અડધી સદીનો સમાવેશ થાય છે. આઈપીએલ (IPL) માં બોલરોના છોતરા કાઢનાર આ યુવા ખેલાડી આંતરરાષ્ટ્રીય સ્તરે દબાણ સહન કરવામાં નિષ્ફળ સાબિત થઈ રહ્યો હોય તેવું સ્પષ્ટ દેખાઈ રહ્યું છે.

આ પણ વાંચો

T20 વર્લ્ડ કપ 2026: ICC રેન્કિંગના ટોપ 10માં 4 ભારતીય, જાણો કોણ છે કયા સ્થાને?