ભારતની શાનદાર જીત: ગુરબાઝની સદી એળે ગઈ, ગિલ અને રાહુલની તોફાની બેટિંગથી અફઘાનિસ્તાન પસ્ત

વરસાદના વિઘ્ન વચ્ચે 25 ઓવરની મેચમાં અફઘાનિસ્તાને 195 રનનો ટાર્ગેટ આપ્યો હતો, જેને ભારતે 13 બોલ બાકી રહેતા 3 વિકેટ ગુમાવીને સરળતાથી પાર કરી લીધો.

ind vs afg first odi match highlights shubman gill kl rahul win

Source : X (Twitter)

Show Quick Read

Key points generated by AI, verified by newsroom

• ધર્મશાલામાં વરસાદ ઘટાડતા અફઘાનિસ્તાને ખરાબ શરૂઆત કરી.
• ગુરબાઝે ઝડપી સદી ફટકારી, અફઘાનિસ્તાને 194 રન બનાવ્યા.
• ગિલની 84 અને રાહુલના 39થી ભારતે મેચ જીતી.

india vs afg first odi highlights 2026: ધર્મશાલામાં રમાયેલી ભારત અને અફઘાનિસ્તાન વચ્ચેની પ્રથમ વનડે મેચમાં ભારતે શાનદાર પ્રદર્શન કરતા 7 વિકેટે ધમાકેદાર જીત મેળવી છે. વરસાદના કારણે 25 ઓવરની કરી દેવાયેલી આ મેચમાં અફઘાનિસ્તાને રહેમાનુલ્લાહ ગુરબાઝની ઐતિહાસિક સદીની મદદથી 194 રન બનાવ્યા હતા. જોકે, 195 રનના લક્ષ્યાંકનો પીછો કરવા ઉતરેલી ભારતીય ટીમે કેપ્ટન શુભમન ગિલની 84 રનની અણનમ ઇનિંગ અને કેએલ રાહુલની વિસ્ફોટક બેટિંગની મદદથી 13 બોલ બાકી રહેતા જ મેચ પોતાના નામે કરી લીધી હતી અને સિરીઝમાં 1-0 ની લીડ મેળવી લીધી છે.

વરસાદનું વિઘ્ન અને અફઘાનિસ્તાનની ખરાબ શરૂઆત

વાત જાણે એમ છે કે, ધર્મશાલામાં વરસાદને કારણે મેચ 4 કલાક અને 15 મિનિટ મોડી શરૂ થઈ હતી, જેના લીધે મેચને 25-25 ઓવરની કરી દેવામાં આવી. ભારતીય કેપ્ટન શુભમન ગિલે ટોસ જીતીને પહેલા બોલિંગ કરવાનો નિર્ણય લીધો હતો. પહેલા બેટિંગ કરવા ઉતરેલી અફઘાનિસ્તાનની શરૂઆત બહુ જ ખરાબ રહી હતી. ડેબ્યૂ મેચ રમી રહેલા ગુરનૂર બ્રારે બીજી જ ઓવરમાં ઇબ્રાહિમ ઝદરાનને માત્ર 1 રને આઉટ કરી દીધો. ત્યારબાદ અર્શદીપ સિંહે પણ કમાલ કરતા સેદિકુલ્લાહ અટલ અને રહેમત શાહને 3-3 રને પેવેલિયન ભેગા કરી દીધા. એક સમયે અફઘાનિસ્તાને 26 રનમાં જ 3 વિકેટ ગુમાવી દીધી હતી.

ગુરબાઝની ઐતિહાસિક સદી અને બોલરોનું કમબેક

મુશ્કેલ સમયમાં ઓપનર રહેમાનુલ્લાહ ગુરબાઝે કેપ્ટન હશમતુલ્લાહ શાહિદી સાથે મળીને બાજી સંભાળી લીધી અને બંનેએ ચોથી વિકેટ માટે 116 રનની મજબૂત ભાગીદારી કરી. ગુરબાઝે ભારતીય બોલરોની બરાબરની ધોલાઈ કરી અને માત્ર 48 બોલમાં જ સદી ફટકારી દીધી, જે વનડેમાં કોઈપણ અફઘાન ખેલાડી માટે સૌથી ફાસ્ટ સદી છે. તેણે 51 બોલમાં 8 ચોગ્ગા અને 8 છગ્ગાની મદદથી 102 રન બનાવ્યા.

જોકે, નીતિશ કુમાર રેડ્ડીએ ગુરબાઝને ક્લીન બોલ્ડ કરતા જ ભારતીય બોલરોએ જબરદસ્ત કમબેક કર્યું અને આખી અફઘાન ટીમને 24.5 ઓવરમાં 194 રને ઓલઆઉટ કરી દીધી. ભારત તરફથી ડેબ્યૂ કરી રહેલા ગુરનૂર બ્રાર અને હર્ષ દુબેએ શાનદાર બોલિંગ કરતા 3-3 વિકેટ ઝડપી હતી.

આ પણ વાંચોઃ 8 છગ્ગા, 48 બોલ અને સદી! ભારત સામે રહેમાનુલ્લાહ ગુરબાઝે મચાવ્યો તરખાટ, અનેક રેકોર્ડ તોડ્યા

ભારતની તોફાની બેટિંગ અને શાનદાર જીત

હવે 195 રનનો પીછો કરવા ઉતરેલી ભારતીય ટીમને સારી શરૂઆતની જરૂર હતી. રોહિત શર્મા અને શુભમન ગિલે સારી લયમાં ઇનિંગની શરૂઆત કરી, પરંતુ બંને વચ્ચે તાલમેલના અભાવે રોહિત 16 રન બનાવીને કમનસીબે રનઆઉટ થઈ ગયો. 46 રને પહેલી વિકેટ પડ્યા બાદ ગિલે ઇશાન કિશન સાથે 70 રનની જોરદાર ભાગીદારી નોંધાવી. ઇશાન 34 રન બનાવીને રાશિદ ખાનના બોલ પર બોલ્ડ આઉટ થયો.

અંતમાં, કેપ્ટન ગિલ એક છેડો સાચવીને ઊભો રહ્યો અને તેણે 84 રનની શાનદાર અણનમ ઇનિંગ રમી. જ્યારે કેએલ રાહુલે મેદાનમાં આવતાની સાથે જ માત્ર 19 બોલમાં 39 રન ફટકારીને અફઘાનિસ્તાનના બોલરોને સ્તબ્ધ કરી દીધા હતા. રાહુલે જ વિનિંગ શૉટ ફટકારીને ભારતને 13 બોલ બાકી રહેતા 7 વિકેટે જીત અપાવી હતી.

આ પણ વાંચોઃ હાર્દિક પંડ્યા અફઘાનિસ્તાન વનડે શ્રેણીમાંથી બહાર, ટીમમાં જગ્યા મેળવવા માટે આ બે ઓલરાઉન્ડર વચ્ચે ટક્કર