એક મહિનાના બ્રેકમાં હાર્દિક પંડ્યાએ શું કર્યું? ખુદ હાર્દિકે રહસ્ય પરથી પડદો ખોલ્યો

પંડ્યાને હાલમાં જ વેસ્ટ ઇન્ડિઝ પ્રવાસ પર આરામ આપવામાં આવ્યો હતો.

નવી દિલ્હીઃ ટીમ ઇન્ડિયાના સ્ટાર ઓલરાઉન્ડર હાર્દિક પંડ્યા ઇન્ટરનેશનલ ક્રિકેટમાં વાપસી માટે તૈયાર છે. પંડ્યાને હાલમાં જ વેસ્ટ ઇન્ડિઝ પ્રવાસ પર આરામ આપવામાં આવ્યો હતો. પંડ્યાએ આ બ્રેકમાં આરામ કરવાની જગ્યાએ મેહનત કરવાનું પસંદ કર્યું. તે દિવસમાં બે વખત ટ્રેનિંગ કરતા હતા. મુંબઈમાં ભારે વરસાદને કારણે તેને ટ્રેનિંગ કરવામાં મુશ્કેલી પડી તો તે વડોદરા આવી ગયા. પંડ્યા દક્ષિણ આફ્રીકા વિરૂદ્ધ રવિવારથી શરૂ થવા જઈ રહેલ ત્રણ મેચની ટી20 સીરીઝ માટે ટીમમાં વાપસી કરી છે. પંડ્યાએ વધુમાં જણાવ્યું કે, “મારા માટે આ બ્રેક ખૂબજ મહત્વનો હતો, કારણકે IPL ખૂબજ લાંબી રહી અને ત્યારબાદ વર્લ્ડકપ હતો. બંને ટૂર્નામેન્ટમાં મેં સારું પ્રદર્શન કર્યું. હું શ્રેષ્ઠ કરવાનો પ્રયત્ન કરી રહ્યો છું અને આ માટે મારા શરીરને થોડા આરામની જરૂર હતી. કારણકે ઈલાજ કરતાં બચાવ વધારે મહત્વનો હોય છે. આ જ સમયે ટીમ મેનેજમેન્ટે પણ મને આરામ આપવાનો નિર્ણય લીધો. હું સાઉથ આફ્રિકા સીરીઝમાં પાછો ફરીશ.” આ બ્રેક બાદ તેની ફિટનેસમાં ઘણો સુધારો થયો છે. હવે હાર્દિક માટે ટાર્ગેટ આગામી ટી20 વર્લ્ડકપ છે. હાર્દિક ઓલરાઉન્ડર છે. એટલે તેને બેટિંગ અને બોલિંગ બંનેની પ્રેક્ટિસ કરવી પડે છે. જેથી તેને વધારે મહેનતની જરૂર પડે છે.