શું MS ધોની IPLમાં એક પણ મેચ રમી શકશે નહીં? ચેન્નઈ સુપરકિંગ્સના કોચે આપ્યો જવાબ
ઈન્ડિયન પ્રીમિયર લીગ (IPL) 2026 માં મહેન્દ્ર સિંહ ધોનીની વાપસીને લઈને ફેન્સ સતત રાહ જોઈ રહ્યા છે.
ઈન્ડિયન પ્રીમિયર લીગ (IPL) 2026 માં મહેન્દ્ર સિંહ ધોનીની વાપસીને લઈને ફેન્સ સતત રાહ જોઈ રહ્યા છે. એવી આશા હતી કે ગુરુવારે મુંબઈના વાનખેડે સ્ટેડિયમમાં મુંબઈ ઇન્ડિયન્સ સામેની મેચમાં ધોની મેદાન પર જોવા મળશે, પરંતુ એવું બન્યું નહીં.
જ્યારે ચેન્નઈના કેપ્ટન ઋતુરાજ ગાયકવાડે પ્લેઇંગ ઇલેવનની જાહેરાત કરી હતી ત્યારે ધોનીનું નામ સામેલ કરવામાં આવ્યું ન હતું. આનાથી તેની ફિટનેસ અંગે પ્રશ્નો ઉભા થયા. મેચ દરમિયાન ચેન્નઈ સુપર કિંગ્સના બેટિંગ કોચ માઈકલ હસીએ બ્રોડકાસ્ટર્સ સાથે વાત કરી અને ધોનીની ઈજા અંગે અપડેટ આપ્યું હતું.
હસીએ કહ્યું હતું કે, "તે (ધોની) ટૂંક સમયમાં રમી શકે છે, પરંતુ તે હજુ સુધી 100 ટકા ફિટ નથી. તે નેટમાં પ્રેક્ટિસ કરી રહ્યો છે અને વાપસી કરવા માટે તૈયાર છે, પરંતુ તેને વિકેટો વચ્ચે દોડવામાં મુશ્કેલી પડી રહી છે. અમે અને ચાહકો બંને તેની વાપસીની આતુરતાથી રાહ જોઈ રહ્યા છીએ."
ધોનીને આખરે સમસ્યા શું છે?
44 વર્ષીય ધોની હાલમાં પગની માંસપેશીઓની ઈજાથી પીડાઈ રહ્યો છે. સીઝનની શરૂઆત પહેલા પ્રેક્ટિસ દરમિયાન તેને આ ઈજા થઈ હતી. આ જ કારણ છે કે તે આ સીઝનમાં રમી શક્યો નથી. અહેવાલો અનુસાર, ધોનીની વાપસી હવે આગામી બે મેચમાં શક્ય માનવામાં આવે છે. તે 26 એપ્રિલે ગુજરાત ટાઇટન્સ સામે અથવા 2 મેના રોજ મુંબઈ ઇન્ડિયન્સ સામે મેદાનમાં પાછો ફરી શકે છે.
ધોનીનો IPL રેકોર્ડ
મહેન્દ્ર સિંહ ધોની IPL ઇતિહાસના સૌથી સફળ કેપ્ટનોમાંના એક છે. તેમની કેપ્ટનશીપ હેઠળ ચેન્નઈ સુપર કિંગ્સે પાંચ વખત ટાઇટલ જીત્યું છે. ધોનીએ અત્યાર સુધીમાં 278 IPL મેચ રમી છે, જેમાં 5439 રન બનાવ્યા છે. તેમની વાપસી માત્ર CSK માટે જ નહીં પરંતુ સમગ્ર ટુર્નામેન્ટ માટે એક મોટી ક્ષણ સાબિત થશે.
MIનો સૌથી મોટો પરાજય, CSKની સૌથી મોટી જીત
ચેન્નાઈ સુપર કિંગ્સે IPLમાં મુંબઈ ઈન્ડિયન્સને સૌથી મોટા રનના માર્જિનથી હરાવવાનો રેકોર્ડ બનાવ્યો છે. IPLમાં મુંબઈનો અગાઉનો સૌથી મોટો પરાજય 87 રનથી હતો, જે તેમને 2013માં રાજસ્થાન રોયલ્સ સામે થયો હતો. ચેન્નાઈ સામે મુંબઈનો સૌથી મોટો પરાજય 48 રનથી હતો, પરંતુ CSKએ MIને 103 રનથી હરાવીને તે માર્જિનને વધુ સારો બનાવ્યો.
ટોપ સ્ટોરી
ટ્રેન્ડિંગ સમાચાર
