IPL 2026: 160 રનના ટાર્ગેટ સામે લખનૌની શરમજનક હાર, રાજસ્થાને હોમ ગ્રાઉન્ડમાં જ ધૂળ ચટાડી

એકાના સ્ટેડિયમમાં રમાયેલી 32મી મેચમાં જાડેજાની શાનદાર બેટિંગ અને આર્ચરની ઘાતક બોલિંગ સામે LSG પત્તાના મહેલની જેમ વિખેરાઈ ગયું. કેપ્ટન ઋષભ પંતનો ટોસ જીતીને બોલિંગ કરવાનો નિર્ણય સાવ ખોટો સાબિત થયો.

Rajasthan Royals crush LSG by 40 runs at Ekana Stadium

Source : x.com/IPL

Show Quick Read

Key points generated by AI, verified by newsroom

• રાજસ્થાન રોયલ્સે લખનૌ સુપર જાયન્ટ્સને 40 રનથી હરાવ્યું.
• રવિન્દ્ર જાડેજાના 43 રનથી રાજસ્થાનનો સ્કોર 159/6 થયો.
• લખનૌ 119 રનમાં ઓલઆઉટ, મિશેલ માર્શ 55 રન બનાવ્યા.
• જોફ્રા આર્ચરની 3 વિકેટ, રાજસ્થાન બીજા સ્થાને પહોંચ્યું.

IPL 2026 LSG vs RR highlights: IPL 2026 માં લખનૌ સુપર જાયન્ટ્સ (LSG) ની ખરાબ કિસ્મત અને ખરાબ ફોર્મ બંને સતત ચાલુ છે. સીઝનની 32મી મેચમાં રાજસ્થાન રોયલ્સે (RR) લખનૌને તેના જ હોમ ગ્રાઉન્ડ પર 40 રનથી કરારી હાર આપી છે. ઋષભ પંતે ટોસ જીતીને પહેલા બોલિંગ તો પસંદ કરી લીધી, પણ 160 રનનો સામાન્ય ટાર્ગેટ ચેઝ કરવામાં તેની આખી ટીમ 18 ઓવરમાં માત્ર 119 રનમાં જ સમેટાઈ ગઈ. આ હાર સાથે લખનૌને સળંગ ચોથી હારનો સામનો કરવો પડ્યો છે અને તે પોઈન્ટ ટેબલમાં 9મા નંબરે છે, જ્યારે શાનદાર જીત સાથે રાજસ્થાન રોયલ્સ હવે બીજા નંબરે પહોંચી ગયું છે.

જાડેજા બન્યો રાજસ્થાનનો સંકટમોચક

મેચની શરૂઆતની વાત કરીએ તો, લખનૌના બોલરો ખાસ કરીને મોહમ્મદ શમી અને મોહસીન ખાને કમાલ કરી હતી અને રાજસ્થાનની શરૂઆત ખૂબ જ ખરાબ રહી હતી. યશસ્વી જયસ્વાલે 22 અને કેપ્ટન રિયાન પરાગે 20 રન બનાવ્યા, જ્યારે વૈભવ સૂર્યવંશી (8) અને ધ્રુવ જુરેલ (0) સસ્તામાં આઉટ થઈ ગયા. એક સમયે 77 રનમાં 5 વિકેટ પડી ગઈ હતી, પરંતુ છઠ્ઠા નંબરે આવેલા રવિન્દ્ર જાડેજાએ સંકટમોચક બનીને 29 બોલમાં અણનમ 43 રન ફટકાર્યા. તેને છેલ્લે શુભમ દુબેનો સાથ મળ્યો અને રાજસ્થાને 20 ઓવરમાં 159/6 નો ફાઇટિંગ સ્કોર ઊભો કર્યો. લખનૌ તરફથી પ્રિન્સ યાદવે પણ 2 વિકેટ ઝડપી હતી.

પત્તાના મહેલની જેમ વિખેરાયું લખનૌ

160 રનનો ટાર્ગેટ આજના T20 જમાનામાં બહુ મોટો નથી ગણાતો, પણ લખનૌની શરૂઆત એટલી ખરાબ હતી કે પહેલી 3 ઓવરમાં જ 3 વિકેટ પડી ગઈ. આયુષ બદોની (0), કેપ્ટન ઋષભ પંત (0) અને એડન માર્કરામ (0) ખાતું ખોલાવ્યા વિના જ પેવેલિયન ભેગા થઈ ગયા. એક તરફથી ઓપનર મિશેલ માર્શે બાજી સંભાળી અને 41 બોલમાં 55 રન ફટકાર્યા, પણ સામે છેડેથી કોઈ સાથ ન મળ્યો. નિકોલસ પૂરને 22 રનનું યોગદાન આપ્યું. એકાનાની પીચ ધીમી હતી અને બોલ ટર્ન થઈ રહ્યો હતો, જેના કારણે લખનૌના બેટ્સમેનો સેટ થઈ શક્યા નહીં અને રનરેટનું દબાણ વધતું ગયું.

જોફ્રા આર્ચરની ઘાતક બોલિંગ

16મી ઓવરમાં મિશેલ માર્શ આઉટ થતાં જ લખનૌની જીતની આશાઓ પર પાણી ફરી વળ્યું હતું. ડેથ ઓવર્સમાં જોફ્રા આર્ચરે પોતાની સ્પીડ અને લાઇન લેન્થથી ભારે તબાહી મચાવી. આર્ચરે 4 ઓવરમાં માત્ર 20 રન આપીને 3 મોટી વિકેટ ઝડપી લીધી. અંતે બ્રિજેશ શર્માએ એક જ ઓવરમાં બે વિકેટ પાડીને લખનૌની ઇનિંગ્સને 119 રન પર જ સમેટી લીધી અને રાજસ્થાન રોયલ્સને એક શાનદાર અને એકતરફી જીત અપાવી.

આ પણ વાંચો

15 વર્ષના વૈભવ સૂર્યવંશીએ રચ્યો ઈતિહાસ: માત્ર 8 રન બનાવીને તોડ્યો IPLનો સૌથી મોટો રેકોર્ડ