કબડ્ડી વર્લ્ડકપ 2016: સાઉથ કોરિયાનો આર્જેન્ટિના સામે વિજય

અમદાવાદ: શહેરના  ટ્રાન્સસ્ટેડિયા એરિના ખાતે રમાતા કબડ્ડી વર્લ્ડ કપના ત્રીજા દિવસના પ્રથમ મુકાબલામાં સાઉથ કોરિયાએ લડાયક રમત રમનાર આર્જેન્ટિનાને 68-42ના સ્કોર સાથે પરાજય આપ્યો હતો. જ્યારે અન્ય એક મેચમાં જાપાને અમેરિકાને 45-19થી હરાવ્યું હતું. જ્યારે ત્રીજી મેચમાં ઈરાને થાઈલેન્ડે 64-23થી હરાવ્યું હતું. વર્લ્ડ કપમાં પ્રથમ વખત રમનાર બિનઅનુભવી આર્જેન્ટિનાએ કોરિયન ટીમને જોરદાર પડકાર ફેંક્યો હતો. તેના સુકાની ક્રિસ્ટો ફ્રેન્કોને ગેરવર્તણૂક બદલ ગ્રીન કાર્ડ અપાયું હતું. કોરિયાએ પ્રથમ હાફમાં પોતાના દબદબા સાથે 43-11નો સ્કોર કર્યો હતો. બીજા હાફમાં કોરિયાએ ગેમપ્લાન બદલીને પોતાની ડિફેન્સને વધુ મજબૂત બનાવી હતી. કોરિયન ટીમ વધારે મજબૂત હોવા છતાં આર્જેન્ટિનાની ટીમે તેને બે વખત ઓલઆઉટ કરવામાં સફળતા હાંસલ કરી હતી. પણ અનુભવનો અભાવ તથા નિયમોની અપૂરતી જાણકારી આર્જેન્ટિનાની ટીમની વિરુદ્ધમાં ગઇ હતી. પ્રથમ હાફમાં પાંચ વખત ઓલઆઉટ થયેલી આર્જેન્ટિનાની ટીમ બીજા હાફમાં એક વખત ઓલઆઉટ થઇ હતી.