સિડનીઃ અમ્પાયરની ભૂલનો શિકાર બન્યો ધોની, હાથમાંથી જતી રહી મેચ

સિડનીઃ ભારત અને ઓસ્ટ્રેલિયા વચ્ચે ત્રણ મેચની વન-ડે સિરીઝની પ્રથમ મેચમાં ઓસ્ટ્રેલિયાએ ભારતને 34 રનથી હાર આપી હતી. મેચમાં ઓસ્ટ્રેલિયાએ ટોસ જીતીને પ્રથમ બેટિંગ કરવાનો નિર્ણય કર્યો હતો. ઓસ્ટ્રેલિયાએ ભારતને જીતવા માટે 289 રનનો લક્ષ્યાંક આપ્યો હતો. હાર બાદ કેપ્ટન કોહલીએ જણાવ્યું હતું કે, મેચનો ટર્નિંગ પોઇન્ટ ધોનીની વિકેટ રહી હતી. રોહિત શર્મા અને ધોની જે રીતે રમી રહ્યા હતા તે સમયે લાગતું હતું કે મેચ અમારા પક્ષમાં છે પરંતુ ધોનીના આઉટ થયા બાદ અમે કોઇ મોટી ભાગીદારી કરી શક્યા નહી. નોંધનીય છે કે ભારતીય ટીમની શરૂઆત ખરાબ રહી હતી, શિખર ધવન, કોહલી અને રાયડુ સસ્તામાં આઉટ થઇ જતા ટીમ મુશ્કેલીમાં મુકાઇ ગઇ હતી પરંતુ ધોની અને રોહિત શર્માએ શાનદાર બેટિંગ કરી જીતની આશા જગાવી હતી. એક સમયે એવું લાગી રહ્યું હતું કે, ટીમ ઇન્ડિયા આ મેચ જીતી જશે પરંતુ 51 રને બેટિંગ કરી રહેલા ધોની બેહરનડ્રાફની એક બોલ પર બીટ થઇ ગયો હતો જે સીધો ધોનીના પેડ પર જઇને વાગ્યો હતો. બોલરે એલબીડબલ્યૂની અપીલ કરી હતી જેને અમ્પાયરે સ્વીકારી ધોનીને આઉટ આપ્યો હતો. ભારત પાસે કોઇ રિવ્યૂ બાકી ન હોવાના કારણે ધોનીએ પેવેલિયન પાછું ફરવું પડ્યું હતું. બાદમાં જ્યારે રિપ્લેમાં સ્પષ્ટ જોઇ શકાતું હતું કે, બોલ પિચિંગ આઉટ સાઇડ પર હતી. અને નિયમ અનુસાર ધોની આઉટ નહોતો. ધોની અગાઉ રાયડુએ રિવ્યૂ ગુમાવી દીધો હતો. ધોની બાદ દિનેશ કાર્તિક અને જાડેજા પણ રોહિત શર્માને સાથ આપી શક્યા નહોતા અને ટીમ ઇન્ડિયાએ મેચ ગુમાવી હતી.